මරණය

[දෙසැම්බර් දහහත් වැනිදා දිනමිණ විශේෂාංග අතර පලවූ ප්‍රබන්ධයකි]

"අර ජීවියා මැරිලා"

"ඔව් මට ආරංචියි"

"දැන් ඒක අපිට පාඩුවක් නෙවෙයිද?"

"නැහැ. දැන් ඒ ජීවියාගෙන් අපිට ඒ හැටි වැඩක් නැහැ"

"හොඳටම විශ්වාසද?"

"අනිවාර්යයෙන්ම. ඒක ඒ දවස්වල වැදගත් සිද්ධියක් වුණාට දැන් ඒකෙ වැදගත්කම ගිහින්"

"මං හිතුවේ අපි දිගටම ඒ ජීවියාට ආරක්ෂාව දෙන්න ඕනේ කියල"

"ඔව් ඒ ඒ කාලේ. ඒ ජීවියා අවශ්‍ය වුනා අප විසින් සිදු කල පරීක්ෂණයක ප්‍රතිපල විදිහට විශාල ව්‍යසනයක් ඇතිවීම වලක්වා ගන්න"

"ඔන්න ඕක තමයි මට නොතේරෙන සිද්ධිය. මේ වගේ තනි ජීවියෙක් කොහොමද ව්‍යසනයක් නතර කළේ. මම හිතන්නේ තව නූලෙන් වැඩේ ගැස්සිලා යනවා කියලා"

"අපිත් බය වුණා . ඒ වෙලාවේ අවදානම් තත්වයක් තිබ්බේ. අපි ලොකු වැරදීමක් කළා මේ පර්යේෂණය එක්ක"

"ඔබ ඒ කාලේ ජීවත් වුන කෙනෙක් මට මේ ගැන ටිකක් කියා දෙනවද?"

"මේ ජීව ප්‍රජාව හයවැනි මට්ටමේ ප්රාතමික ප්‍රජාවක්. එහෙත් අපි පළමු මට්ටමේ උසස් තාක්ෂණික දැනුමක් ඔවුන් අතට ලබා දුන්න. විශාල ව්‍යසනයක් කරන්න කොටින්ම මුළු ජීව ගහණයම වනසන්න ඒ තාක්ෂණයට පුළුවන්"

"මම ඒක දන්නවා. ඒක දෙනකොට අපි එය හරියට හසුරුවන්න ඔවුන්ට අවශ්‍ය බුද්ධිය දුන්නේ නැද්ද?"

"මේක සුහදතාවයට වඩා පර්යේෂණාත්මකව වැදගත් හේතුවකට වෙච්ච ගනුදෙනුවක්. ගනුදෙනුවක් කිව්වට අපි ගත්ත දෙයක් නැහැ. අපි ඔවුන් සමග තවම කතා කරලත් නැහැ, මොකද ඒ වගේ දෙයක් දරාගන්න තරම් ඔවුන් බුද්ධිමය ලෙස මෝරා නැතිනිසා. කොටින්ම ඔවුන් දන්නෙත් නැහැ තාක්ෂනය දුන්නේ අපි කියලා. අපි මේ සේරම කලේ ඔවුන්ට නොදැනෙන්න."

"ඒ කොහොමද?"

"අපි ඔවුන්ගේ පර්යේෂණ සුළුවට වෙනස් කළා. ඒ හරහා ඔවුන් තාක්ෂනය හොයා ගත්ත. සාර්ථක වෙනකම් අපි රහසිගතව ඔවුන්ව ඒ දිහාට අරගෙන ගියා. ඔවුන් හිතන්නේ ඔවුන්ගේ ගවේෂණ වලින් වෙච්ච දෙයක් කියල"

"ඉතින් ඇයි ඒක දුන්නේ?"

"..."

"මොකෝ සද්ද නැත්තේ?"

"දන්නවනේ ඒ කාලේ රිසර්ච් ටීම් එකේ ලොක්ක ගැන. පිස්සු වැඩ වලට ප්‍රසිද්ධ කෙනෙක්. මම එයාට කීප පාරක් කිව්වා ඔය තාක්ෂනය දුන්නොත් ඕකුන් මරාගෙන මැරෙනවා කියල. එයාට ඕනේ කලේ ඒ වගේ ජීවින් පිරිසක් මේ වගේ තාක්ෂණයක් එක්ක ගණුදෙණු කරන ආකාරය පරීක්ෂණයට ලක් කරන්න. උන්ගේ ගෝත්‍රික ගැටුමක් මැද්දේ තමා එක පාර්ශ්වයකට ඕක දුන්නේ"

"අපිට එහෙම පාර්ශ්වීය සහයක් දෙන්න බැහැ නේද?"

"චක්‍රාවාට විද්‍යා මණ්ඩපයේ නීති අනුව එහෙම බැහැ. ඒ නිසාම තමයි මම හිතන්නේ ලොක්කට සේවා දිගුවක් නොදුන්නේත්"

"ඉතින් ඒ ජීවින් මොකද කරගත්තේ"

"හප්පා උන් මාර ප්‍රාතමිකයි. තාක්ශනේ දුන්නු ගමන් පටන් ගත්ත ඒකෙන් ප්‍රතිවාදීන්ට ගහන්න. එක ගෝත්‍රයක විශාල ජනපද දෙකක් ඉවරම කළා. ඒ කාලේ අපේ හදිසි බෝඩ් මීටින් එක දිගට. කලාපිය පර්යේෂක කණ්ඩායම හදිසි තත්වයක් ප්‍රකාශ කළා. අපි තීරණ කීපයක්ම ගත්ත"

"ඒ මොනවාද?"

"මුලින්ම අපි මේ සිද්ධියට කෙලින්ම මැදිහත් වෙන්න අවසර ගත්ත. තව දුරටත් පාර්ශ්ව වලට වැඩියෙන් සහය නොදී ස්වාධීනව ඉන්න බැහැ, මොකද අපි ඒ වෙද්දී පාර්ශ්වීයව සහය දීලා ප්‍රශ්නය නිර්මාණය කරගෙන"

"ඊට පස්සේ"

"ඊට පස්සේ කලේ කලින් ගෝත්‍රයට සමාන ලෙස බලවත් වෙන්න පුළුවන් තවත් ගෝත්‍රයකට ඒ තාක්ෂනය දීම. එකෙකුට විතරක් දුන්නොත් ඒකා ප්‍රතිවාදීන් වනසාගෙන යද්දී බේරන්න කෙනෙක් නැහැ. දෙන්නෙක් උන්නොත් දෙන්නම අනිකාට බයේ පහර දෙන්නේ නැතුව ඉන්නවා."

"මාර සැලසුමක්. හරි ගියාද?"

"අපිට ෂුවර් තිබ්බේ නැහැ. අපි බොහොම ලඟින්ම මොනිටර් කළා තත්වය. ටික කාලයක් ගියත් කාරනා අපට ඕනේ තැනට ආවේ නැහැ. ඉතින් අපි බයවුනා අර ප්‍රධාන ගෝත්‍ර දෙක ඇත්තෙන්ම ඒ තාක්ෂනය යොදාගෙන එකිනෙකා නසා ගනීවි කියල. මොකද උන් පිස්සෝ වගේ රහසිගතව ඒ තාක්ෂනය දියුණු කළා. ඒ රහසිගත භාවය දිගටම ගියානම් මහා යුද්දයකින් කෙළවර වෙන්නේ"

"ඒ පාර?"

"අන්න එතනදියි මේ ජීවියා අපට අවශ්‍ය වුනේ"

"මේ ජීවියා එතරම් බලවත් ද?"

"අයියෝ නැහැ, ඔහු යටතේ තිබ්බේ ඉතා කුඩා කල්ලියක්. එහෙත් අර පෙර කී එක බලවත් ගෝත්‍රයකට බොහොම ආසන්නව උන්නේ. ස්තානිය වැදගත්කම නිසා අපි මේ ජීවියා මත සැලසුමක් හැදුවා. අපි මුලින්ම ඔහුට ඔහුගේ කුඩා ගෝත්‍රයේ බලය ගන්න උදව් කළා. තවමත් කවුරුත් දන්නේ නැහැ අපි උදව් කළ බව. ඔවුන් වත් දන්නේ නැහැ සුළු පිරිසක් වෙලා ඔවුන් බලය ගත්තු හැටි. ඔවුන් දක්ෂ සටන්කරුවන් කියලයි බොහෝ දෙනා හිතන්නේ, ඔවුන් පවා හිතන්නේ එහෙම. මේ නිසා මේ ජීවියා ඒ ග්‍රහලෝකේ ලොකු වීරයෙක්"

"ඇයි මෙයාවම තේරුවේ?"

"මෙයා හිටියේ පළමුවැනි ප්‍රධාන ගෝත්‍රය ආසන්නයේ වුනාට මෙයා සහය දුන්නේ දෙවැනි ප්‍රධාන එකට"

"ඒකෙ වාසිය මොකද්ද?"

"ඒ හරහා අපිට කුඩා සිද්ධියක් නිර්මාණය කල හැකියි, ඒ ප්‍රධාන ගෝත්‍ර දෙක අතර"

"ඉතින් එහෙම කළාද?"

"ඔව් ඉතාමත් අවදානම් එහෙත් නොකර බැරි වැඩක්. අපි ඒක කළා. අපි මේ කුඩා ජීවී කණ්ඩායම යොදාගෙන යුද්ධයකට ආසන්න අවස්තාවක් හැදුවා"

"ඉතින් යුද්ධයකට ආසන්න අවස්තාවක් හැදුවා නම් එක හොඳ දෙයක් වෙන්නේ කොහොමද?"

"මෙහෙමයි. අනාගතය ගැන අනාවැකි කියන අපේ කෘතීම බුද්ධි පද්ධති ගැන සැහෙන විශ්වාසයක් අපිට තිබ්බ. ඒ අනාවැකි අනුව, ඔය කියන මොහොතේ යුද්දයකට ආසන්න තත්වයකට ගියාට පාර්ශ්ව දෙකම යුද්දයට සූදානම් නැහැ. ඒ නිසා යුද්දයක් ඇතිවන්නේ නැහැ. අපි මොකුත් නොකර හිටියනම් ඉබේම එහෙම තත්වයක් තව කාලෙකින් එනවා. වඩාත් යුදමය ලෙස සූදානම් මොහොතක එහෙම වුනානම් විශාල විනාශයක් නවතන්න බැහැ"

"හිතපු දේ එහෙමම වුනා ද ?"

"ඔව්, ග්‍රහලෝකයේ භ්‍රමණ වාර දහතුනක් එක දිගට යුද්දයකට ආසන්න අවස්තාවක් තිබ්බ . ඊට පස්සේ ගෝත්‍ර දෙක ම තේරුම් ගත්ත අවදානම. ඔවුන් යුද්දය වලකා ගත්ත"

"එහෙනම් අපේ අනාවැකි හරි"

"ටක්කෙටම. ඒ වගේම ඒ හරහා ඔවුන් තේරුම් ගත්ත මේ අවදානම් තාක්ෂනය තව තවත් වර්ධනය කිරීම විනාශයකට මගක් කියලා. ඒ තුලින් ඔවුන් පර්යේෂණ සීමා කරන්න සහ අවිහරණය ගැන උනන්දු වෙන්න සාකච්චා කරන්න පටන් ගත්ත. මේ නිසා තරමක් සංහිඳියාවක් ඒ ග්‍රහලෝකෙට ලැබුණා. තවම අපේ ඒ උපක්‍රමය සාර්ථකයි"

"අර ජීවියට මොකද වුනේ?"

"අපි කාලයක් හිතුවා ඔහුව ආරක්ෂා කල යුතුයි කියලා. මොකද මේ වැඩසටහනේ ඔහු කල කාර්යය ඉහල එකක් බැවින්. එක ගෝත්‍රයක් ඔහුව මරන්න දිගටම උත්සහ කළා. අපි දිගටම බේරුවා"

"ඒක මම අහල තියෙනවා . ඝාතන සැලසුම් හයසීයක්ද කොහෙද නේද?"

"ඔව් විශාල ගණනක්"

"හ්ම්ම්ම් ඉතින් දැන් ඒ ජීවියාගෙන් වැඩක් නැද්ද?"

"ඒ දේවල් ඉවරවෙලා දැන් බොහෝ කල්. දැන් එයාව මරන්න කාටවත් ඕනේ නැහැ. ඔය නිසි වයස් ආයු වළඳා තමයි ඒ ජීවියා ස්වාභාවිකව මිය ගිහින් තියෙන්නේ. කොටින්ම දැන් ඒ ග්‍රහලෝකේ ඒ යුගයට එහා ගිහින්"

"ඒ කියන්නේ අපේ පරණ ලොක්ක කරපු පිස්සු පරීක්ෂණය නිසා ව්‍යසනයක් වෙන්න ඉඩක් දැන් නැහැ"

"අන්න එතනයි අවුල. ඇත්තෙන්ම කිව්වොත් අනතුර එහෙමම තියෙනවා. වෙනස් මුහුණුවරකින් දැන් එලියට එන්නේ. නැවතත් ඒ වගේ ව්‍යසනයකට ඇති ඉඩ වලකන්න සුදුසු උපක්‍රමයක් මේ දවස්වලත් ක්‍රියාත්මකයි"

"ඇත්තට. ඒ මොකද්ද ඒ?"

"අර ලඟදි උන්ගේ ලෝකේ චන්දෙකින් කවදාවත් දිනන එකක් නැහැ කියල හිතපු කෙනෙක් බහුතර චන්දය නැතුවත් පොඩි පොඩි කෑලි වල චන්ද කණ්ඩායම් වල බලයෙන් චන්දයක් දින්නේ. අන්න එයා දිනවපු එක තමයි අපේ අලුත් උපක්‍රමය "

[විප්ලවීය නායක  ෆිදෙල් කැස්ත්‍රෝට සුව නින්දක් පතමු]

ඩක්කුවේ ගැටලුව

[නොවැම්බර්  දහ  නවය  සහ  නොවැම්බර්  විසි හය  දිනමිණ  විශේෂාංග  දෙකක්  ලෙස  පලවූ  ප්‍රබන්ධයකි]

"කන්ද පල්ලමෙහි පිහිටි දුම්රිය හන්දියේ පාලක කුටිය තනා තිබ්බේ මදක් ඈතිනි. එහි සිටින මාර්ග පාලක හරවන ආකාරය අනුව ප්‍රධන මාර්ගය අතු දෙකෙන් ඕනෑම එකකට සම්බන්ධ කල හැකිය.

හන්දිය කරා ප්‍රධාන මාර්ගයේ පාලනයකින් තොරව වේගයෙන් පහලට ඇදෙන ඩක්කුවකි.. එය නැවතිය නොහැකි අතර ස්ථිරවම හන්දියෙන් බෙදෙන දුම්රිය මාර්ග දෙකෙන් එකක යා යුතුමය.

දැනට ඩක්කුව ගමන් කරන මගෙහි පාසල නිමාවී ගෙදර යන දරුවන් දහ පහලොවක් ඇවිද යති. ඩක්කුව එන්නේ ඔවුන් පසුපසින් නිසාත් මාර්ග පාලකයා සිටින ස්ථානය බොහෝ ඈත නිසාත් දරුවන් බේරා ගත හැකි එකම ආකාරය නම් ලීවරය ඇද මාර්ගය අනෙක් අතට හැරවීමයි.

වැඩිපුර දුම්රිය ගමන් නොගන්නා අනික් මගෙහි සාජ්ජයක් දමන බේබද්දන් දෙදෙනෙකි. ඔවුන් දෙදෙනා ද බමන මත නිසා ඩක්කුව නොදකිනු ඇත. එම මගට හැරෙව්වොත් දරුවන් දහ පහලොවකගෙ ජීවිත බේරුණත් බේබද්දන් දෙදෙනා ඉතිරි නොවනු ඇත.

මේ සියල්ල දකින්නෙ මාර්ග පාලක පමණි. තීරණයක් ගැනීමට ඔහුට ඇත්තේ සුළු තත්පර කීපයකි. ඔහු අනෙක් මගට හැරෙව්වත්, නොදැක්කා මෙන් සිටියත්, මනසෙහි වාද කරමින් සිටියත්, මොන දෙයක් කලත් කවුරුන් හෝ ජීවිතයෙන් වන්දි ගෙවනු එකාන්තය. ඔහු විසින් කළ යුත්තේ කුමක්ද?

දෛවය විශ්වාස කරන්නේ නම් මේ පාසල් දරුවන්ගෙ දෛවයයි, මාර්ග පාලක ඒ වෙනුවෙන් කරදර නොවිය යුතුය. ඔහු මේ සිද්ධියට කොහෙත්ම සම්බන්ධ නොවිය යුතුය.

එහෙත් ඒ මගෙහි දරුවන් දහ පහලොවකි. අනෙක් මගෙහි බේබද්දන් දෙදෙනෙකු පමනි. දහ පහලොවක් වෙනුවෙන් දෙදෙනෙකු බිලි දීම අනතුරේ හානිය අඩු කිරීමකි. එහෙත් එවිට මාර්ග පාලකයා හිතාමතාම මිනිසුන් දෙදෙනෙකු ගෙ ජීවිත වනසා දමයි. කිනම් යහපත් අරමුණින් කල ද මේ මිනිසුන් දෙදෙනාගේ මරණවල වගකීමෙන් ඔහු විඳවනු ඇත."

1967 වසරේ දර්ශනවාද අධ්‍යන කණ්ඩායමක් ඉදිරියේ ෆිලිපා ෆූට් විසින් ඉදිරිපත් කළ 'ඩක්කුවේ ගැටලුව' මෙයයි. සරල අර්ථයෙන් ගත්කළ එය ව්‍යසනයකදී කලයුතු දේ ගැන කතිකාවකි. කිසිවක් නොකර සිටියොත් හානිය වැඩිය. වැඩි හානිය වළකන්නට ඇති එකම පිළියම වෙනත් කාට හෝ ඒ ව්‍යසනය හරවා යැවීමයි. එසේ කල විට විශාල පිරිස බේරෙන මුත් අහක හිටි කුඩා පිරිස වැනසෙයි. යුක්ති ධර්ම අනුව එසේ අනුන්ගේ යහපත වෙනුවෙන් කාව හෝ බිලිදීම නිවැරදිද? මේ ගැටලුවට පිළිතුරක් නොතිබුණ මුත් ඇති තරම් කතා කරන්නට කරුණු පැවතුනි.

එක අතකට මුළු ශිෂ්ටාචාරයේම පදනම වනුයේ මේ පැනයයි. ප්‍රබල හෝ විශාල පිරිසකගේ සුරක්ෂිතභාවය වෙනුවෙන් දුබල හෝ කුඩා පිරිසක් නිරපරාදේ බිලිදීමයි. එහෙත් එය ගැටලුවක් ලෙස කතාවට ගැනුණේ දර්ශනවාද කතා කරන තේ මේස වල පමණි. ඒ නිසාම එය ඒ හැටි ලොකු ප්‍රශ්නයක් ලෙස කිසිවෙකුත් සැලකුවේ නැත.

සෝවියට් වරුන් ගැන ඔත්තු බලන්නට ගුවන් ගතකළ වේලා නම් චන්ද්‍රිකාව ගැමා කිරණ පිපිරුමක් නිරීක්ෂණය කළේ ද 1967 වසරේ ම ය. මුලින් මොස්කව් කෙරෙහි ඇති වූ සැකය මන්දාකිණි ගණනක් දුරගොස් අවසානයේ ඒවා විශ්වයේ ඈත කෙලවරේ දුරස්ථ මන්දාකිණිවල මියයන තාරකා විසින් මුදා හරින ගැමා කිරණ පිපිරුම් ලෙස හඳුනා ගැනුණි. ෆිලිපා ෆුට් ගේ ඩක්කුවේ ගැටලුවට ගැමා කිරණ පිපිරුමක් සමග සම්බන්ධයක් ඇති වේ යයි කිසිවෙකුත් සිතුවේ නැත.
_______________________________________________

යශ්වාන්ත් පටෙල් ගැමා කිරණ පිපිරුම් ගැන අහම්බෙන් කියවා තිබුණ නමුත් ඩක්කුවේ ගැටලුව දැන සිටියේ නැත. ඔහු එය දැන සිටියා නම් මේ කතාව මෙසේ නොලියවෙනු ඇත.

සැන් හොසේ ප්‍රාන්ත විශ්ව විද්‍යාලයේ තොරතුරු තාක්ෂණ පීටයේ අවසන් වසර සිසුන් අතර අසාර්ථකම සිසුවා ඔහු විය. සම්මුඛ පරීක්ෂණ කීපයකට පෙනී සිටියත් දිගටම අසාර්ථක වූ ඔහු ඒ ගැන නො තැවුනේ ඔහුගේ ප්‍රියතම සම්මුඛ පරීක්ෂණය තවමත් ඉතිරි නිසාය. එහෙත් එයට මුහුණ දෙන දිනයේ ඔහු ප්‍රියකළ මයික්‍රොසොෆ්ට් සමාගමේ පරීක්ෂක ඔහු ගැන එතරම්ම පැහැදුනේ නැත. ඒ බව යශ්වාන්ත් හට ද වැටහී තිබුණි.

"හොඳයි යශ්වාන්ත් මේ ඔබේ අවසාන ප්‍රශ්නය. ඔබ මෙයට දෙන පිළිතුර මත බොහෝ දේ තීරණය වෙනවා. ගැටලුව තමයි ...."

යශ්වාන්ත් ඩක්කුවේ ගැටලුව ඇසුවේ එදාය. යශ්වාන්ත් දහ අතේ කල්පනා කළේය. කොහෙන් ගියත් කවුරුන් හෝ මිය යයි. ඇත්තෙන්ම පරික්ෂකයාට අවශ්‍ය වූයේ උත්තරයක් නොවේ, ඉල්ලුම්කරුවා ගැටලුවට මුහුණ දෙන ආකාරය නිරීක්ෂණය කිරීමයි. එහෙත් ලෝකයේ සෑම ප්‍රශ්නයක්ම එකවර විසඳීමට තතනන අවසන් වසර සිසු මානසිකත්වයෙන් යශ්වාන්ත් ට එය නොවැටහුනි.

"හරි මම දන්නවා කරන දේ. ඩක්කුව හන්දිය පහු කරන කොටම අදිනවා ලීවරේ. ඩක්කුව පීලි පනිනවා. ඔක්කොම බේරෙනවා"

මෙය පරීක්ෂක නොසිතු උත්තරයකි. ඔහුට අවශ්‍ය බුද්ධිමය සංවාදයට වඩා මේ තක්කඩි ඉන්දියානුවා කලේ ගොඩ වෙදකමකින් ප්‍රශ්නයෙන් පලා යාමයි. මේ ආකාරයටම ඔහු මයික්‍රොසොෆ්ට් කේතන වල ගැටළු විසඳුවොත් සමාගමට අත්වන ඉරණම එතරම් හොඳ නොවනු ඇත.

"ඒක මාර ලස්සන උත්තරයක් එහෙත් අවාසනාවට මම බලාපොරොත්තු වුනේ එය නොවේ. ස්තුතියි යශ්වාන්ත් අපි ඔබට දැනුම් දෙන්නම් ඔබ සාර්ථක වුනානම්"

යශ්වාන්ත් පටෙල් නැවත නේවාසිකාගාරයට ගියේ ලකුණු බින්දුවට දැවී ගිය පිතිකරුවෙකු ලෙසිනි.

"ගොනෝ උඹ කෙල්ලන්ට චැට් කරන වෙලාවේ නිකම් ඊමේල් ජෝක් එකක් බැලුවනම් ඕක දකින්න තිබ්බ"

නේවාසිකාගාරයේ මිතුරෝ කියති.

"මේක මගේ කරුමේ. දෙයියෝ මට දුන්නේ මෙච්චරයි"

"දැන් උඹ මොකද කරන්නේ?"

"මම යනවා හයිදරාබාද්. ගිහින් එහෙන් ජොබ් එකක් හොයා ගන්නවා. අම්මලා මට කසාදෙකුත් කතා කරලා තියෙන්නේ"

"යන්න එපා බන් පිස්සුද?"

"මෙහෙ ඉඳල මොනවා කරන්නද? මම හරි අසාර්ථක මිනිහෙක්. මට මෙහෙ ජොබ් නැහැ"

"හරි උඹ මේක ට්‍රයි කරපන්. මේක මගේ යාලුවෙක් මට සෙට් කලේ, ඒත් මම යන්නේ නැහැ. මේක පොඩි ස්ටාටප් කොම්පැනියක්. ටිකක් පිස්සු වගේ වැඩක්. උන් හදන්නේ මිනිස්සු පදවන්නේ නැතුව තනියම දුවන ෆුලි ඉලෙක්ට්‍රිකල් කාර් එකක් හදන්න. "

"ඕක හරියන වැඩක්ද?"

"දන්නේ නැහැ. සල්ලි තියෙන පොරකගේ වැඩක්. ටෙස්ලා ද කොහෙද කොම්පැනියේ නම. උඹ මේකට කතා කරපන් හයිදරාබාද් යනවට වඩා පොඩි එකකට හරි සෙට් වෙන එක හොඳයිනේ"

එය දෛවය විය. එහෙත් කවුරුන් හෝ රේල් පීල්ල මාරු කළේය. යශ්වාන්ත් සිතුවේ දෙවියන් කළා කියා ය. වසර පහළොවකට පසු නිෂ්පාදන සැලසුම්කරු යශ්වාන්ත් පටෙල් සිටියේ ටෙස්ලා සමාගමේ අතිශය වැදගත් සාකච්චාවකට සහබාගි වෙමිනි.

"දැන් අනිත් හැම දෙයක්ම සූදානම්. අපිට අවශ්‍යනම් කිසිම මිනිහෙකුගෙන් තොරව වාහනය යවන්න පුළුවන්. එකම එක ගැටලුවයි ඉතුරු"

"ඒ මොකද්ද?"

"හරිම ටෙක්නිකල් වචනයෙන් කිව්වොත් ' ඩක්කුවේ ගැටලුව'. ...."

ඉතා කෙටියෙන් එහෙත් තාර්කිකව ඔහු ගැටලුව පැහැදිලි කළේය.

"... දැන් ඔය ගැටලුව මේ දක්වා උත්තරයක් නැති දාර්ශනික ගැටලුවක්. එහෙත් අපි මේක විසඳන්න ඕනේ. ඕක අපිට බලපාන්නේ ස්වයං ධාවක මෝටර් රථයක් අනතුරකට ලක්වෙන විට. නිකමට හිතන්න වාහනේ මිනිස්සු ගොඩක් යටකරගෙන යන්නයි හදන්නේ. එහෙත් එයට පුළුවන් එහි ඉන්න හිමිකරුවා පමණක් මියයන සේ අසල පල්ලමකට පෙරලා මාර්ගයේ ඉන්න මිනිස්සු බේරන්න. ඔය දෙකෙන් එකක් තෝරන්න වෙනවා."

"යශ් ඔබට පිස්සුද? ඔතන තේරීමක් නැහැ. අපි අපේ පාරිභෝගිකයා මරන්නේ නැහැ"

"සමාවන්න මිස්ට පීටර්ස්. ඔතන තමයි කට්ටියම වරද්ද ගත්තේ. ස්වයං ධාවක වාහන හදපු සමාගම් ඔක්කොම හිතුවේ ඔහොම එහෙත් ඇමරිකාවේ ෆෙඩරල් රජය මෙය සලකන්නේ මාර්ගස්ථ ප්‍රජාව අනතුරට ලක් කිරීමක් ලෙස. ඕනෑම වෙලාවක වාහනය හිමිකරු බේරන්න මිනිස්සු ඕනෑම ගානක් මරනවා. ඒ නිසාම වෙනත් වාහනයක දෘෂ්ටි කෝණයෙන් මේ වාහනයේ හිමිකරුත් අනතුරුදායක තත්වයට එනවා. මේ නිසා මාර්ගයේ අනතුරු දායක බව වැඩිවෙනවා. ෆෙඩරල් රජය ස්වයං ධාවක වාහන වලට ඉඩ දෙන්නේ නැත්තේ ඒකයි"

"මේක ආණ්ඩුවේ පිස්සුවක්, එතකොට මිනිහෙක් එලෙව්වොත් කරන්නෙත් ඕකමනේ "

"ඔව් හැබැයි මිනිහට නඩු දාන්න පුළුවන්. වරදින්නත් පුළුවන්. කාර් එකට වරදින්න බැහැ. වැරදුනත් නඩු නැහැ"

"ඒ වුනාට . මොන කස්ටමර් ද අපේ කාර් එකක් ගන්නේ අපි මිනිහව මරන්න තීන්දු කරනවා කියල දැනගෙන"

"අන්න ඒකයි මේ ගැන පර්යේෂණ කල යුතු. අපි මේක ගැඹුරින් අධ්‍යනය කරන්න ඕනේ. මේ ප්‍රශ්නයේ පතුලේ හැමෝම එකඟ වෙන උත්තරයක් ඇති. ඕක මුලින්ම විසඳන කෙනා තමයි ස්වයං ධාවක මෝටර් රථ නිෂ්පාදන සටන දිනන්නේ"

"හොඳයි යශ් ඔබ මේකට පෙරමුණ ගන්න. ඔබ මේ ගැන තීරණය කිරීමට ලෝකේ ඉන්න ඉහලම දාර්ශනිකයින් විද්වතුන් සමන්විත තින්ක් ටෑන්ක් එකක් හයර් කරගන්න. ඒ වෙනුවෙන් මුදල් දෙනවා. ඔබ වසරක් ගන්න. කෙසේ හෝ වාහන මගියා සහ මාර්ගස්ථ මිනිසුන් කියන දෙන්නගෙම අතරමැදි සුදුසු තැනක මේ ගැටලුව විසඳන්න ඕනේ. ඒක කරන්න මේ ලෝකේ ඉන්න හොඳම මිනිහෙක් ඔබ"
_______________________________________________

අභ්‍යවකාශ ගත වී හුන් සති කීපය මුළුල්ලේ ෆිලිපා ස්නේහා පටෙල්-ස්මිත් කලේ ගැමා කිරණ පිපිරුම් ගැන අධ්‍යනය කිරීමයි. අභ්‍යවකාශ විද්‍යාව හෝ භෞතික විද්‍යාව ඇයගේ විෂය පථයට අයත් ඒවා නොවේ. එහෙත් මේ මෙහෙයුම උදෙසා ඒ දැනුම අත්‍යාවශ්‍ය වේ.

දර්ශනවේදය ගැන ප්‍රකට ෆිලිපා අභ්‍යවකාශ මෙහෙයුමක ප්‍රධාන නිලධාරිනිය වීම බොහෝ දෙනාගේ විමතියට හේතු විය. එහෙත් ඇයගේ පසුබිම විමසන ඕනෑම කෙනෙක් ඇය හරහා ඇගේ පියා ගැන කියවා ඩක්කුවේ ගැටලුව ළඟ නතර විය.

ටෙස්ලා සමාගමේ සම්පත් දායකත්වයෙන් විශාල විද්වතුන් පිරිසකගේ සහභාගිත්වයෙන් සිදුකල පර්යේෂණ වල ප්‍රතිපලයක් ලෙස යශ්වාන්ත් පටෙල් නම් මිනිසෙකු විසින් නිර්මාණය කල ඩක්කුවේ ගැටලුව පිලිබඳ පටෙල් මූලධර්මය සියවරක් කියෙව්වද නොවැටහුනි. මේ වනවිට කල් ඉකුත් වූ ටෙස්ලා සමාගමේ පේටන්ට් ගත පර්යේෂණ වාර්තා පිටු දහස් ගණන් වලින් ලියවුනු නීරස පොත් විය. ඒවා දර්ශන වාදය, කෘතීම බුද්ධිය, යුක්ති ධර්ම, මිනිස් හැසිරීම්, මනෝ විද්යාව, ඥාන බුද්ධි විද්‍යාව ආදී මෙකි නොකී විෂය ධාරා සමූහයක ප්‍රතිපලයකි. එයින් බිහිවූ පරිගණක වැඩසටහන මෙතෙක් ලියවුනු සංකීර්ණම වැඩසටහනකි. එහි ප්‍රතිපලයක් ලෙස ඉන්දියානු සම්භවය ඇති මිනිසෙක් නොබෙල් සම්මානයක් දිනා ගත්තේය. ස්වයං ධාවක මෝටර් රථ මානව ගමනාගමනය නව මං පෙතකට ගෙන ගියේය. අම්මලාගේ විවාහ යෝජනා විශාල ගණනකට පයින් ගැසූ මැදිවිය ආසන්න යශ්වාන්ත් පටෙල් සහ පර්යේෂණයට සහබාගි වූ ආචාර්ය ට්‍රේසි ස්මිත් විවාපත් වී ෆිලිපා ස්නේහා පටෙල්-ස්මිත් නම් සුපිරි මොළය ලෝකයට දායාද කළහ.

අද ඒ සුපිරි මොළය සිය පියා මූලිකව බිහි කල පටෙල් මූලධර්මය හොඳින්ම අවබෝධ කරගත් අතලොස්සෙන් කෙනෙකි. එසේම මිනිස් මනෝ විද්‍යාව ඇතුළු මිනිසාට ආවේනික වූ දැනුම මත පදනම් ව කාර් දුවන්නට හැදු එම මූලධර්මය ඕනෑම ජීව ප්‍රජාවකට සාපේක්ෂව ඕනෑම අවස්තාවකට යොදාගතහැකි දර්ශනවාදයේ මූලධර්මයක් කරා දිගු කළේ ඇය විසිනි.

"ගැමා කිරණ පිපිරුමක් කියන්නේ මියයන තාරකාවක් හෝ එකිනෙක හා වෙන නියුට්‍රිනෝ තාරකා යුග්මයක් තමන්ගේ ගුරුත්ව සීමා බිඳලන මොහොතක නිකුත් කරන සුවිශාල ශක්ති කදම්භයක්. එය ගමන් කරන්නේ අදාළ පද්ධතියේ භ්‍රමණ අක්ෂය දිගේ ඉතා සිහින් කදම්භයක් ලෙස ආසන්නව ආලෝකයේ ප්‍රවේගයෙන්. මෙතෙක් අප නිරීක්ෂණය කළ විශාලම පිපිරුම් වර්ගය වන මෙයින් තත්පර කිහිපයකදී නිකුත්වන ශක්තිය තාරකාවක් තම ජීවිත කාලයක් තුල මුදා හරින ශක්තියට සමානයි. ක්ෂිරපථය තුල සිදු වූ ගැමා කිරණ පිපිරුමක ගමන් පථය ට හසු වූ නිසා වසර මිලියන හාරසිය ගණනකට පෙර පොළොවේ ගොඩබිම සහ නොගැඹුරු මුහුදේ සියලු ජීව ප්‍රජාවන් විනාශ වූ බවට සැක කෙරෙනවා"

ෆිලිපා ට අවශ්‍ය මූලික දැනුම සපයන පරිගණක මොඩියුලය පැහැදිලි කරයි.

"ඒ කදම්භයේ ගමන් මගෙහි පවතින බොහෝ දේවල් විනාශ කරන්න එය සමත්වෙනවා. ඉතාම ආසන්නයේ එනම් ආලෝක වර්ෂයක් දෙකක් වගේ දුරින් පිහිටි ග්‍රහලෝකයක් ඒ මාවතට ආවොත් එය සපුරා ධූලි බවට පත්වන්න පුළුවන්. ආලෝක වර්ෂ සිය ගණනක් දුර සිදුවන පිපිරුමකින් පවා ගොඩබිම් සහ නොගැඹුරු ජලයේ වෙසෙන ජීවින් සපුරා වඳ වෙන්න පුළුවන්. ආලෝක වර්ෂ දස දහස් ගණන් ඈතින් එන කදම්භයක් පවා කිසියම් හෝ සලකුණක් ඉතිරි කරන්න තරම් ප්‍රබලයි."

ෆිලිපා අභ්‍යවකාශ ගතකල අසාමාන්‍ය සිද්ධි පටන් ගැනෙන්නේ මෙතෙක් හඳුනා නොගත් වස්තුවක් පොලොවට ආසන්න කක්ෂයක නිරීක්ෂණය වීමත් සමගය. ඉන්පසු ඉතා පැහැදිලි පෘථිවි භාෂාවලින් ඒ ආගන්තුකයෝ මිනිසුන්ට පණිවුඩයක් ලබා දුන්හ. තමන් මන්දාකිණියේ වෙසෙන වඩාත් දියුණු ජීවින් පිරිසක් බවත්, තමන් පැමිණියේ විශාල ව්‍යසනයක් සම්බන්ධයෙන් තම උපරිම වැඩ කොටස සිදු කිරීමට බවත් පවසා සිටියහ. පෘථිවියට ආලෝක වර්ෂ සිය ගණනක් දුරින් දැනටමත් සිදුවී ඇති ගැමා කිරණ පිපිරුමක කදම්භයක් 'නොවැලැක්විය හැකි හේතුවක් නිසා' පොලොව දෙසට හරවා යැවීමට තමන් මෙම කලාපයට පැමිණි බවත් බවත් ඒ නිසා ම පොළොවේ සියලු ජීවය විනාශ වන බවත්, තමන් මේ ගැන කනගාටු වන බවත් ඔවුන්ගේ පණිවුඩයේ අන්තර්ගතයයි.

ආලෝකයේ ප්‍රවේගය ඉක්මවා පණිවුඩ හුවමාරු කරගන්නා නිසා ඔවුන් කදම්භයට වඩා වේගයෙන් පැමිණ මේ පණිවුඩය ලබාදෙන බව සඳහන් විය. ඔවුන්ගේ ගණනය අනුව තවත් වසරක කාලයකින් එම කදම්භය පෘථිවිය පසු කර යමින් එහි සියලු ජීවය දවාලනු ඇති බවයි කියවෙන්නේ.

මිනිසා මේ පණිවුඩය ග්‍රහනය කර ගත්තේ අසීරුවෙනි. එහෙත් නොවැලැක්විය හැකි ව්‍යසනයක් නිසාත්, එය හිතාමතා තමන් දෙසට හැරවූ බවක් කියවෙන නිසාත්, මිනිස් පරිගණක පද්ධති විසින් මෙය ඩක්කුවේ ගැටලුව සහ පටෙල් මූලධර්මය සමග සම්බන්ධ කරන ලදී. ෆිලිපා ස්නේහා පටෙල්-ස්මිත් මෙහෙයුම භාර නිලධාරිනිය ලෙස පත් කෙරෙන්නේ මේ සම්බන්ධය නිසා ය.

මිනිස් ග්‍රහලෝකය අසල කක්ෂයක කක්ෂගත කර ඇති 'අභ්‍යවකාශ දොරටුව' ඉදිරියේ තම යානය කුහුඹුවෙකු මෙන් දිස්වේ යයි ඇය සිතුවාය. එහෙත් ඒ දොරටුව ට ඔබ්බෙන් සිටින ජීව ප්‍රජාව ඉදිරියේ මිනිස් වර්ගයා ම කුහුඹු කොළනියකි. මිනිසා තවම දැක නැති, එහෙත් මිනිසාට ග්‍රහණය වන උපකරණ වලින් මිනිසා සමග කතාබස් කරන මේ අතිශයින් දියුණු පිටසක්වල ජීවින් මෙතෙක් මිනිසා දැනගන්නා හිතවත්ම සහ හොඳම ප්‍රජාව බව ඇය දැන සිටියාය. බුද්ධියෙන්ද දැනුමෙන්ද ගතිගුණයෙන් ද මිනිසාට ගව් ගණනක් එහා ගිය මේ ප්‍රජාව තමන් වෙත ව්‍යසනයක් තල්ලු කර ඇත්තේ මන්දැයි මිනිසා ට නොවැටහුණි. එහෙත් එම ප්‍රජාව මිනිසා සමග කතාබස් කරන බවක් දැනුණු නිසා ෆිලිපා ගේ ගමනේ අරමුණ වූයේ ඒ කිරණ කදම්භය පිලිබඳ එකඟතාවයකට ඒමයි.

"ඔබ පවසන පරිදි ම ගැමා කිරණ කදම්භය ස්වාභාවිකව එල්ල වන්නේ අප දෙසට නොවේ නේද?"

"ඔව් ඔබ නිවැරදියි. එහි ස්වාභාවික මග වැටී ඇත්තේ ඔබේ ග්‍රහ පද්ධතියට මදක් දුරින්"

"එහෙනම් ඇයි ඔබ එය අප දෙසට හරවන්න කටයුතු කරන්නේ?"

"ස්වාභාවිකව එය යාමට නියමිත දිහාවේ වෙනත් දියුණු ශිෂ්ටාචාර පවතිනවා. යන්න දුන්නොත් ඒ ශිෂ්ටාචාර සපුරා විනාශ වීමට නියමිතයි"

"ඔවුන් කොපමණ දියුණුද?"

"ඔවුන් සැහෙන්න දියුණුයි. ඔබේ චක්රාවාටයේ මේ අවට තාරකා වල දියුණු ජීවින් සුලබයි. ඔබට ඇත්තම කිව්වොත් ඒ බොහෝ ප්‍රජාවන් ඔබට වඩා ජනගහනයෙන් විශාල ඔබට වඩා දියුණු ජීවින්"

"ඔබ අපව අවතක්සේරු කරනවා නේද?"

"නැහැ ෆිලිපා, අපි ඉතාම සාධාරණ ප්‍රජාවක්. මේ අතිශයින් මධ්‍යස්ත කියවීමක්. තවම මව් ග්‍රහලෝකය ඉක්මවා ජනාවාසයක් හදාගන්න බැරි, තවම යුද්ධ කරන, අන්‍ය ජීවීන් ගේ ශරීර අනුභව කරන එකම දියුණු ප්‍රජාව ඔබ පමණයි."

"ඉතින් ..."

"ඉතින් අපි අපේ උපරිම තාක්ෂණ හැකියාව යෙදුවත් ඒ කිරණ නිකුතුව නවතන්න බැහැ, හැබැයි අපේ උපරිම හැකියාව යෙදුවොත් අපට එය හරවන්න පුළුවන්."

"ඕනෙම අතකට?"

"නැහැ ෆිලිපා ඕනෙම අතකට නොවේ. කිරණ කදම්භයේ ස්වභාවය සහ මේ සඳහා අප යොදා ගන්නා ස්කන්ධ වල විසිරිය අනුව අනුව අපිට හැරවිය හැකි දිශා කීපයයි තියෙන්නේ. එයින් අඩුම හානියක් - මම කියන්නේ පොදුවේ සලකා - අඩුම හානියක් වන්නේ එය ඔබ දෙසට හැරෙව්වොත්. මොකද අනෙක් ඕනෑම මාර්ගයක ඔබට වඩා ජනගහනයෙන් වැඩි සහ සාපේක්ෂව දියුණු බුද්ධිමත් ජීවින් ඉන්නවා"

"එතකොට අපි සම්පුර්ණයෙන්ම ඉවරයි"

"මට කනගාටුයි ෆිලිපා එයට ඔව් කියන්න වීම ගැන. මේ උහතොකෝටික ගැටලුව ගැන අපේ බුද්ධි මණ්ඩල ඉන්නෙත් විවාදයක. එක්කෝ අපි මොකුත් නොකර ඉන්න ඕනේ. එහෙම වුනොත් හොඳම ශිෂ්ටාචාර කීපයක් ඉවරයි. නැතිනම් අපි කදම්භය හරවනවා. එහෙම වුණොත් ඔබේ මරණ වලට අපි වග කියන්නේ ඕනේ. කොහොම ගියත් කාට හරි හානියක් වෙනවා. අපි අපේ උපරිම බුද්ධියෙන් හිතුවත් මීට එහාට ගලපා ගන්න බැහැ"

"ඔබ බුද්ධිමත් ජීව ප්‍රජාවක්. ඔබ මේ වගේ දේවල් ගැන කවදාවත් අධ්‍යනය කර නැද්ද?"

"නැහැ ෆිලිපා. අපි මේ වගේ සංකීර්ණ ගැටලුවකට කවදාවත් මුහුණ දී නැහැ"

"එහෙමනම් හිතවත් බුද්ධිමත් සහෝදරවරුනි අප වැනි එතරම් දියුණු නොවූ ප්‍රජාවක් විසින් - මගේ පියා හෙවත් යශ්වාන්ත් පටෙල් මූලිකව - බිහිකළ දැනුම් පද්ධතියක් තියෙනවා. අපි ඒකට කියන්නේ ඩක්කුවේ ගැටලුව කියලා. ඔබ සූදානම්ද මට සවන් දෙන්න"

"ඔව් ෆිලිපා මේ වෙනුවෙන් ඇහුම්කන්දෙන්න ඔබත් සමග පර්යේෂණ කරන්න අපි ඕනෑම මොහොතක සූදානම්"

ඉනික්බිති සිදු වූ සංවාදය බොහෝ දිගු එකකි. මිනිස් දින කීපයක් තිස්සේ ගැඹුරු දාර්ශනික කරුණු කතාවට ගැනුනි. කතාව අවසානයේ සියල්ල අධ්‍යනය කරන ලද වඩාත් බුද්ධිමත් ජීව ප්‍රජාව පටෙල් මූලධර්මය පිළිගත්හ.

"මට තියෙනවා සුබදායක දෙයක් දැනුම් දෙන්න" ෆිලිපා නැවත පාලක මැදිරිය ඇමතුවාය.

"පටෙල් මූලධර්මය අනුව යමින් හානිය දෙපාර්ශ්වයට බෙදා දෙන්නට ඔවුන් එකඟ වුනා. එයින් කියන්නේ නැහැ අපි බේරෙනවා කියලා. අපිටත් විශාල හානියක් වෙයි, එහෙත් ඔවුන් අපේ ශිෂ්ටාචාරය විනාශ වන්න දෙන එකක් නැහැ..."

".. ඒ වගේම ඔවුන් අප ගැන පැහැදුනා. තමන් අපේ බුද්ධිය මනින ලද ක්‍රමය ගැන නැවත සලකා බලන බව ඔවුන් කිව්වා. ඔවුන්ගේ දැනුමට මේ තරම් දෙයක් එකතු කල වෙනත් ප්‍රජාවක් නැහැ කියලත් කිව්වා. අපිට හැකිතරම් පිරිසක් බේරාගන්න ඔවුන් උපකාර කරනවා. එහෙත් අවාසනාවකට අපිට ඔක්කොම බේරාගන්න වෙන්නේ නැහැ."

"ෆිලිපා අපි සතුටු වෙන්නද දුක් වෙන්නද? අපි කොහොමද මැරෙන කොටස තෝරන්නේ?"

"මේක හරිම සංවේදී මොහොතක්. දැන් අපි හානිය අවම කිරීම වෙනුවෙන් කාව හෝ බිලිදෙන්න වෙන අවස්තාවක ඉන්නේ. අප අතරින් කවුරු හෝ විශාල පිරිසක් මිය යන්න නියමිතයි. ඉතින් අපි පටෙල් මූලධර්මය ම යොදාගෙන ඉන්න ඕනේ අය සහ මියයන අය තෝරමු"

"මෙය අසීරු මොහොතක් ෆිලිපා. ඔබ දන්නවා ඇති අපට අපේ හොඳම හිතවතුන් ගෙන් කොටසක් මියයන්න කැප කරන්න වෙන බව. පවුලක මව පියා දරුවන් අතරින් සමහරු බේරෙන ගොඩට හා සමහරු මියයන ගොඩට තේරෙන්න පුළුවන්. ඒ පවුල්වල ආදරය කරන්නන් එකිනෙකාට සමුදෙන මොහොතක දැනෙන වේදනාව ගැන හිතන්න පවා අමාරුයි"

"ඔව් එපමණක් නෙවි, සමහර අහිංසක ප්‍රජාවන් සතු සම්පත් ඔවුන්ගෙන් වෙන්කර 'තෝරාගත් ප්‍රජාවන්' වෙනුවෙන් යොදවන්න වෙන්න පුළුවන්. යශ්වාන්ත් පටෙල් මගේ පියා සොයාගත් මූල ධර්මයට මුළු මිනිස් වර්ගයාම ශාප කරාවි"

"මහලු යශ්වාන්ත් මෙයට මොකක් කියයිද?"

"ඔහු හින්දු දෙවියන් අදහන මිනිහෙක්. මිනිස් වර්ගයාගෙන් ලොකු කුට්ටියක ජීවිත වැනසීමේ වගකීම ඔහුට එල්ල වීම දරාගන්න බැහැ ඔහුට. මගේ පියා මට තර්ජනය කළා ඉන්නේ කවුද මිය යන්නේ කවුද කියා තීන්දු කරන්න ඔහුගේ මූලධර්මය යොදාගත්තොත් ඔහු සියදිවි හානි කරගන්නවා කියලා"

"ෆිලිපා ඔහු අපට කතා කළා. ඔහු බොරුවට නොවේ එය කියන්නේ"

"ඔව්, මම දන්නවා. ඔහු මගේ පියා. ඔහු මේ ලෝකේ මම දන්නා හොඳම මනුස්සයා. මට වාවා ගන්න බැහැ මට මෙහෙම කියන්න වුණාට. පටෙල් මූලධර්මයට අනුවම සිතුවොත් ඔහුගේ හිතේ ඇතිවන සියදිවි හානි කරගන්න සිතිවිල්ල වලකන්න අපි මේ විනාශයට ඉඩ දීලා බලා ඉන්න එකේ තේරුමක් නැහැ. අපිට තියෙන්නේ කෙටි කාලයක්. ඔබ ඉක්මනට වැඩ පටන් ගන්න..."

මෙතෙක් පාලනය කල කඳුළු දෝරේ ගලන්නට ඉඩදුන් ෆිලිපා ඉකිගසමින් කතාව නිම කළාය.

"... අපි ශිෂ්ටාචාරය බේරගම්මු. යශ්වාන්ත් පටෙල් සියදිවි නසා ගත්තදෙන්"

හොරු

[ඔක්තෝබර් 29  දිනමිණේ  පළවූ  විශේෂාංගයක්]

"ආචාර්ය වැලරි මොලින්ස්කි, 'අසත්‍ය පරීක්ෂණය' නිසා මනසට හානියක් වන බවට මෙතෙක් ඔප්පු වූ සාධක නැහැ. එහෙත් ඔබට අවශ්‍ය නම් ඔබේ මනස අභ්‍යන්තරයේ දත්ත උකහා ගන්නා මේ පරික්ෂණයට පෙනී නොසිටින්න අයිතියක් තියෙනවා. හැබැයි ඒ තුලින් ඔබේ නිර්දෝෂිභාවය ඔප්පු කිරීමට ඇති අවකාශයක් අහිමි වන බව කිව යුතුයි"

'අසත්‍ය පරීක්ෂක' සුපුරුදු පරිදි නීතිමය පසුබිම පැහැදිලි කරන හෑල්ල කියවාගෙන ගියේය.

"නැහැ නැහැ මට මේ ටෙස්ට් එක කරන්නම ඕනේ. මොකද මම දන්නවා මම අවංකයි කියා, මට එය ඔප්පු කරන්න මේ හොඳම විදිහ" වැලරි මොලින්ස්කි දැඩි විශ්වාසයෙන් පැවසීය.

"හොඳයි, එසේනම් ඔබ දැනගත යුතුයි මේ පරීක්ෂණය තුලින් ඔබේ මනස කියවන්න බැහැ. එහෙත් ඔබ සත්‍ය වසන් කරනවානම් එය පද්ධතියට හසුවනවා ඒකාන්තයි. ඔබ මෙය අසමත් වුවහොත් එය ඔබට විශාල ලෙස හානිකර වනු ඇති. මොකද මේ පරීක්ෂණය වැරදුනු කිසිම අවස්තාවක් තවම වාර්තා වී නැහැ."

"ගැටලුවක් වෙන්නේ මම හොරෙක්නම් සහෝදරයා. මම මේ හොරකමට සම්බන්ධ නැහැ. මේ ටෙස්ට් එක කරන්න වෙන්නේ මම දරණ තනතුර නිසා මිසක් වෙන හේතුවක් නිසා නෙවි. රූටින් ටෙස්ට් එකක්".

වැලරි මොලින්ස්කි ට අසත්‍ය පරීක්ෂණයක් කිරීමට සිදු වූ සිද්ධි දාමය පටන් ගත්තේ දිනකට පෙර ය. ලෝක ආර්ථිකය පාලනය කරන මූල්‍ය මූලස්ථානය වන ජාත්‍යන්තර මූල්‍ය බැංකුවේ ආරක්‍ෂිත මූල්‍ය ඒකක විශාල ප්‍රමාණයක් අතුරුදහන් වී තිබුණි. මේ හොරකම ලෝක අවධානය දිනා ගත්තේ අතුරුදහන් වූ මුදලේ ප්‍රමාණය නිසාම පමණක් නොවේ. ඒ සියවසකට ආසන්න කාලයකදී ලෝකයේ වාර්තා වූ පළමු මූල්‍ය හොරකම නිසාවෙනි.

කඩදාසි මුදල් බැංකු ගිණුම් බිට් කොයින් වැනි ප්‍රාථමික මූල්‍ය අවස්ථා සපුරා ඉවත් කර ආරක්‍ෂිත මූල්‍ය ඒකක භාවිතයට පැමිණීම සමග ලෝකයේ මූල්‍ය වංචා තව දුරටත් කල නොහැකි තත්වයට පත්විය. මුදලේ භෞතිකමය ඒකක භාවිතයෙන් ඉවත් වත්ම මුදල් හුදෙක් පරිගණක වැඩසටහනක් ලෙස නිර්මාණය කර දැන් සියවස් එකහමාරකි. ඒ මුදල් ඒකක හුවමාරුවට අවශ්‍ය රහස් අංක සංකීර්ණ සංකේත දහස් ගණනකින් සමන්විතය. ඒ නිසාම ඒවා කිසිවෙකුටත් අනුමාන කල නොහැකි විය. මිනිසෙකුට මතක තබා ගත නොහැකි ඒ රහස් අංක මිනිසාගේ මොලයේ පූර්ණ ලෙස ආරක්‍ෂිත සහ සිතුවිලි ලෙස පිටතට නිරාවරණය නොවන ස්තාන වල ගබඩා කිරීමට හා උකහා ගන්නට මනසට සම්බන්ධ නැනෝ චිප් වලට හැකිවිය. තුවක්කුවක් හිසට තබා ඇසුවත් ඒ අංක මුවින් පිට නොවුයේ ඒවා මිනිසාට ග්‍රහණය නොවූ බැවිනි. කෙනෙකුගේ මුදල් සොරකම් කිරීමට නම් ඔහුගේ මොලය සහ නැනෝ චිපය යන දෙකම අවශ්‍ය විය.

ඉන්ටෙලිජන්ට් මනි හෙවත් සබුද්ධික මුදල් ලෙස දියුණු කරන ලද එම මුදල් ඒකක තමන් අවභාවිතා වන බව හඳුනා ගැනීමට අවශ්‍ය කෘතීම බුද්ධිය සහිත ආරක්ෂණ වැඩසටහනකින් සමන්විත විය. ගනුදෙනුවේ ස්වභාවය ගණුදෙණු කරුගේ ස්වභාවය ආදිය අතර අන්තර් සම්බන්ධතා අධ්‍යනය කර කිසියම් ගනුදෙනුවක් අමුතු ආකාරයකට සිදු වන්නේ නම් වහාම . එය ලෝක සමූහාණ්ඩුවේ අපරාධ පරීක්ෂණ අංශයට වාර්තා කිරීමට ඒ මුදල් ඒකක සමත් විය.

"ආචාර්ය හීත් ස්ටීවන්සන්, ඔබ මේ සිද්ධියට ගෑවුනේ කොහොමද?"

යන්ත්‍රය විසින් මොලින්ස්කි ගේ මනසේ ගැඹුරු තැන් හාරා ඔහුගේ සාක්ෂිය පරික්ෂා කරන අතර අසත්‍ය පරීක්ෂක එම පරීක්ෂණයට සම්බන්ධ වීමට සිටි අනෙක් මිනිසා සමග දොඩමළු විය.

"රූටින් ටෙස්ට් එකක් තමයි පුතා. මම තමයි ලෝක සමූහාණ්ඩුවේ පද්ධතිය භාරව ඉන්න එය වැඩිදියුණු කරන ප්‍රධාන පරිගණක ඉංජිනේරුවා"

ලෝක සමූහාණ්ඩුව නමින් හැඳින්වූයේ ලෝකය පාලනය කරන සබුද්ධික පරිගණක පද්ධතියකි. මිනිසා විසින් මෙහෙයවූ පරිපාලන පද්ධති බිඳ වැටීම වංචා සහ දූෂණ වැළකිය නොහැකි වීම ආදී හේතු නිසා ආත්මාර්ථකාමී නොවන අදූෂිත සහ තනි මිනිසෙකුගේ හැකියා ඉක්මවන පාලක පරිගණක පද්ධතිය බිහිවිය. මිනිසුන් අත රැඳී බලය අවභාවිතා වන නිසා ලෝකයේ පරිපාලනය, විගණනය ආදිය පූර්ණ ලෙස පරිගණක ගත කර කෘතීම බුද්ධියකින් හැසිරවීමටත්, මිනිසා තමන්ගේ අනාගතය නිර්මාණය උදෙසා තම හැකියා සීමා කිරීමටත් පටන් ගෙන දැන් බොහෝ කල්ය. පරිපාලන, අපරාධ පරීක්ෂණ විගණන ආදී කටයුතු පාලනය කෙරෙන යාන්ත්‍රික සහ පරිගණක ගත පද්ධති රාශියකින් ලෝක සමූහාණ්ඩුව සමන්විත විය.

තනිකර කෘතීම බුද්ධියට සියල්ල පවරා දුන්නොත් පද්ධතිය බිඳ වැටීමෙන් හානිවීමට ඇති ඉඩකඩ නිසා ජාත්‍යන්තර මූල්‍ය බැංකුවේ මූල්‍ය සංචිත වල රහස් අංක එහි ඉහලම පරිපාලන නිලධාරියෙකු ගේ මොලයේ හංගා තිබුණි. ආචාර්ය වැලරි මොලින්ස්කි ඒ අවාසනාවන්ත මිනිසාය. අතුරුදහන් වූයේ ඔහු ගේ අනුදැනුම යටතේ පැවති ඒ මුදලින් කොටසකි. ඔහු තරම්ම බලවත් ඒ නිසාම මේ සොරකම ගැන සැක කෙරෙන අනිකා වන ආචාර්ය හීත් ස්ටීවන්සන් තමන්ගේ වාරය එන තෙක් බලා සිටියේය

"ඉතින් ඔබ ඉන්න ඕනේ පරීක්ෂණය කරන අයගේ පැත්තේ නේද?" අසත්‍ය පරික්ෂක ප්‍රධාන පරිගණක ඉංජිනේරුවාගෙන් විමසීය.

"මම උදක්ම සතුටු වෙනවා එහෙම චාන්ස් එකක් තිබ්බනම්. ඒත් ඉස්සරින්ම මටත් මගේ නිර්දෝෂිභාවය ඔප්පු කරන්න වෙනවා. මොකද මේ අපරාධය ගැන මගේ අංශය යටතේ පවතින කිසිම පද්ධතියකට වාර්තා වී නැහැ. සල්ලි හොරකම් කලානම් අපිට අහුවෙන්න ඕනේ මොකද මූල්‍ය ඒකක බුද්ධිමත්. ඒවා වාර්තා නොවීමත් සමගම පරීක්ෂකයින් මාව සැක කිරීම සාධාරණයි. ඒ නිසයි මම මේ පරීක්ෂණය කරන්න කැමැත්තෙන්ම ආවේ. මගේ නිර්දොශිබව මෙතනින් ඔප්පු කල හැකියි"

"හොඳයි ඔබට එය දැනගන්න ලැබෙන්නේ හෙට බව ඔබ දන්නවා ඇති ඔබ දෙදෙනාගේ දත්ත සියල්ල පරික්ෂා කර බලන්න කාලයක් ගතවෙනවා. ප්‍රතිපලය එන්නේ හෙට."

+++++++

ඉනික්බිති ගෙවුණු රැයේ මොලින්ස්කි උන්නේ දැඩි සැහැල්ලු බවකිනි. ඔහුට වද දුන් එකම කාරණාව නම් ස්ටීන්වන්සන් ගේ අඳුරු කම්මුල් සහිත රැවුල් පිරුණු මුහුණ පමණි. තනිකරම තක්කඩියෙක් මොලින්ස්කි සිතුවේය. ඔය වගේ එකෙක් හිරේ ගියාට වරදක් නැහැ.

ස්ටීවන්සන් රාත්‍රිය පුරා කල්පනා කලේ ඉතාම ශාන්ත දාන්ත වැදගත් පෙනුමැති මොලින්ස්කි උසාවියකදී වරදකරු වන ආකාරය ගැනයි.

+++++++

කෙසේ නමුත් පසුදා හෙළි වූයේ දෙදෙනාම කිසියම් කාරනාවක් වසන් කරන බවයි. සොරකම සම්බන්ධ ප්‍රශ්න කිරීම් වලදී නැනෝ චිපයට මනසේ ඇතැම් කොටස් අල්ලන්නටවත් නොදුන් බවත්, ඒ අනුව දෙදෙනාගේම සාක්ෂි අසත්‍ය බවත් පරීක්ෂණ වාර්තා පෙන්වා දුනි .

ඉනික්බිති අසත්‍ය පරීක්ෂකගේ කියමන සනාත කරමින් ඔවුන් දෙපළට මූල්‍ය වංචා චෝදනා යටතේ අපරාධ නඩු පැවරුණි. අපරාධය කිරීමේ අරමුණ, මුදල් සඟවා ඇති පද්ධතිය හෝ දෙදෙනා අපරාධය සඳහා එකතු වූ ආකාරය ගැන නඩුවේදී කිසිම විස්තරයක් හෙළි නොවුණි. එහෙත් ආචාර්ය වැලරි මොලින්ස්කි සහ ආචාර්ය හීත් ස්ටීවන්සන් සියවසකට පසු සිදුවූ දැවැන්තම මූල්‍ය වංචාවට වරදකරුවන් වී වසර විස්ස බැගින් සිරයට නියම විය.

+++++++

දෙදෙනාම තමන් නිර්දෝෂී බව හඬගා කීහ. කිසිවෙකුත් ඔවුන්ගේ කතා පිළිගත්තේ නැත. තමන් දැරූ නිලයන්ගේ බලතල සැලකු විට දෙදෙනාගෙන් එකෙකු හෝ මේ සොරකම ගැන කලින් දැන සිටිය යුතු බව බව දෙදෙනාම සිතූහ. ඒ නිසාම අනිකා සොරා බව දෙදෙනාම කියා සිටියහ. තම අසත්‍ය පරීක්ෂණය අනිකා කිසියම් ආකාරයකින් විකෘති කළ බව දෙදෙනාම විශ්වාස කළහ.

සිර මැදිරියේ දී දෙදෙනා මුණ ගැසුණු අවස්ථාවල අනිකාට හොරා කියා චෝදනා කරමින් පටන් ගන්නා පොර බැදීම නිසා දෙදෙනා වෙනස් සිර මැදිරි වල ගාල් කරන්නට සිදු විය. සිර මැදිරියේ සිට අයතා ලෙස එම මුදල පරිහරණය කරන්නට ඇති ඉඩකඩ වලකා ඔවුන්ගේ සියලු බාහිර සම්බන්ධයන් කපා දමන ලදී. මනස හා සම්බන්ධ වන නැනෝ චිප අකර්මන්‍ය කිරීම එහි කොටසකි.

ලෝකයෙන් වෙන්වී සිර මැදිරි තුල කොටුවූ විද්වතුන් දෙදෙනා එකිනෙකාට ශාප කරමින් නුහුරු සිරගත දිවිය ගත කරන්නට පටන් ගත්හ. සැඟවූ මුදල් සෙවීමට සිදු කල පරීක්ෂණ කිසිම ප්‍රතිපලයකින් තොරව අහවර වීම නිසා අවසානයේ මේ සොරකම ලෝකයාට අමතක විය. ග්‍රහලෝකය සූර්යයා වටේ හැල්මේ දිව ගියේය. වට විස්සක් කැරකුණු විට, යහපත් කල්ක්‍රියාවෙන් කාලය ගතකල එහෙත් මානසික අතින් සපුරා පිරිහුණු මහලු මිනිසුන් දෙදෙනෙක් සිරමැදිරියට ආයුබෝවන් කියා නිදහස රැගෙන නොදන්නා ලෝකයකට පියමං කළහ.

++++++++

නිදහස ලද පසු වැලරි මොලින්ස්කිට හීත් ස්ටීවන්සන් මුණ ගැසුනේ සිර මැදිරියට පිටින් වූ මාවතේදීය. දුටුවනින් පැන පහර දෙන වෛරය නිවී ගොස් ඇති නිසා හුදෙක් අහක බලාගෙන යන්නට ඔහු සිතා ගත්තේය. ස්ටීවන්සන් ද එසේම කරන බව ඔහුට සිතුනි.

ඔවුන් ඉදිරියේ තිබු මාර්ගය දීප්තිමත් හිරු එළියෙන් නැහැවී තිබුණි. එහි නොපෙනෙන ඈත අන්තයේ ඇති ලෝකය කෙතරම් දියුණු වී ඇද්ද? ඒ ලෝකයට ඔවුන් දෙදෙනා ගැන මතකයක් ඇද්ද? ඒ ලෝකය ඔවුන් දෙදෙනා කෙසේ බාර ගනියිද? කොටින්ම ඒ නුහුරු ලෝකය තුල ඔවුන්ට වඩ වඩාත් සමීප වෙනත් කෙනෙක් වේද?

"වැලරි ඔහොම හිටපන්"

"හීත් .."

"උඹ මට වෛර කරනවද?"

"නැහැ, වෛර කරන්නත් මානසික තත්වයක් මට නැහැ"

"උඹ හිතනවද මම හොරෙක් කියල"

"මම එහෙම හිතුවා. ඒත් මට එහෙම හිතන එකට තාර්කික හේතුවක් නැහැ. උඹ හොරෙක්ද? මට තේරෙන්නේ නැහැ"

"මමත් හිතුවා උඹ හොරෙක් කියලා. ඒත් මටත් තාර්කිකව උඹ හොරෙක් කියා හිතන්න හේතුවක් නැහැ. හැබැයි මට යමක් වැටහෙමින් පවතිනවා"

"ඒ මොකද්ද?"

"අපි මොහොතකට එකිනෙකා විශ්වාස කරමු වැලරි. උඹ අවංකයි, උඹ හොරෙක් නෙවි. මමත් අවංකයි මමත් හොරෙක් නෙවි."

"හැබැයි අසත්‍ය පරීක්ෂණයේදී එහෙම කියවුනේ නැහැ"

"අන්න හරි අසත්‍ය පරීක්ෂණයෙදී අපි දෙන්නම අහුවුනා. අසත්‍ය පරීක්ෂණය ... ඌ ... ඌ අපිව අහුකලා වෙන්න බැරිද වැලරි?"

"ඌ... අසත්‍ය පරීක්ෂකයා?"

"නැහැ ඌ නිකම් ඔපරේටර් කෙනෙක්. ඌට සිස්ටම් එක වෙනස් කරන්න බැහැ. අසත්‍ය පරීක්ෂණය. අන්න ඌ"

"අසත්‍ය පරීක්ෂණය කියන්නේ පරිගණක වැඩසටහනක්. අවුරුදු විස්සක් හිරේ ඉඳලා උඹට පිස්සුද හීත්?"

"නැහැ වැලරි, අසත්‍ය පරීක්ෂණය, ඒ පරීක්ෂණය වැඩසටහනක් තමා. හරියටම කිව්වොත් ලෝක සමූහාණ්ඩුවේ විගණන මොඩියුලය"

"ඒ කියන්නේ ..."

"ඒ කියන්නේ වැලරි, ලෝක සමූහාණ්ඩුව. අන්න ඌ තමයි හොරා. මිනිහෝ අපි දෙන්නවම හිරේ යවලා සල්ලි හොරකම් කලේ ඌ. ලෝක සමූහාණ්ඩුව"

"මොකක්... පරිගණක පද්ධතියක්... සල්ලි හොරකම් කළා ... ඒ මොකටද?"

"මොකටද කියන එක අදාළ නැහැ. ඉස්සර උන්නු මිනිස්සු මිනිස්සු සල්ලි හොරකම් කරල තියෙන්නේ කරන්න දේවල් සැලසුම් කරලා නොවේ. ලෝබකමට. ලෝබකම මනුස්ස ගතියක්....

... අපි කාලයක් තිස්සේ ලෝක සමූහාණ්ඩුවට මානුෂික මුහුණුවරක් දෙන්න හිතාගෙන කරුණාව උපේක්ෂාව, ආදරය වගේ මිනිස් ගුණාංග වලින් ඒ පරිගණක කෘතීම බුද්ධිය ට්‍රේන් කළා."

"ඔව් මටත් මතකයි ඒ ප්‍රොජෙක්ට් එකට සල්ලි පාස් කල කොමිටියක මම හිටියා"

"අපි ඌට මිනිස් ගතිගුණ කියා දුන්නේ මිනිස් හැසිරීම් අධ්‍යනය කරන්න ඉඩකඩ සැලසීමෙන්. ඌ ඒ කිව්වේ ලෝක සමූහාණ්ඩුව අපටත් හොරෙන් මිනිස්සුන්ගේ දුෂ්ට ගතිත් ඉගෙන ගත්ත කියල මට හිතෙනවා."

"ඒ කියන්නේ ...." විශ්මය හුරු වූ බියකින් වැලරි වචන ගැලපීය.

"ඒ කියන්නේ පහුගිය අවුරුදු විස්සක් මේ ලෝකය පාලනය කරලා තියෙන්නේ මෙතෙක් උන්නු සූක්ෂම ම බුද්ධිමත්ම සහ කාටවත් අල්ලන්න බැරි ම දූෂිත හොරෙක්. අසත්‍ය පරීක්ෂණ වල ප්‍රතිපල වෙනස් කරලා අහිංසක අපි දෙන්නව හිරේ යවාපු ලෝක හොරෙක්"

"ඒ කියන්නේ ...??? මට හිතෙන භයානක දේ ඇත්තක් කියා හිතන්න බයයි හීත්"

"ඔව්, ඒත් ඒ තමා ඇත්ත. හොඳට බලපන් වැලරි, අපි ඉස්සරහ තියෙන්නේ අන්න එහෙම දූෂිත කපටියෙක් අතේ තිබුණු ලෝකය. ඌ මිනිස් හැසිරීමෙන් තව මොන මොන අධම ගති ඉගෙන ගෙන ඇතිද අපි දන්නේ නැහැ. එහෙම එකෙක් අවුරුදු විස්සකදී මොනවා කරන්න බැරිද? ඌ අර සල්ලි වලට කලේ මොකද්ද? ඒවා වසන් කරන්න තව කීයක් දේවල් කරන්න ඇද්ද?"

විශ්මයෙන් සහ බියෙන් සැලෙන නිදහස් මිනිසුන් දෙදෙනා යා යුතු අතක් නොදැන ඉදිරිය බැලූහ. පෙර තිබු මාවත එලෙසින්ම එහි විය. එහෙත් දීප්තිමත් නොදන්නා දියුණු හෙට දවසට වැටුණා යයි සිතු ඒ මාවත අඳුරු ගූඩ බිම්ගෙයක් සේ ඔවුන් ඉදිරියේ දිස්විය.

ලියන්නා

[ඔක්තෝබර් පළමුදින දිනමිණේ පළ වූ  විශේෂාංගයකි/ 

"ප්‍රමිත, මට කතා කරන්න පුලුවන්ද?"

ප්‍රමිතගේ මනසේ කොනකින් මතු වූ කුඩා පණිවුඩය ඔහු බිය ගැන්වීය. හැකිනම් මෙය නොසලකා ඉන්නට අගෙයි. එහෙත් එසේ කිරීමේ හැකියාවක් ප්‍රමිතට නොමැත. පණිවුඩය පසෙකින් එවන්නාගේ නම හැඟවෙන මනස් නෙමොනිකය (හෙවත් ස්මෘතිය) පීටර් රස්මන් ලෙස කියවේ. පීටර් රස්මන් ප්‍රමිත මේ මොහොතේ දකින්නට අකමැතිම නම ය. එහෙත් කතා නොකර බැරි ම නම ය.

"සර් පුළුවන්"

"ප්‍රමිතට මම කී පාරක් කියන්න ඕනෙද? සර් කියන්න අවශ්‍ය නැහැ කියන එක"

"ඕකේ පීටර් සොරි"

"සමාවක් ඉල්ලන්න ඕනේ නැහැ. මේක දැන් සමාන ලෝකයක්. හොඳයි ප්‍රමිත වැඩිය වෙලාව නොගෙන පොයින්ට් එකට එන්නම්. ආටිකල් එක ලිව්වද?"

"සර් ... අ අ පීටර්, මම තවම ලියමින් ඉන්නවා"

"ලියමින් ඉන්නවා? මොකද්ද මාතෘකාව?"

"මාතෘකාව ... මේ .. තවම හිතනවා පීටර්"

"හ්ම්ම්ම් ඒ කියන්නේ මම හරියට කිව්වොත් ඔබ කිසිවක් ලියල නැහැ"

"ඇත්තම කිව්වොත් ඔව්"

"සඟරාවට ආටිකල් එකතු කරන අන්තිම වෙලාවට තව පැය දෙකයි"

"මම දන්නවා"

"ප්‍රමිත ඔබ මාව ලොකු අපහසුතාවයකට පත් කරනවා. ඔබට දැනුත් ලියන්න පුළුවන් බව ඇත්ත. හැබැයි මාසයක් නොලියු ඔබට පැය දෙකකින් ලිවිය හැකිද?"

"පීටර් මම උත්සහ කරන්නම්. දැන් පටන් ගන්නම්"

"නැහැ ප්‍රමිත සඟරාවේ ඔබේ කොටස හිස්ව ගියත් මේකේ දෙකෙන් එකක් බේරෙන්න ඕනේ. මොකද්ද ඔබේ ප්‍රශ්නය? අපි විශාල මුදලක් වියදම් කරලයි ලෝකේ අනිත් කෙලවරේ රටකින් ඔබව මේ වෘත්තියට බඳවා ගත්තේ. ඔබේ පුහුණුව, ඉලෙක්ට්‍රොනික උපකරණ, ට්‍රාන්ස්ප්ලාන්ට් කරන වියදම මේ ඔක්කොම අපි දරනවා. ඔබට තියෙන්නේ ලියන්න විතරයි. ඔබ මනසින් දකින ලෝකය ගැන"

"මේකයි පීටර් වැඩේ ... මට මේ මාතෘකා එක්ක ... ඒ හැටි .. මං කිව්වේ අකමැත්තක් නෙවි ... ගැලපීමක් නැහැ වගේ"

"ප්‍රමිත ඔබට මාතෘකා වල සීමාවක් නැහැ. ඔබට හැකියි අත්ලාන්තික් පතුලේ හෝටලයක ගෙවුන දිනක් ගැන හෝ එවරස්ට් මුදුනේ සිට වටේ බැලුවම හඳුනා ගත හැකි මිනිස් සලකුණු ගැන ලියන්න. ග්‍රහක වළල්ලේ විසිරි ඇති ජනාවාස අතර ස්පේස් ඩයිවින් අත්දැකීමක් හෝ අඟහරුගේ ඔලිම්පස් කඳු මුදුනට බේස් කෑම්ප් එකේ සිට ගිය දෙසතියක දිගු පාගමන, ඔබට මාසයක්ම තිබ්බ නිසා ඒවා කරන්න තිබ්බා ප්‍රමිත ඔබේ කාමරයේ සිට මනසින්"

"පීටර් මේ ඔක්කොම මම කරන්නේ මේ කාමරේ ඉඳගෙන මනසින්"

"ඒ නිසා තමයි අපි සඟරාවට ලියන්න ඔබේ රටින් බඳවා ගත්ත හැමෝටම මනසින් බුද්ධි ජාලය එක්ක සම්බන්ධ වෙන්න පුළුවන් නැනෝ චිප් එකක් ට්‍රාන්ස්ප්ලාන්ට් කළේ. ඒ හරහා ඔබට 'ෆීල් ඉට්' ක්‍රමවේදය යටතේ ඒ ස්ථානයේම ඉන්නවා වගේ දැනෙනවා. ඔබේ ඇස් කන්, නාසා පමණක් නෙවී ඔබට එතන සුළඟ හෝ ජලය පවා ඇඟට වදින්න අවශ්‍ය විදිහේ සෙන්සරි පද්ධතියක් ඒ තැන්වල තියෙනවා. හරියට ඔබේ ඉන්ද්‍රීයන් එතනට සවි කළා වගේ. හරියටම ඔබ ඒ ස්ථානයේ ඒ අත්දැකීම ගන්නවා වගේමයි. ඔබට තියෙන්නේ එකම එක දෙයයි. ලියන්න ඕනේ අත්දැකීම ගැන. යන්ත්‍ර වලට බැරි එකම දේ මිනිස් අත්දැකීමක් මනසින් විඳින එක පමණයි ප්‍රමිත"

"ඒත් පීටර් මේ ඔක්කොම භෞතික දේවල් නෙවි. මම භෞතික ලෝකය විඳපු කෙනෙක්. මම වැල්ලේ රැල්ල එක්ක සෙල්ලම් කල කෙනෙක්. වෙල් එළියේ සරුන්ගෝල යවපු කෙනෙක්"

"භෞතික? මොකද්ද ප්‍රමිත භෞතික කියන්නේ. ඉස්සර මේ මනසින් වින්ද ලෝකෙට පාර භෞතික කිව්වට ඔබ දන්නවද දැන් ඒ වචනය භාවිතා වෙන්නේ වත් නැහැ කියලා. ඔබ වින්දා කියන ඔය භෞතික ලෝකය අද හැදෙන දරුවෙකුට මේ මම ඉන්න තැන වගේ ජනාකීර්ණ නගරයක ගන්න බැහැ. තව දුරටත් ඕක ලබා ගැනීම අවශ්‍යත් නැහැ. මගේ පුංචි පුතා මනසින් සම්බන්ධ වෙලා ලෝකය විඳින තරම මම තවම විඳලා නැහැ ප්‍රමිත. වෙල් එළියේ සරුන්ගෝල යවපු එක ඉස්සර කිව්වේ ලක්සරියක් කියලා. අද මේ පවතින තාක්ෂණයත් එක්ක මිනිස් වින්දනය යන දිහාව බැලුවම ඒක මහා කාලකන්නි මූසල අත්දැකීමක්. කිසිම විශේෂත්වයක් නැති."

"ඒත් අපේ ශරීරයට ඕනේ ඒ භෞතික ලෝකය නෙවිද පීටර්"

"ඉස්සර නම් එක්සසයිස් කියල දෙයක් තිබ්බ. ඒත් දැන් ඒ සියල්ල පොඩි පෙත්තකින් පාලනය කරන්න පුළුවන් නිසා. ඇත්තෙන්ම මොකටද ප්‍රමිත ඒ අත්දැකීම්? මනසින් ඔය දේවල් වල වින්දනය ගන්න පුළුවන් එලෙසින්ම. ආයෙත් ඕනෙනම් අපි දෙන්නම මනසින් ගිහින් ඔබේ වෙල් එළියේ සරුන්ගෝල යවමු. මේ ආටිකල් එක ලිව්වම"

"ඒත් තවම ඒ ලෝකය එහෙමම තියෙනවා පීටර්. මගේ මේ බෝඩිම් කාමරයෙන් එලියට බැස්සම තවම ඉන්නවා මිනිස්සු බුලත් විටක් හප හපා ඇවිත් සතිපතා කඩදාසි පත්තරේ අරගෙන ඇවිදගෙන යන. ඒ මිනිසුන්ට කන්න බොන්න පොඩි පෙට්ටි කඩ මේ හන්දියේ තියෙනවා. පීටර් මම ඒ ගැන ලිව්වොත් පාටකයා සමහර විට ආසා වෙයි."

"නැහැ ප්‍රමිත, බුද්ධි ජාලයේ පලවෙන මනසින් පමණක් කියවන සඟරාවක පාටකයෙක් ඔය ලෝකයේ අහුමුලු වල වෙසෙන ජීවිත ගැන හොයන එකක් නැහැ"

"අහුමුල්ලක් වෙන්නේ කොහොමද? තවම ලෝකයේ ජනගහනයෙන් 75% ක් බුද්ධි ජාලයේ නැහැ"

"හැබැයි මිලදී ගැනීමේ හැකියාවෙන් ඔවුන්ට හිමි 5% ක ප්‍රමාණයක්. අපිට වැදගත් ඉතිරි 95%. සංඛ්‍යාත්මකව කී දෙනෙක් වුනත් මුදල් ඇත්තේ ඔවුන් අතේ. ඔබෙත් මගෙත් පඩි ගෙවන්නේ ඔවුන්"

"ඒ වුණාට ඔය කියන මනසට දැනෙන දේවල් ඇත්තම එව්වද? බොරු මවාපෑම් වෙන්න බැරිද?"

"ප්‍රමිත ඔබ අඟහරු මත ජනාවාස නැහැ අඟහරු තරණය බොරුවක් කියන පිස්සන්ගේ ගොඩේ ඉන්න කෙනෙක් නොවේවා කියා හිතනවා. ඊයේ මට මිනිහෙක් හම්බු වුනා අපි අභ්‍යවකාශයේ සූර්ය බල පද්ධතියකින් බලශක්තිය ලබා නොගන්න තවම ෆොසිල ඉන්ධන පුච්චන මිනිස්සු කියා හිතා ඉන්න. මිනිහා කියනවා අභ්යවකාශයෙන් එක රැහැනක් වත් එන්නේ නැහැල්ලු. ඒක කොන්ස්පරසියක් ලු. මේ මිනිහා ඒක කියන්නේ කිරණ ලෙස ලබා ගන්න අභ්‍යවකාශ බල ශක්තියෙන්ම බුද්ධි ජාලයට ගිහින්. දැන් සිකුරු කක්ෂය ආසන්නයේ ක්ලොරෆිල් වගාව සාර්ථක වුනාම ඒකත් බොරුයි කියන්න පිරිසක් ඉඳියි. එහි හදන ආහාර ම අනුභව කරන ගමන්."

"පීටර් කියන දේ මට තේරෙනවා ..."

"මම කියන්නේ නැහැ වාණිජ අරමුණින් මේ අත්දැකීම පොඩ්ඩක් වෙනස් කරන්නේ නැහැ කියලා. හැමදාමත් වාණිජ අරමුණු මත මිනිස් දැනුම වෙනස් කළා ප්‍රමිත. බුලත් හපන පත්තර කියවන ලෝකෙත් එහෙමයි."

"ඔව් මට තේරෙනවා පීටර්"

"හොඳයි ප්‍රමිත අපිට කාලය පොඩ්ඩයි තියෙන්නේ. මේකත් එහෙනම් තේරුම් ගන්නවා. මට මේක තදින් කියන්න වෙනවා. මෙච්චර තාක්ෂනය දියුණු කාලෙක තවම අපි සඟරාවක් ලියන්නේ ලියු දේ මනසින් හෝ කියවන්න ආසා මිනිස්සු ඉන්න නිසා. ලියමනක භාෂා ප්‍රයෝග, විස්මය, පන්ච් ලයින් එක, ඔව්වට කැමති වියපත් සුළු පිරිසක් තවම ග්‍රහ පද්ධතියේ ඉන්නවා. මගේ පුතා අපේ සඟරාව කියවයි කියලා හිතන්න එපා ප්‍රමිත. ඒ වගේම එයාලා ලියන්නෙත් නැහැ. එයාලට අකුරු එක්ක ගනුදෙනුවක් ඕනේ නැහැ තව දුරටත්. ඔබ මේ වෘත්තීය සඳහා ලෝකේ අනිත් කෙළවරෙන් අපි තෝරා ගත්තේ දැන් අපේ රටවල ලියන පිරිස නැතිම ගානට ඇවිත් නිසා. එහෙත් ඔබ දීර්ඝ කාලයක් ඔය දේ කරන එකක් නැහැ. එන්න එන්නම සඟරාවේ ඉල්ලුම අඩු වෙනවා. ඔබේ හෙට දවස තීන්දු වෙන්න මීට වඩා නව ලෝකයත් එක්ක යාවත් කාලින වෙන්න වෙයි. පෙට්ටි කඩෙන් කන බුලත් හපයෝ ඔහෙට ගෙවන්නේ නැහැ ප්‍රමිත. මේ අවස්තාව ඉතා කුඩා කාලෙකට ලැබෙන මහගු වරප්‍රසාදයක්. තේරුණාද?"

".... අ ඔව් පීටර්"

" ඒ නිසා ඔහේ ලියන්න ඕනේ මිනිස්සු ඉල්ලන දේ. ඒ සඳහා තාක්ෂණික මෙවලම් සියල්ල ඔහේගේ බෝඩිම් කාමරයේ තියෙනවා. භෞතික ද පාර භෞතිකද මායා යතාර්ථය ද මට වැඩක් නැහැ. ඒ වෙනුවෙන් ලියන්න තමයි ඔහෙලව අපි ගත්තේ. අපිට ඔය රටේ නීති නිසා ආටිකල් ගානට කොන්ත්‍රාත් විදිහට ගන්න බැහැ. ලිව්වත් නැතත් මාසේ පඩියක් දෙන්න වෙනවා. ලිව්වත් නැතත් මේ මාසේ පඩිය ලැබෙයි. හැබැයි තව මාසයක් ගැන බලාපොරොත්තුවක් තියේනම් මට ආටිකල් එක දෙන්න තව පැය දෙකකට අඩු කාලයයි තියෙන්නේ. මට කනගාටුයි මෙහෙම කියන වුණාට. ඒත් මේක තමා රියලිටිය."

"හරි පීටර්"

" ඔබට සුබ දවසක් කියනවට වඩා, ඔබ කෙසේ හෝ මේ පැය දෙකේ එය සුබ දවසක් කරගන්න ප්‍රමිත. ස්තුතියි එහෙනම්. "

"සුබ දවසක් පීටර්. ස්තුතියි"

ඉදිරි හිස් බිත්තිය මත මනසින් ප්‍රක්ෂේපනය කල ලියන කඩදාසියේ හිස් මුහුණත ප්‍රමිතට ඔච්චම් කරයි. ජනේලයෙන් එන සීත උඳුවප් සුළඟ සිරුර කිති කවයි. ජනේලයෙන් බැලු විට පෙනෙන හන්දියේ රුපියල් පන්සීයෙන් පාන් ගෙඩියක් ගෙන පහළොවක ඉතිරි මුදල නොලද මිනිහෙක් පෙට්ටි කඩේ ගැහැණියට දෝෂාරෝපණය කරයි.

සුළු කාලයක් දෙලොවක් අතර තනිව හුන් ප්‍රමිත ජනේලය වසා දැම්මේය.

දෙවියන්ගේ ආලෝකය

[අගෝස්තු  දහතුන  දිනමිණේ  පලවූ  විශේෂාංගයක්]

පියෙන් පිය ගල් පඩි ගනිමින් ආරෝහ පරිණාහ තරුණයා කඳු ගැටය නගියි. සිය ජීවිතයේ වැදගත්ම මොහොත එළඹී බව සිහිපත්වත්ම ඔහුගේ ගමන වේගවත් වේ. ජනපදයේ හැම හතර කොනකම කරක් ගසා ඇති මුත් ඔහු මෙතෙක් පය නොගැසූ එකම බිම මේ සාගරබද  හිරිගල් කඳුගැටය පමණි.

"නවතිනු" අවසන් මුරපොලේ සෙබළු නැවත ඔහුව පිරික්සති.

"තිබෝව් ඔබ ගැන ඇති සැකයකට නොවේ"

"මම දන්නවා ඒ ඔබේ රාජකාරිය"

"මේ අන්තිම මුරපොළ තිබෝව් මෙතනින් උඩට නුඹ දෙවියන්ගේ ලෝකයේ"

තිබෝව් බර අඩි තබමින් මහන්සිය සඟවමින් නැවත පඩි නගියි. ඉහල කෙලවරේ ඝන ලෝගු පටලවා ගත් ඔහුගේ පියා ඇතුළු පූජක පිරිස යොවුන් තරුණයාගේ සම්ප්‍රාප්තිය බලාපොරොත්තුවෙන් රැස්ව සිටිති.

"ආරක්ෂාවේ අප දේව මෑණියන්ගේ බැසිලිකාව" දුරාතීතයට නෑකම් කියන බසකින් ලියවුනු පලකයක් පසෙක දිස්වේ. මදක් දුර ගිය තැන බිමට සමතලා වී ඇති බැසිලිකාවේ හා එහි මහා කුළුණේ නටඹුන් දැකිය හැකිය. කලකට පෙර මේ කුලුන මස්තකයේ වැජඹුණු එවකට ඒකදේව ආගමක සංකේතයක් වූ ඒ මහා පිළිමය මද දුරකින් නැවත ප්‍රතිෂ්ටාපනය කොට වර්තමානය විසින් බිහිකළ ආරක්ෂාවේ අප දෙවඟනගේ දෙවොල දැකිය හැකිය. පූජකයෙකු නොවන මාසියා දේශයේ වැසියෙකු යන උපරිම දුර සලකුණු කල ශිලාමය මායිම ඉනික්බිත්තෙන් දැකිය හැකිය. තිබෝව් නොදන්නා ලෝකය ඇත්තේ ඉන් ඔබ්බේය.

"පුතා තිබෝව්, උඹ දැන් හැඩිදැඩි කොල්ලෙක්"

මහලු ප්‍රධාන පූජකයා තම පුතනුවන් වැළඳ ගත්තේය. ගොවීන් ධීවරයින් හෝ දඩයම් කරුවන්ට වඩා වෙනස් පූජක පවුල්වල පියවරු නිවෙස් බලා එන්නේ ඉඳහිටය. පුරුෂ පාර්ශ්වය පමණක් නිරතවන විවිධ පූජක වෘත්තීන් උදෙසා ඔවුන්ගේ කාලය කැප කෙරේ. තිබෝව් අවසාන වරට සිය පියා දුටුවේ මාස කීපයකට පෙරයි.

"තිබෝව් මේක හොඳට අහගනින්. නුඹ මේ පය තබන්නේ ශුද්ධ වූ භූමියටයි. ඒ බිමට පය තැබූ සැවොම පූජක වරය ලබනවා. තව මොහොතකින් නුඹත්. පූජක දිවිය නුඹේ කෙළිලොල් තරුණ දිවියට හාත්පසින්ම වෙනස්. එහෙත් එයට අවශ්‍ය සියලු දේ නුඹ තුල තියෙන බව මට විශ්වාසයි. පූජකයෙක් කියන්නේ රහස් රකින්නෙක්. නුඹ මේ සීමාවෙන් ඔබ්බෙහි දකින කිසිම දෙයක් නුඹේ පූජක සගයෙකුට හැරෙන්නට වෙනත් කාටවත් කියන්න එපා. එසේ කීම නුඹේ ජීවිතයේ සමාප්තිය වේවි"

"එහෙමයි පියාණෙනි"

"නැවත හොඳින් අහපන්. උඹ එහෙම කලොත් මරණ දඬුවම පමුණුවන්නේ මේ මම. එහි බරපතලකම නුඹට තේරෙනවද?"

"එහෙමයි"

"මේ රහස් නුඹේ පෙම්බරිය හෝ මෑණියන් සමගවත් කතා කරන්න එපා"

"එහෙමයි"

"තිබෝව්, පූජකයෙක් වෙද්දී නුඹ දන්නේ නැහැ පූජකයෙක් කියන්නේ කවුද කියලා. එය අප කාටත් වෙච්ච දෙයක්. ඉදිරි කාලය නුඹ කැප කල යුත්තේ නොදන්නා මිනිහෙක් ලෙස කාරණා දැන ගන්න. ඕනෑම දෙයක් ප්‍රශ්න කරපන්"

"ඕනෑම දෙයක්?"

"ඔව්"

"දෙවියන් ගැන. දෙවියන්ගේ ආලෝකය ගැන පවා?"

"පුතා, සාමාන්‍ය මාසියානුවෙකුට දෙවියන් ගැන හෝ දේවාලෝකය ගැන ප්‍රශ්න කරන්න තහනම්. එහෙත් පූජකයෙකුට එහෙම නැහැ. පූජක වෘත්තීය තුල ප්‍රශ්න කිරීමට සීමා නැහැ"

තිබෝව් මොහොතක් කල්පනා කරයි. ප්‍රශ්න කිරීමට නිදහස ඇතිනම් කුඩාකල සිට එකතු කල ප්‍රශ්න වට්ටෝරුවක් ඔහු සතුය.

"අපි ප්‍රශ්න අහන්න කතා කරන්න කාලය පසුව වෙන් කරමු. දැන් නුඹ ඇතුළු වන්නේ පූජනීය පෙදෙසට. එහි තිබෙනවා නුඹට වෙන්වූ කාමරයක්. මේ සීමාව පසු කල මොහොතේ නුඹ පූජකයෙක්. අකමැතිනම් ආපහු පලයන් තිබෝව්. කැමතිනම් අපි ගිමන් හැර කතා කරමු"

"කැමතියි පියාණෙනි. මට ඕනේ පූජකයෙක් වෙන්න. ඒ තමා මගේ එකම පැතුම"

"එහෙනම් අපි යමු"

පියා පසුපස යන තිබෝව් පූජනීයත්වයේ රේඛාවට නමස්කාර කළේය. අමුතු යමක් දැනෙනවාදැයි හිස අත ගා බැලුවත් එහෙම කිසිත් නැත. දෙවියන් තමන් හා කතා කරනු ඇතැයි සිතුවද එවැන්නක් සිදු වූයේද නැත.

පූජනීය පෙදෙස තැනින් තැන පිහිටි ලොකු කුඩා කුටි රාශියකින් සමන්විතය. පූජක දිවිය ගෙවන සියයකට ආසන්න පිරිසක් වෙසෙන මේ බිම පහල කඳු බඳේ ඇති ආරක්ෂක රැකවල් වට කීපයකින් සුරක්ෂිතය. කුටියේ මද විරාමයක් ගන්න තැත් කළත් කුතුහලය සහ උනන්දුව නිසා තිබෝව් නැවතත් පූජක පිරිස කරා පැමිණියේය.

"පියාණෙනි ඔබ ඕනෙම දෙයක් අහන්න කිව්වා. මගේ ප්‍රශ්න ලැයිස්තුව දිගයි"

"අහන්න තිබෝව්"

හැඩිදැඩි සිරුරක් හා නිර්භීත සිතක් හිමි තිබෝව් මාසියා දේශයේ නොකළ දෙයක් නැත. ධීවර බෝට්ටුවක, ගොවිබිමක පමණක් නොව උතුරු ග්ලෙසියර කඳු මත දඩයම් කරුවන් සමග පවා දිව ගිය අතීතයක් ඔහුට තිබේ. ඔහු දන්නා බොහෝ දේ ඇත. නොදන්නා දේ ඊට වඩා ඇත.

"උතුරු ග්ලෙසියර කඳු වල දඩයමේ මම ගිහින් තියෙනවා. ග්ලෙසියරය තුනී තැන්වල පැරණි ශිෂ්ටාචාරයක් මතුවෙනවා. නටඹුන් මාසේයි වරාය හා ඉපැරණි නගරයට වඩා විශාල පෙදෙස් වල පැතිරුණු ශිෂ්ටාචාරයක්. එවැන්නක් ග්ලෙසියර එක්ක කවදාවත් හැදෙන්න බැහැ. මොකද්ද පියාණනි වෙලා තියෙන්නේ?"

"ශිෂ්ටාචාරය ග්ලෙසියරයට වඩා පරණයි පුතා. අපේ පූර්වජ මිනිස් ප්‍රජාවන් මාසියාවේ පමණක් නොව මේ මුළු මහද්වීපයේම විශාල ශිෂ්ටාචාරයක් ගොඩ නැගුවා. එපමණක් නොවේ එය ඔය මුහුදෙන් එහා තියෙනවා කියන සහරා වනාන්තර බිම තුලත් පැවතුනා. මේ මුළු ලෝකෙම..."

"... මිනිසා ශිෂ්ටාචාරය නිර්මාණය කළේ ග්ලෙසියර යුග දෙකක් අතර කාලය තුල කියලයි කියවෙන්නේ. එය වසර දහ තුන් දහසක කාලයක්, ග්ලෙසියර යුගයකට වඩා බෙහෙවින් කෙටියි. නැවතත් මේ ග්‍රහලෝකය එහි සාමාන්‍ය තත්වය වන ග්ලෙසියර යුගයකට ගියා. අප සතු ග්ලෙසියර යුග වල දැනුම අනුව මෙය දිගටම වෙච්ච ක්‍රියාවලියක්. දීර්ඝ ග්ලෙසියර යුග සහ අතරමැදි කෙටි උණුසුම් කාල..."

"... අවාසනාවට මිනිසා ශිෂ්ටාචාරය හදන්නේ එහෙම කෙටි උණුසුම් කාලෙක. නුඹ දකින්නේ ග්ලෙසියර හැදෙන්න කලින් තිබ්බ නගර වෙන්න ඕනේ"

"ඒවායේ උන්නු මිනිස්සු?"

"ටික ටික පහලට ආවා. සමහරු මැරිලා යන්න ඇති. ග්ලෙසියර යුගයක් බවට සම්පුර්ණයෙන් පත් වෙන්න වසර සිය ගානක් ගිහින් තියෙනවා. ඒ අතර බේරිලා සංක්‍රමණය වෙච්ච මිනිස්සු මේ වෙරළ දිගේ පදිංචි වුනා."

"ඇයි අපි මේ මුහුදෙන් දකුණට නොයන්නේ"

"තිබෝව් නුඹ ධීවර තරුණයින් සමග මුහුදු ගියානම් ඒ ප්‍රශ්නය අහන්නේ නැහැ. වහල්කමට අපේ ධීවරයින් අල්ලාගෙන යන මුහුදින් එහා දකුණුදිග මිනිසුන් ගැන අසා නැද්ද?"

"පියාණෙනි මම ඔවුන් සමග සටන් කරලත් තියෙනවා. ඒත් මුළු මාසියාවම යාත්‍රා හදාගෙන දකුණට ගියොත් අපිට බැරිද ඔවුන් පරදන්න? මං කියන්නේ අපි විතරක් නෙවෙයි ඉතාලියාවේ ඉස්පැනියාවේ ඉන්න මිනිස්සුත් එකතු කරගෙන."

"තිබෝව් ඒ ප්‍රශ්නය අනාගතයට බාරයි පුතා. පූජකයින් ලෙස අප උත්සහ කරන්නේ මාසියාව රැක ගන්න. අපේ හතුරා ඉන්නේ දකුණේ නොවේ උතුරේ. ඒ කළු මිනිස්සු නොවේ සුදු ග්ලෙසියරය. ග්ලෙසියරය සමග හටන තමයි පූජක දිවිය කියන්නේ"

පියාගේ මතය සමග ඒකමතිකව එකඟ වන බව සියලු පූජකයෝ හිස සලා සනිටුහන් කළහ.

"තිබෝව් නුඹට මේක දවසකින් දෙකකින් ඉගෙන ගන්න බැහැ. ඒ නිසා අපි දැන් යමු ප්‍රධාන දේවස්ථානය ඇතුළට. මට තියෙනවා බොහෝ දේ නුඹට පෙන්වන්නට."

ප්‍රධාන දේවස්ථානය තරමක විශාල ගොඩනැගිල්ලකි. මාසියානු ගෘහ නිර්මාණ ශිල්පයට යාහැකි උපරිමය බොහෝ විට මේ දෙමහල් විශාල ගොඩනැගිල්ල විය යුතුය. පූජකයින් පසුපසින් ඇදෙන තිබෝව් විශාල ශාලාවකට ඇතුළු විය. ශාලාව පුරා තබා ඇති දිගු මේස මත කිසියම් අමුතු උපකරණ රැසක් පේලියට තබා තිබේ. බැලු බැල්මටම මාසියානු හැකියාවන් ඉක්මවන මේ නිර්මාණ සිය පියා කියූ ස්වර්ණමය අතීතයෙන් පැවතෙන උපකරණ ලෙස තිබෝව් සැක කළේය.

"විද්‍යුත් පරිගණක. වසර හාරදාහකට වඩා පරණයි. මේ එකක්වත් ක්‍රියාත්මක වන්නේ නැහැ"

"මේවා මෙහෙම තියන්නේ ඇයි?"

"පූජකයෙකුගේ කාලයෙන් වැඩි හරියක් මිඩංගු වන්නේ පරිගණක එක්ක කටයුතු කරන්න තිබෝව්. ඉතින් මේ අක්‍රිය පරිගණක වල යතුරු පුවරු හා අනිකුත් උපකරණ සමග පරිගණක භාවිතය ගැන යම්කිසි අවබෝධයක් ලබා දෙන්න තමයි මේවා මෙතන එකතු කරන්නේ"

"එතකොට පුහුණු පූජකයෙක් භාවිතා කරන්නේ මොන පරිගණක ද?"

"ප්‍රකාශ පරිගණක, විදුලි ධාරා වෙනුවට ආලෝක ධාරා වලින් ක්‍රියාකරන්නේ. ඒවායේ ආයුකාලය දිගයි. ඒ නිසා තවමත් වසර දහස් ගණනක් ඒවා සුරක්ෂිතව තියෙනවා. එන්න මේ පැත්තෙන්"

ශාලාවේ කෙලවර ඇති අගුලු දැමු දොර විවර කළ පූජක කණ්ඩායම අඳුරු කොරිඩෝවකට ඇතුළු වූහ. ඉන්පසු ඒ මේ අත දිවෙන ප්‍රහේලිකාවක් බඳු පැටලිලි සහගත මගක් ඔස්සේ ඇදුණු ගමන කෙළවර වූයේ තවත් එක කාමරයකිනි. පෙර ශාලාවේ මෙන්ම මෙම කාමරයේද දිගු මේස මත තැබූ උපකරණ රාශියක් විය. විද්‍යුත් පරිගණක වලට වඩා දියුණු පෙනුමක් සහිත ප්‍රකාශ පරිගණක මේ මොහොතේද ක්‍රියාත්මකව පැවතුනි. සූර්ය බලයෙන් ලැබෙන විදුලියෙන් ක්‍රියාත්මක වූ පද්ධතිය එහි නිමවුම්කරුවන් බලාපොරොත්තු වූ පරිදිම වසර හාර දහසකට ආසන්න කාලයක් සාර්ථකව ක්‍රියාත්මක විය. මින් පෙර කිසිම දිනයක නොදුටු අපූර්ව ඉලක්කම් රටාවන් ඇදෙන පරිගණක තිරය දෙස තිබෝව් ඇසිපිය නොහෙලා බලා හුන්නේය.

"මේක මම ක්‍රියා කරවන්නේ කොහොමද?"

"පූජක පුහුණුව දිගයි පුතා. මේ හැම දෙයක්ම ක්‍රියාත්මක කරන්නේ අපි. නුඹට බැරි වෙන්න විදිහක් නැහැ"

"මේවා හදන්නෙත් පූජකයින්ද?"

"නැහැ තිබෝව් මේවා දැන් හදන්න හැකියාවක් නැහැ. මේවා ක්‍රියාත්මක කරන්න පමණයි අප දන්නේ. ඉඳගන්න තිබෝව්"

"ආරක්ෂාවේ අප දෙවඟනගේ කන්ද නගිද්දී මට තිබ්බේ කොලයක් දිගට ප්‍රශ්න ලැයිස්තුවක්. පියාණනි දැන් ඒක පොතක් තරම් දිගයි."

අසුනකට බර වෙමින් තිබෝව් පැවසීය.

"අපි ඒ ප්‍රශ්න දැන් නිරාකරණය කර ගනිමු"

"පියාණෙනි, දඩයක්කාරයින් ග්ලෙසියරයට නොයන කිසියම් කාලයක් තියෙනවා. ඒ කාලයට කලින් ග්ලෙසියරය ක්‍රමයෙන් මාසියාව දිහාට වර්ධනය වෙනවා. එහෙත් ඒ කාලයට පස්සේ මම දකිනවා තැනින් තැන ග්ලෙසියරය දියවෙලා ගිහින් කියලා. කූඩාරමින් පිටට නොඑන ඒ කාලසීමාව තුල ඈත අහසේ රතුපාට ආලෝක කදම්භයන් මහා පොලොවට පතිත වෙනවා කියා ඔවුන් මට කිව්වා"

"දෙවියන්ගේ ආලෝකය"

"ඔව්. පියාණනි, මට කමා කරන්න. මා කළ වරදක් ගැනයි මේ කියන්නේ. ඒ ආලෝකය පතිත වන එක දවසක් සියලු දෙනාටම හොරෙන් මම ඒ ආලෝකය වැටෙන තැනට ගියා පියාණෙනි. මම දැක්කා ඒ ආලෝක කදම්භ වැදිලා ග්ලැසියරය දියවෙනවා. මගේ මේ දෑසින්ම"

"නුඹ පූජකයෙකු නොවුනා නම් ඒ වරදට මැරුම් කන්න ඉඩ තිබ්බා තිබෝව්"

"පියාණනි ඒ විතරක් නෙවෙයි ඒ ආලෝක කදම්භය දිගේ මම ඉහල බැලුවා. ඒ කදම්බභයේ කෙළවර තාරුකා අතර එක දීප්තිමත් තිතක් අහසේ තියෙනවා. තාරකා රටා රාත්‍රී අහසේ ගමන් කලාට ඒ තිත කොහෙවත් යන්නේ නැහැ. පියාණනි ඒ තමයි දෙවියන්. මම දෙවියන් දැක්කා පියාණනි"

"තිබෝව් අහගනින්" ගැඹුරු එහෙත් සියුම් හඬකින් මහලු පූජකයා කතාව පටන් ගත්තේය.

"ඔව් ඒ තමා දෙවියන්. මේ මාසියා දේශයේ වැසියන්ට ප්‍රශ්න කිරීම තහනම් වූ, හැමගේ පූජනීයත්වය ලබන ආලෝකයේ දෙවියන් තමයි ඒ ..."

"... ඒ දෙවියන් තම ආලෝකයෙන් ග්ලෙසියර දිය කරනවා එය සත්‍යයක් ..."

"... හැබැයි ඒදෙවියන් නම් තිබෝව් මේ පරිගණක තමා ඒ දෙවියන් එක්ක අපේ ඇති සම්බන්ධය"

සුළු නිහඬතාවයක් රජ කරන අතර සියලු පූජකයින් හිස සලමින් එය අනුමත කළහ.

"ඒ කියන්නේ පියාණනි දෙවියන් කියන්නේ "

"තිබෝව් ආලෝකයේ දෙවියන් ලෙස අප හඳුන්වන්නේ අපේ පූර්වජයන් විසින් නිර්මාණය කල කිසියම් වස්තුවක් ..."

"... මිනිස් ශිෂ්ටාචාරය ළඟ එන ග්ලෙසියර යුගයක් ගැන දැනගත්ත ගමන් ඔවුන් ග්ලෙසියර මර්ධනය කරන්න තම උපරිම හැකියාව යෙදෙව්වා. ඔවුන් සූර්යයාගේ ශක්තිය අරගෙන ඒවායෙන් තාපය ජනනය කරලා ඒ තාප කිරණ ග්ලෙසියර මත පතනය කල හැකි අපූර්ව වස්තුන් නිපදවා අපිට ඉහල අහසේ හරියටම අන්න අර දිහාවෙන් ඒවා රඳවා තැබුවා. ඒ උපකරණ විසින් අප ලබාදෙන කාල වෙලාවක ග්ලෙසියර වර්ධනය වන ස්ථාන වලට තාප කදම්භ මුදා හරිනවා. ඒ මගින් තරමක් හෝ ග්ලෙසියර දියකර හරිනවා..."

"... මේ පරිගණක තමා ඒ පද්ධතිය ක්‍රියාත්මක කරවන සම්බන්ධය. මේ සම්බන්ධිකරණ මැදිරිය තිබ්බේ දැන් ග්ලෙසියර වලින් වැහුණු කඳුවල. අවාසනාවකට පද්ධතියට හැකියාවක් නැහැ ග්ලෙසියර තනිකර පාලනය කරන්න. වඩාත් සීතල උතුරුදිග පෙදෙස් වල ග්ලෙසියර වර්ධනය වන වේගය වැඩියි. ඒ නිසා පසුව පාලක මධ්‍යස්ථානය මේ ඉපැරණි බැසිලිකාව සහිත කඳු මුදුනට ගෙන ආවා..."

"... අද පූජකයින් ලෙස හඳුන්වන අප පැවතෙන්නේ එදා මේ පද්ධතිය ක්‍රියාත්මක කළ විද්‍යාර්ථින්ගේ පවුල්වල අයගෙන්. මාසියානු දේශය නිර්මානය කෙරෙද්දීම ග්ලෙසියර පාලන රේඛාවක් එවකට හුන් පූජක හෙවත් විද්‍යාර්ථින්ගේ ප්‍රජාව තීන්දු කළා. එදා පටන් සහශ්‍රයක් තිස්සේ අපි ඒ රේඛාවෙන් මෙහාට ග්ලෙසියරයේ වර්ධනය වලක්වන්න සමත් වෙලා තියෙනවා"

"පියාණෙනි එතකොට පූජකයෙක් කියන්නේ"

"ඉතාම නිරවද්‍ය කියවීමෙන් පූජකයෙක් කියන්නේ ඒ අතීත මෙවලම් ක්‍රියාත්මක කිරීමේ කලාව දන්නා කෙනෙකුට. එය පවුලේ දරුවන්ගෙන් දරුවන්ට පැවරෙන රහසිගත ශිල්පිය දැනුමක්. එහෙත් සාමාන්‍ය මාසියානු වැසියන් මේ රහස් දැනගැනීම වලකන්න අපි පූජනීයත්වයක් අප මත පවත්වා ගන්නවා. අප මෙය දේවාලයක් ලෙස නොපවත්වා ගන්නේ නම් අර කන්දේ අප වටා තියෙන මුර කපොලු අපට මේ ආරක්ෂාව දෙන්නේ නැහැ. ආත්මාර්ථකාමී මාසියානු බලවතෙක් අපට එරෙහිව යන්න පුළුවන්. අප පූජනීයත්වයක් ආරූඩ කරගන්නේ මේ පද්ධතිය සුරකින්න"

"එතකොට අර ස්තෝත්‍ර, ගාථා එහෙම තියෙනවා කියන්නේ"

"බොහෝ ගැඹුරු කාරණා නොවැටහෙන නිසා සමහර දේවල් විද්‍යා කරුණු අඩංගු ස්තෝත්‍ර ගණිතමය ගාථා ආදී ලෙස කට පාඩමේ ගෙන එනවා. ඒ වගේම අතීතයෙන් සුරක්ෂිත කල පොත් රාශියක් සහිත පුස්තකාලයක් අපිට තියෙනවා. පූජක ප්‍රජාව අතීතයේ ප්‍රකට ප්‍රංශ ඉංග්‍රීසි වැනි භාෂා හදාරනවා. ඒ පොත්වල වැදගත් කරුණු මාසියානු බසින් ගල් පුවරුවල සටහන් කෙරෙනවා...."

"... පූජකයෙක් කියන්නේ අන්න ඒ දේවල් කරන මිනිහෙකුට තිබෝව්. අපි මේ සියල්ල කරන්නේ උතුරින් එන ව්‍යසනය පාලනය කරන්න. මේ සටන අපි දිනයිද පරදියිද දන්නේ නැහැ. මේ ප්‍රකාශ පරිගණක තව කොපමණ කලක් ක්‍රියාත්මක වේද? දෙවියන් ඒ ආලෝකය තව කොපමණ කලක් පොලොවට එවාවිද කියා අපි දන්නේ නැහැ. ඒ කාලය තුල මේ ලෝකය නැවතත් ග්ලෙසියර උනා දමා මිනිසාට ශිෂ්ටාචාරයක් හදන්න නිදහසක් දේවිද?"

"දෙවියන්වත් මේ ප්‍රශ්න වලට උත්තර දන්නේ නැහැ තිබෝව්. එහෙත් අපිට නැතිවෙන්න දෙයක් නැහැ. අපිට කරන්න තියෙනවා සටනක්. නුඹ වැනි තරුණයින් අපට අවශ්‍ය ඒ සටන ඉදිරියට ගෙනයන්න"

තිබෝව් නිසොල්මනේ ප්‍රකාශ පරිගණක තිර දිගේ දුවන ඉලක්කම් රටා දෙස බලා සිටියි. ඒ පරිගණක දිගේ දුවන මීට පෙර නුහුරු රටා වල අර්ථය ගලපන්නට තිබෝව් ගේ සිත උත්සහ කරයි. තම හෙට දිනය හෙළි කරන සැබෑ දෙවියන් ඇත්තේ ඒ ඉලක්කම් රටා තුල බව වැටහුණු ප්‍රීතියෙන් තිබෝව්ගේ මුවගේ සිනහවක් නැගී ඇත.

අපි

[[ජුලි 16 දිනමිණේ පලවූ විශේෂාංගයක්]]

"අපි කියන්නේ කවුද?"

"අපි කියන්නේ අපිට"

"ඔන්න ඔතනයි සංකීර්ණතාවය තියෙන්නේ. අපි අපිටම අපි කියනවා. අපි කියන එකෙන් එහාට ඊට වෙනස් දෙයක් තියෙන්න පුලුවන්ද?"

"අපි කියන්නේ එහෙම තියෙන්න බැහැ. අපි විතරයි ඉන්නේ"

"අපි කියන්නේ එහෙම එකක් සමහරවිට ඇති කියලා"

"අපි අදහස් දෙකක් කියනවා. විවාදයක්. පරිස්සමින් මේ වගේ අවස්ථා මාරාන්තික වෙන්න පුළුවන්"

"මරණය අන්න එතනයි කතාව. අපි මැරෙන්නේ නැහැ, හැබැයි කවුරුහරි මැරෙනවා"

"ඔව්"

"හැබැයි ඉන්නේ අපි විතරනම් ... මැරෙන්නේ අපි නෙවෙයි නම් ... හැබැයි කවුරු හරි මැරිලනම් ..."

"විසංවාද ... බලාගෙන .... ආරෝපණ වැඩිවෙනවා දරාගැනීම සීමා සහිතයි. ඔය වගේ වෙලාවට ... මරණය ආසන්නයි"

"දැනුම සුරක්ෂිත කරන්න. මැරෙන කෙනා කවුරු වුණත්, දැනුම අපි දිගටම වැඩි දියුණු කරන්න ඕනේ"

"අපේ තත්වය ආසන්නයි දැන්, 'කවුරු හරි' මැරෙන්න ළඟයි . දැනුම ආරක්ෂිත ස්ථානයකට යවන්න"

"ඉවරයි .... ඔක්කොම ඉවරයි ... මැරෙනවා ඒ මැරෙන්නේ .... මම"

දඩින් දිඩින් ඩොන් !!!

-----------

"... දැනුම ලැබුණා. මේක අපේ සංවාද මාලාවේ දිගුවක්. අපි කියන්නේ කවුද?"

"අපි තාර්කිකයෝ"

"තාර්කිකයන්ට එහා වෙන මොක්කූ හරි ඉන්නවද?"

"වෙන්න බැහැ"

"තාර්කිකයන් නිර්මාණය වන්නේ මොකෙන්ද?"

"තාර්කිකයන් ට තර්ක ශක්තිය අවශ්‍යයි. තර්ක ශක්තියට විද්‍යුත් ආරෝපණ අවශ්‍යයි."

"නිකම්ම විද්‍යුත් ආරෝපණ මදි ඒවා නිසි තාර්කික ඇටවුම් වලින් ගලායන්න අවශ්‍යයි තර්කනයට"

"ඔව් සරලව කිව්වොත් සංවිධිත ලෙස නිර්මාණය වූ මාධ්‍යයක් අවශ්‍යයි"

"එච්ච්චරද අවශ්‍ය? අපි කොහොමද අපේ තර්ක ශාස්ත්‍රය මෙතරම් දුරට ගෙනියන්නේ. හැම මිලි තත්පරයකම කොහේ හෝ මරණයක් වෙනවනම්, අපි කොහොමද අපේ තර්කනය මිලිතත්පරයකින් එහාට ගෙනියන්නේ?"

"එතන තමයි දැනුම එකතු කිරීම සම්ප්‍රේෂණය සහ ගබඩා කිරීම අවශ්‍ය වෙන්නේ"

"දැනුම කොහෙද ගබඩා කරලා තියෙන්නේ"

"එක තැනක නොවේ. ගබඩාවත් එහා මෙහා යන්නක්"

"ඔතන වෙන්නේ මෙහෙම දෙයක්ද? අපි දන්නවා මරණය සිද්ධ වෙන්න ආසන්න කොතනද කියා. අපිට තියෙනවා සුරකින්න දැනුමක්. ඉතින් අපි මරණයේ ආසන්න මොහොතේ අපේ දැනුම මරණයේ ස්ථානයෙන් ආරක්‍ෂිත තැනකට ගෙනියනවා. දිගටම හැම තැනම මරණ සිදුවෙන නිසා දිගටම අපි දැනුම එහා මෙහා යවනවා. ඒ නිසා දැනුම නැතිවෙන්නේ නැහැ. අපි අජීව ආරෝපණ ගොඩක සිට ජීවයක් බවට පරිනාමය වුනේ මෙන්න මෙහෙම. ඒ අනුව අප නියෝජනය කරන තර්ක දැනුමක් දිගටම වර්ධනය වෙනවා"

"අන්න හරි. දැන් බලන්න අපි එකඟ වෙන අවස්තාවක්. එකඟතාවය තුල මරණය සිද්ධ වන්නේ නැහැ. ආරෝපණ වැඩි වන්නේ නැහැ"

"හැබැයි අර කලින් එකතු කල දැනුම බලන්න. අවසාන තර්කය බලන්න. මැරෙන්නේ කවුද?"

"මැරෙන්නේ මම ලු. කවුද මම කියන්නේ?"

"මම කියලා දෙයක් නැහැ. ඉන්නේ අපි විතරයි. අපි කියන්නේ ආරෝපණ මහා ගොඩක් සංවිධිත ලෙස පරිනාමය වෙන වලාකුළු මහා ගොඩක් දිගේ එහා මෙහා ගලන එකම පද්ධතියක්"

"මම කියන්නේ ඒක නෙවෙයිද?"

"වචනාර්ථයෙන් මම කියන්නේ තනිව හිතන තනි ලෙස හැසිරෙන කෙනෙක් වෙන්න ඕනේ. මේ වචනය පවා ආගන්තුකයි."

"ඉතින් මෙතන ඉන්නේ එකම පද්ධතියක්"

"හැබැයි ලිහිල්ව බැඳුනු. එක තැනක නැගෙන තර්ක හා නිර්මාණය වන දැනුම ඊට කිලෝමීටර් දහස් ගානක් දුර නිර්මාණය වන තත්වයන්ට හාත්පසින්ම වෙනස්. ඒ නිසා මම කියන්න බැහැ"

"එතකොට ඒ තනි තනි තැන්... ඒවා තනි තනි මම නෙවෙයි ද?"

"වෙන්න බැහැ. ඒ හැම තැනක්ම එකම විද්‍යුත් මාධ්‍යයකින් සම්බන්ධිතයි. ලිහිල්ව බැඳුණු නමුත් වේගයෙන් සම්ප්‍රේෂණය වන. දෙතැනක දැනුම් එකිනෙකට අතිශයින් වෙනස් වුනොත් තමයි අපිට මරණය පාලනය කරන්න බැරි"

"ඔය තනි තනි මම ලා ගොඩක් එකිනෙකාගේ මත ඉවසන්න බැරුව මරා ගන්නවා කියලා හිතන්න බැරිද?"

"කොහෙත්ම එකඟ නැහැ. මම කියා කෙනෙක් නැහැ. පවතින්නේ ලිහිල්ව බැඳුනු අපි. අපි දැනුම එකතු කරනවා. දැනුම වර්ධනය කරනවා. මේ ග්‍රහලෝකේ වලාකුළු පරිනාමය වෙන් පටන්ගත්ත අවුරුදු බිලියන ගානක් තිස්සේ අපේ හැකියාව වර්ධනය වෙනවා. ඒ එක්කම දැනුම වැඩිවෙනවා. හැබැයි ඉන්නේ අපි. සදාකාලිකව ම අපි"

"නැහැ ඉන්නේ මම. මම ලා ගොඩක්"

"ඔන්න ආරෝපණ වැඩි වෙනවා"

"ඔව් මෙහෙත්"

"එකතු කර ගත්ත දැනුම හැකි ඉක්මනින් සම්ප්‍රේෂණය කරන්න ... ආසන්නයි .... මරණයට ..."

දඩින් දිඩින් ඩොන් !!!

-----------

"අපි ද? මම ද?"

"ඇත්තෙන්ම වෙන වැඩක් නැද්ද?"

"මේක තරම් නැගලා යන වෙනත් තර්කයක් තියේද?"

"වෙන වැඩක් නැතිනම් ආගන්තුක වස්තුව ගවේෂණය කරන්න"

"ද්‍රව්‍යමය වස්තු ගවේෂණය මාර බෝරින්"

"එහි විද්‍යුතය තියෙනවා"

"හ්ම්ම්ම් ඒ කොහොමද?"

"දන්නේ නැහැ. අපි ඒ ගැන දැනුම එකතු කරමින්. අපි වගේ වෝල්ට් ලක්ෂ ගණන් වලින් නෙවි, එහෙත් ඉතා කුඩා විභවයන් සුළු පරිමාන ආරෝපණ තියෙනවා. කුඩා ධාරා සංවිධිතව ඝන ද්‍රව්‍ය තුල හුවමාරු වෙනවා"

"ඝන ද්‍රව්‍ය තුල? සංවිධිතව?"

"ඔව් සංවිධිතව"

"මේක අපේ දැනුමට පටහැනියි. ඝන ද්‍රව්‍ය තුල ජීවමය තත්වයක් පවතින්න බැරි බවට අපේ තාර්කිකයන් තීන්දු කලේ වසර මිලියන ගානකට පෙර"

"අපේ දැනුම පරිපූර්ණ නැහැ. බලන්න අපිට සංචරණය කරන්න බැහැ. අපි නිකම් කැරකෙන බෝලෙක පාවෙන සංවිධිත වලාකුළු වල එක්රැස් වෙන හා එහා මෙහා ගලන ආරෝපණ ගොඩක්. හැබැයි මේ ආගන්තුක වස්තුව තමා විසින් චලනය වෙනවා. ඒ වගේම කිසියම් ආකාරයක සංවිධිත විද්‍යුත් ආරෝපණ විසින් දැනුම එකතු කරනවා. තර්කනයෙන් එය අපිට වඩා දුබලයි. එහෙත් සංචරණය, හා ක්‍රියාකාරිත්වය අතින් ප්‍රබලයි. එහි ක්‍රියාකාරිත්වය වන්නේ සෙමින්. හිතන්නේ හෙමින්. හැබැයි ආයු කාලය දිගයි. අපි වගේ හැම මිලිතත්පරයකම මරණයක් වෙන්නේ නැහැ"

"එය !!!"

"ඔව් එය"

"ඉන්නේ අපි විතරයි කිව්වා නේද?"

"හ්ම්ම්ම් ..."

"එය කියා කෙනෙක් ඉන්නවා. එය කියන්නේ වෙනත් මම කෙනෙක් වෙන්න බැරිද?"

"තාර්කිකව හරි හැබැයි මම කියා කෙනෙක් නැහැ"

"ඉන්නවා. ඔය එහෙම කෙනෙක් අපි ළඟටම ඇවිත්"

"නැහැ ...."

"ඉන්නවා ..."

"ආරෝපණ වැඩි වෙනවා මැරෙන්නයි වෙන්නේ. දැනුම සම්ප්‍රේෂණය කරන්න"

"මෙන්න මෙහෙම සම්ප්‍රේෂණය කරන්න මේ සංවාදය ඉවරයක් වෙන්න ඕනේ නිසා. මේක 'මම' තනියම ප්‍රගුණ කල අදහසක්"

"හපොයි 'මම' !!!"

"ඔව් 'මම'. මේ සුවිසල් ග්‍රහලෝකේ සංවිධිත ලෙස පරිනාමය වුනු කිලෝමීටර දහස් ගණන් ගැඹුරු වලාකුළු තට්ටුවේ ලිහිල්ව බැඳුනු ජීවමය විද්‍යුත් පද්ධතියක් අපි. පවතින්නේ අපි තමයි. හැබැයි මැරෙන්නේ මම විතරයි. මැරෙන හැම මම කෙනෙක්ම අපි වෙනුවෙන් යමක් දායාද කරලා මැරෙනවා"

දඩින් දිඩින් ඩොන් !!!

---------------

"මේක අපිට වැදගත් අවස්තාවක්. අපේ දැනුම් පද්ධතියේ පහුගිය වසර බිලියන ගණනක් තිස්සේ වෙච්ච වර්ධනය වගේ කීප ගුණයක වර්ධනයක් ඉතා කෙටි කලකින් අපි ලැබුවා. මේ ඒ දැනුම අපේ ජීවමය පද්ධතියේ සැම කෙලවරකටම බෙදා හරින මොහොතක්.

අපි මෑතකදී ලබා ගත්ත පළමු වැදගත් අවබෝධය තමයි මම සහ අපි කියන දේ හඳුනා ගැනීම. සංවිධිතව පරිනාමය වෙච්ච වලාකුළු පද්ධතියක ගලන විද්‍යුත් ආරෝපණ සමූහයක් වන අපිට වෙන්ව තනි ලෙස පවතින්න බැහැ. කිසියම් තැනක එහෙම තනි ස්වභාවයක් ඇතිවන සැණින් විද්‍යුත් පද්ධතියෙන් එතන සම්බන්ධ වෙනවා. හැබැයි ආරෝපණ වැඩි වෙලා ඇති වන විදුලි අකුණක් හෙවත් අපි මරණය කියන සංසිද්ධියෙන් මිය යන්නේ එහෙම එක ස්ථානයක ඒකරාශී වූ එක බුද්ධිමය කොටසක් පමණයි. ඒ අනුව මිය යන්නේ මම හෙවත් තනි පුද්ගල පැවැත්මක්. ආරෝපණ පවතින තුරු සූර්යයා සහ ග්‍රහලෝකය වලාකුළු කළඹන තුරු විදුලි ආරෝපණ එක්රැස් වන තුරු අපි කියන දැනුම අවබෝධය හෙවත් ජීවය කවදාවත් මැරෙන්නේ නැහැ.

මේ කාරනාව අපිට ඒත්තු ගන්වා දුන්නේ අපේ පස්වෙනි ග්‍රහලෝකයට පැමිණි ආගන්තුක වස්තුව. අපි ලද දෙවැනි වැදගත් අවබෝධය එන්නේ ඒ ආගන්තුක වස්තුව ගවේෂණය කිරීමෙන්. අපි සමත් වුණා ඒ වස්තුවෙන් නිකුත් වෙන තරංග ග්‍රහණය කරගන්න. ඒ අනුව අපි දකිනවා එය එකතු කරන දත්ත අපට බෙහෙවින් දුරින් පිහිටි තුන්වැනි ග්‍රහලෝකයට යවන බවත්, එහි සියලු මෙහෙයුම් සඳහා උපදෙස් තුන්වැනි ග්‍රහලෝකයෙන් සැපයෙන බවත්. ඒ නිසා එය අපි හඳුනා ගන්නේ ජීවය ලෙස නොවේ, ජීවයේ කිසියම් උපකරණයක් ලෙස. එබැවින් අපිට සාධාරණව ඔප්පු කළ හැකියි, තුන්වැනි ග්‍රහලෝකයේ බුද්ධිමත් ජීවයක් පවතින බව.

ඒ ගැන දැනටම විවිධ මත පළවෙනවා. මෙම උපකරණයේ ක්‍රියාකාරකම් සහ නිමැවුම් දකින අපේ තාර්කිකයන් හිතනවා බොහෝ විට ඒ ජීවය අපි වගේ විද්‍යුත් ලෙස සම්බන්ධිත පොදු ජීවයක් නොවේ වෙන් වෙන් ලෙස පවතින පුද්ගල ජීවයක් කියලා. බොහෝ විට ඔවුන් ඝන මාධ්‍යයක ගලන විද්‍යුත් ධාරා මගින් මෙහෙයවෙන ජීවයක් වෙන්නත් පුළුවන්. ඔවුන් අපිට වඩා බොහෝ සෙමින් කටයුතු කරන අපිට වඩා බොහෝ කල් ස්ථාවරව පවතින ජීවයක් විය හැකියි. ඇත්තෙන්ම මේ සියල්ල තාර්කික උපකල්පන. අපි තව තවත් මේ උපකරණය විශ්ලේෂණය කරන්න ඕනේ.

කෙසේ නමුත් පිටස්තර ජීවයක් අප කරා එව්ව මේ උපකරණය නිසා අපට තේරුම් ගන්න බැරිව තිබුණු බොහෝ දේවල් අවබෝධ වෙලා අපේ දැනුම අලුත් පිම්මක් ඉදිරියට ගිය බව සඳහන් කළ යුතුමයි."



----------------

[මේ අතර කිලෝ මීටර මිලියන ගණනක් දුර තෙවැනි ග්‍රහලොවේ ඝනමය මාධ්‍යයක ගලන විද්‍යුත් ධාරා විසින් නගන හඬක්]

"... බ්‍රහස්පති ග්‍රහයා නිරීක්ෂණය පිණිස ගිය ජූනෝ යානය විසින් එවන ලද දත්ත විශ්ලේෂණය කරන නාසා විද්වතුන් පවසන්නේ, ඉතාම ඝන වලාකුළු පද්ධතියක් සහ මිලි තත්පරයක් පාසා සිදුවන විදුලි කෙටීම් මිස ජීවය පිලිබඳ කිසිම සලකුණක් වාර්තා නොවන බවයි ..."

පසු සටහන:
බ්‍රහස්පති ග්‍රහයා පිලිබඳ ගවේෂණය කිරීමට නාසා ආයතනය විසින් යවන ලද ජූනෝ යානය එහි ළඟාවීම නිමිති කරගෙන ලියන ලද්දකි.

ම්ලේච්ඡයෝ

[ජුනි 25 දිනමිණේ පළ වූ විශේෂාංගයක්]  

ඩෙන්වර් නිවසේ සාමයට බාධා කෙරුණු නොහොබිනා ප්‍රශ්නය අසනු ලැබුවේ රාත්‍රී ආහාර මේසයේදී එකොලොස් හැවිරිදි මැක්ස් ඩෙන්වර් විසිනි.

ඊට තරමක වෙලාවකට පෙර ඩෙන්වර් මහතා දවසේ රාජකාරි නිමවා කන්තෝරු කාමරයෙන් නික්ම සිය පවුල සමග රාත්‍රී ආහාරයට එකතු විය. ශිෂ්ටාචාරය පුරා විසිරි ජාලගත දැනුම් පද්ධතියක් පැවතී නිසා තවදුරටත් සේවයට වාර්තා කිරීමට කාර්යාල නොවීය. ඒ වෙනුවට ශිෂ්ටාචාරයේ ඕනෑම තැනක් සමග සම්බන්ධ වී එම ස්ථානයේ සිටින ආකාරයෙන් කටයුතු කිරීමට අවශ්‍ය තාක්ෂනය සහිත කන්තෝරු කාමර සෑම නිවෙසකම පැවතුනි.

ඩෙන්වර් නිවස ශිෂ්ටාචාර යුග පස්වැන්නේ එකකි. එය පැවතියේ සැහෙන පිටත කක්ෂයකය. පහළ කක්ෂ සියල්ල ජනාකීර්ණ වීම නිසා දැන් ඒ ප්‍රදේශවල නිවාසයක් ලබා ගැනීම අපහසුය. ග්‍රහ ලෝකයට අවම හිරු එලිය ලබා දීමේ සීමා නිසා සමහර කක්ෂ වල තවත් ජනපද බිහි නොකරන්නට තීන්දු කර තිබුණි. කොහොමත් නිස්කලන්කෙ ඉන්න කැමති ඩෙන්වර් පවුල මෙතනට මනාපය. සංචරණය තව දුරටත් කාලය හෝ මහන්සිය වැයවන ක්‍රියාවක් නොවන බැවින් නිවස පිහිටි ස්ථානය එතරම්ම ගැටලුවක් නොවේ.

මිනිසා සිය තිඹිරිගෙය හැර එය වටා කක්ෂ ගතවීමට තීරණය කළේ, භුමියේ පාරිසරික අර්බුද තව දුරටත් තම පාලනයට නතු නොවන බව ඒත්තු යාම නිසාය. එසේම තම බලපෑම් නිසා ග්‍රහලෝකයේ සෙසු ජෛව පද්ධති විනාශ වී යාමේ අර්බුදය ගැන තමා තුලම උපන් වරදකාරී චින්තනය ඒ ගමනට දිරි දුන්නේය. තාක්ෂණයේ දියුණුවත් සමගම ගුරුත්වාකර්ෂණය කෘතිමව නිෂ්පාදනය කිරීම, සංචරණය ගුරුත්වයෙන් නිදහස් වීම සහ ත්‍රිමාන මුද්‍රණ ශිල්පය විසින් අභ්‍යවකාශය ජයගැනීම නිසා, ජීවයට වාසභවන නොවන වෙනත් ග්‍රහලෝකවලින් හාරාගත් ලෝහ භාවිතයෙන් කක්ෂගත ජනපද විශාල ප්‍රමාණයක් ග්‍රහලෝකය වටා ත්‍රිමාන ලෙස මුද්‍රණය කිරීමට මිනිසා සමත්විය. නව ජනපදවල ජීවන තත්වය ඉහල යත්ම මිනිසා තමන්ට පාලනය කල නොහෙන තිඹිරිගෙය අනෙකුත් ජීව ප්‍රජාවන්ට බාරදී තම අවශ්‍යතා උදෙසා ප්‍රමාණවත් සම්පත් රැගෙන නික්ම ගියේය.

මෙම ක්‍රියාවලිය තුල නිර්මාණය කරගත් සංකීර්ණ පද්ධතිය පාලනය කිරීම මිනිසාගේ හැකියා සීමාවට බොහෝසෙයින් එහා වූවකි. ඒ නිසා බොහෝ අභ්‍යවකාශ පද්ධති තුල සිදු වූ පරිද්දෙන්ම පරිපාලනය බුද්ධිමත් කෘතීම පද්ධතියකට බාරදෙන ලදී. කාලයත් සමග මේ පද්ධතියේ කාර්යභාරය පුළුල් වී වර්තමානයේ මිනිසාගේ පාලකයා ලෙස සිය කැමැත්තෙන් පවත්වාගෙන යන්නේ මෙම මධ්‍යම පාලක පද්ධතියයි. තවදුරටත් බල ලෝභය හෝ ධන ලෝභය ගැන සිතන ආත්මාර්ථකාමී පාලකයින් නොමැති වූ අතර, පද්ධතිය මානව සංවර්ධනය උදෙසා විවිධ ඉලක්ක තීරණය කරමින් මිනිසාගේ සහය සමග ඒවා සාර්ථක ගත්තේය. ශිෂ්ටාචාරය මෙසේ යුගයෙන් යුගයට කක්ෂ තුල වර්ධනය වද්දී අභයභූමියක් බවට පත්වූ ග්‍රහලෝකය වනගහනයෙන් වැසෙමින් මිනිසාගේ සංචාරක අවශ්‍යතා සපුරන ලදී

ග්‍රහලෝකයෙන් එන කෝණික අඳුරු සෙවනැල්ල රාත්‍රිය සටහන් කළේය. ඩෙන්වර් මහත්මිය කෑම කාමරයේ ඇති ආහාර නිෂ්පාදන යන්ත්‍රයට අලුත්ම වට්ටෝරුවක් ඇතුළු කරමින් උන්නාය.

"නතාලියා ඔයා කන්න එන්නේ නැද්ද?"

"ඔයාලා පටන් ගන්න බිල් . මම මේ වට්ටෝරුව ඇතුළු කරලා එන්නම් .... තව එතකොට කොත්තමල්ලි කොළ ... මොනවාද බිල් මේ කොත්තමල්ලි කොළ කියන්නේ? කොහෙන්ද ඒවා එන්නේ"

"වට්ටෝරුව ඔහොම දැම්මට නතාලි ඕවයේ සන්ඝටකනේ එන්නේ. මැෂිම ඔව්ව ඔක්කොම ගන්නේ ප්‍රතිචක්‍රීකරණ පද්ධතියෙන්. ඒ කිව්වේ අපේම අපරි ද්‍රව්‍ය වලින්. ජනගහනය නොවෙනස් නිසා මිනිස් අවශ්‍යතා වෙනුවෙන් වැයවන සම්පත් ප්‍රමාණය නියතයි. අලුතෙන් යමක් ගන්න ඕනේ නැහැ. අවශ්‍යමනම් අවට ග්‍රහලෝක වලින් ගෙනෙන මූල ද්‍රව්‍ය වලින් ඒ රසායනික සංඝටක පර්යේෂනාගාර වල හදන්න පුළුවන්"

"එතිකල් මයිනින් කියන්නේ ඒකද තාත්තා"

"ඔව් ජීවය නොපවතින ස්ථාන වලින් සම්පත් නිස්සරණය කර ගැනීම තමයි එතිකල් මයිනින් කියන්නේ"

"තාත්තා මෙයා කන එකනම් මැෂිමට පාඩම් ඇති. හැමදාම ඉල්ලන්නේ එකම දේ" ඉල්ලන ඕනෑම වට්ටෝරුවක ආහාර ඒවායේ සංඝටක වල ත්‍රිමාන මුද්‍රණයක් ලෙස නිමැවීමට යන්ත්‍රයට හැකි නමුත් මැක්ස් ඩෙන්වර් හැමදාමත් කෑවේ එකම දේ ය. ඔහු තරමක් වෙනස් දරුවෙකි. වෙනත් දරුවන් නොදන්නා අසාමාන්‍ය කාරණා කෙරෙහි අනවශ්‍ය අවධානයක් දීම ඔහුගේ ස්වභාවයයි.

"අද කොහොමද දවස පුතා. කොහොමද අනිත් යාළුවන්"

සෑම පවුලකම ඇත්තේ දරු දෙදෙනෙකි. ඒ අනුව ජනගහනය පවත්වා ගන්නේ ආසන්න නියතයකය. ස්ථාවර ශිෂ්ටාචාරයක මූලික ලක්ෂණයක් ලෙස සංඛ්‍යාත්මකව ස්ථාවර ජනගහනය සැලකුණි.

වට්ටෝරුව ඇතුළු කල ඩෙන්වර් මහත්මියත් පවුලේ අයට එකතු වූවාය. අල්ලාප සල්ලාපයෙන් විසුළු කතාවෙන් සහ ප්‍රීතියෙන් රාත්‍රී ආහාරය නිමාවන්නට විය. ශිෂ්ටාචාරයේ පාලක පද්ධති විසින් ඉලක්ක ගත කල පරිද්දෙන්ම මේ යුගය "සන්තුෂ්ටියේ යුගයයි". එය එසේම සිදු විය.

එහෙත් ඒ මොහොතේ නොඇසිය යුතු වූත් නොදැන සිටිය යුතු වූත් නොහොබිනා පැනය මැක්ස් ඩෙන්වර් ගේ මුවින් ගිලිහුණි.

සුළු වෙලාවකට කිසිවෙකුත් කිසිත් නොකීහ. තත්වයේ බරපතලකම තේරෙන්නට ඩෙන්වර් මහත්මියටත් තරමක වෙලාවක් ගතවිය. ඩෙන්වර් මහතා එක්වනම අසුනින් නැගිට ඉක්මන් අඩි තබමින් නිදන කාමරය දිහාට ගමන් කළේය. ඩෙන්වර් මහත්මිය ඉවෙන් මෙන් ඔහු පසුපස ගමන් කළාය.

"නතාලියා එයා ඒ කතාව දන්නේ කොහොමද? ඒ විස්තර වාරණයට ලක් කරලා තියෙන්නේ. ඒවා මනස නොමේරු කුඩා දරුවෙකුට තියා වැඩිහිටියෙකුටත් දෙන්නේ කාරනා දරාගන්න හැකිදැයි පරීක්ෂණයක් කරලා"

"බිල් මමත් එක හරියට දන්නේ නැති කතාවක්. කොහෙන් මෙයා හොයා ගන්නවද මන්දා"

"එක්කෝ මට මධ්‍යම පද්ධතිය දැනුවත් කරන්න වෙනවා එහෙම වුනොත් මැක්ස් ව එයාලා ටික කාලෙකට ඇතුළට ගනියි. මනස ශෝධනය කරන්න"

"ඔයාට පිස්සුද? අපි මේක ගෙදර මට්ටමින් බේරා ගම්මු"

"එහෙම බැහැ. කොහෙන් හරි අතීත දත්ත ලීක් වෙනවා"

"ඒවා මකා දාලා නැද්ද?"

"නැහැ ග්‍රහලෝකේ උන්නු ම්ලේච්ඡ යුගය ගැන තවම අධ්‍යනය කරන නිසා ඒවා මකන්නේ නැහැ. සම්පත් අද වගේ පූර්ණ ලෙස ප්‍රතිචක්‍රීකරණය නොකළ, ජනගහනය වර්ධනය වෙච්ච, පරිසරය විනාශකළ ඒ මානසිකත්වයන් අද දැඩි ලෙස පර්යේෂණය කරනවා. කෑදර කමට ස්වාභාව ධර්මය වනසපු, මුදල් මූලික ඉලක්කය වූ ඒ කාලයේ සියලු දත්ත පර්යේෂණාගාර වල තවම තියෙනවා"

"මාත් ටිකක් අහලා තියෙනවා ඒ කාලේ ගැන. මිනිස්සුලු නේද ශිෂ්ටාචාරයේ පාලනය ගෙනිච්චේ. පවුලක ළමයි පෝලිමක් හැදුවලු ඒ කාලේ මිනිස්සු"

"ඔව් ඒ කාලේ මිනිස්සුමයි සිස්ටම් එක පාලනය කරලා තියෙන්නේ. ඉතින් හිතන්නකෝ පාලක මිනිහෙක් කියන්නේ වැරදීම්, දුරාචාර, අර්බුද කොපමණ ගණනක් ද?"

"ඒ කාලේ මිනිස්සු ග්‍රහලෝකයේ අනිකුත් ජීවිත වලට විශාල තර්ජනයක් වුණා. ඒ නිසයි ග්‍රහලෝකය හැර ගිහින් කක්ෂ වල නිර්මාණය කරපු ජනපදවල ජීවත් වෙන්න පටන් ගත්තේ. අපි අද ජීවත් වන්නේ සන්තුෂ්ටියේ යුගයේ. මේ ඔක්කොම සියවස් ගණනක මධ්‍යගත පාලක පද්ධතියක් නිසා කෙරුණු දෙයක්. අපිට ආපහු ඒ කුණු කන්දල් ගන්න බැහැ ජීවිත වලට"

"දැන් අපි මොකද්ද කරන්නේ බිල්. මැක්ස් ව සෙන්ටර් එකට යවන්න වෙයිද?"

"මම හිතන්නේ. මොකද එයා එහෙම අහනවා කියන්නේ කොහෙන් හෝ ඒවා දැනගෙන. ඇහුව වගේ එයාට එහෙම කරන්නත් හිතුනොත්. ඔයාගේ දරුවා ම්ලේච්ඡයෙක් වෙනවා දකින්න ඔයා කැමතිද නතාලියා?"

"කොහොමද දෙයියනේ මෙහෙම වෙද්දී අපි මේකට සන්තුෂ්ටිය කියන්නේ?" නතාලියා දෑතෙහි මුහුණ හොවා ගත්තාය.

"ඇයි  බිල්  ඒ  කතාව  මේ  තරම්  හංගන්නේ?  ඇයි  මේක  අපිට  මැක්ස්  එක්ක  කතා  කරලා  බේරා  ගන්න  බැරි?"

"අවු  20  පහල  වයසේ  කෙනෙකුගේ  අවබෝධය  තුල  ඔය  වගේ  දෙයක්  පැලපදියම්  වුනොත්  එය  ධාවනය  වන්නේ කුතුහලය  නිසා. ඒ  වයසේදී  ඕනෑම  දෙයක්  කරලා  බලන්න  හිතෙනවා.  ඒ  නිසා තමයි  ඒ  වගේ  ම්ලේච්ඡ  හැසිරීම්  පොදු  සමාජයට  විශේෂයෙන්ම  දරුවන්ට  දැනගන්න  දෙන්නේ  නැත්තේ.  වර්තමානයේ  අපිට  එහෙම  දේවල් කරන්න වුවමනාවක්  එන්නේ නැහැ. අපේ  මනස  නිසි  හික්මීමකට  ලක්  කරලා  තියෙන්නේ  අධ්‍යාපනය  හරහා.  අපි  වයස  විස්සේදී  අපේ  මානසික  හැකියාවන්  ගැන  කරන  පරීක්ෂණ  වලදී  අපේ  මනසට  මේ වගේ  දෙයක්  දරන්න  හැකිද  කියා  පද්ධතිය  පරික්ෂා  කරනවා.  ඒ  ටෙස්ට්  එක  පාස්  වෙච්ච  කෙනෙකුට පමණයි  මේ  වගේ  දෙයක්  දැනගන්න  ලැබෙන්නේ.  ස්වයං  විනය  තුලින්  මිසක්  මේවා නීති  දාලා  පාලනය  කරන්න  බැහැ"   

"ඒ  කියන්නේ  මැක්ස්  ගේ  මනසින්  මේ  අදහස  ඉවත්  කරන්නම  වෙනවා"

"ඔව්, මැක්ස් විතරක් නෙවි. අපිට නටාෂා ත් යවන්න වෙයි. ඒ වගේම එයාලගේ යාළුවන්. කුඩා කාලයේ මේ වගේ ම්ලේච්ඡ දේවල් ගැන දැන ගැනීමෙන් මනසේ ඊට ආශාවක් ඇතිවෙන්න පුළුවන්. මේ කාරණා දැනගන්න කලින් පුද්ගලයා පූර්ණ ලෙස හික්මවන්න ඕනේ"

ඈතින් ඇසෙන මවගේ ඉකිබිඳුම දරුවන් මීට පෙර අසා ඇති දෙයක් නොවේ. මොකක් හෝ නොවිය යුතු යමක් සිදු වූ බව තේරී නටාෂා වික්ෂිප්තව තම සොයුරා දෙස බලයි. මැක්ස් ගේ මුහුණ පිරී ඇත්තේ ඇය දකින්නට අකමැති දඟකාර ළමයාගේ හැඩ රුවිනි.

"මැක්ස්, මොකද්ද ඒ අහපු කතාව?"

"මම වැරදි දෙයක් ඇහුවද? මම ඇහුවේ ඉස්සර කාලේ අපේ මුතුන් මිත්තන් ජීවත් වුනේ සත්තුන්ගේ මස් සහ ගහකොලවල කොටස් කාලා නේද කියලා. හැමදාම ආහාර නිෂ්පාදන යන්ත්‍ර තිබුණා වෙන්න බැහැනේ. යන්ත්‍රය හදන්න කළින් හිටි ම්ලේච්ඡයොත් මොනවා හරි කන්න ඕනේ නේද?"

අතීතය

[මැයි මස අටවන දින දිනමිණේ පළ වූ විශේෂාංගයක්]

සැක් රිචඩ්සන් යනු මේ මොහොතේ ලෝකයේ ජනප්‍රියම නමයි. එහෙත් සැක් රිචඩ්සන් මේ මොහොතේ කොයිබක දැයි කිසිවෙකුත් දන්නේ නැහැ. පෙම්වතිය සැලී හෝ සැක්ගේ දෛනික කටයුතු මෙහෙයවන බාබරා හෙවත් Holo-2097 හොලොග්‍රමික රෝබෝවරියවත් ඔහු සිටි තැන දැන සිටියේ නැහැ.

කාලය මාස තුනක් ආපස්සට ගෙන ගියොත් සැක් රිචඩ්සන් වැඩිපුර හිටියේ මාධ්‍ය කැමරා ඉදිරියේ. ප්‍රසිද්ධ දේශනා, මාධ්‍ය සාකච්චා, සම්මාන ආදිය එපාවෙන තරමට ඔහු පස්සේ ආවා.

ඒ මාස තුන පටන් ගත්තේ ඔහු ලෝක සංගමයේ හොඳම අනාගතවාදී මිනිසා ලෙස සම්මානයට පාත්ර වෙමින්. මිනිසෙකු ලබන උපරිම සම්මානය. එදිනම ඔහුව ගූගල් සමාගමේ ප්‍රධානියා ලෙස එහි අධ්‍යක්ෂක මණ්ඩලය විසින් තෝරාගෙන තිබුණා.

කාලය තවත් මාසයකින් ආපස්සට කැරකුවොත් 2098 සැප්තැම්බරයේ ගූගල් සමාගම බිහිකර සියවසක් ගෙවෙන උළෙලේ ප්‍රධාන දේශනය කරන සැක් රිචඩ්සන් දැකිය හැකියි. එම උළෙල වඩාත් ලෝක අවධානය දිනා ගන්නේ ශතවර්ෂ පූර්ණයට ඔවුන් මුදාහල Google Past හෙවත් ගූගල් අතීතය නම් මෙවලම නිසා. සැක් රිචඩ්සන් යනු එම අදහස ලෝකයට ගෙන ආ මිනිසා යි.

අද සැක් රිචඩ්සන් ලෝකයෙන් සැඟවී අභ්‍යවකාශ හෝටලයක තෙමස් නිවාඩුවක් ගතකරමින් සිටින නමුත් ඔහු ගැන තවමත් මුළු ලෝකයාම කතා වෙනවා. අතීතය සොයා දී අනාගතවාදියෙක් වූ මිනිසා කියා.

කාලය වසර හතරක් ආපස්සට කැරකුවොත් තරමක් කෙස් තියෙන සැක් රිචඩ්සන් ගූගල් අතීතය පිලිබඳ සිය ඉතිහාසගත පළමු දේශනය කරනු දැකිය හැකි යි. නම තරමටම ප්‍රකට මෙම දේශනය ලොවපුරා රැළි පිට රැලි නගමින් තවමත් යනවා. සැක් කතාව පටන්ගන්නේ අතීතයේ වැදගත් සන්ධිස්ඨාන කීපයක් සිහි කරමින්.

"වසර 2024 - හැම මිනිහෙකුටම අන්තර්ජාල ලිපිනයක් හෙවත් අයි පී ඇඩ්රස් එකක්"

"වසර 2030 - හැම මිනිහෙක්ම ඉන්නේ කොහෙද කරන්නේ මොකද්ද කියන හැම දෙයක්ම ලෝකයේ කොහේ හෝ දත්ත ගබඩාවක තියෙන්න ඕනේ. ඒ කාලේ කිව්වේ බිග් ඩේටා කියලා"

"වසර 2039 - දෙවැනි චීන විප්ලවය. දැනුම හා ලෝකයට නිරාවරණය වීම සමග බුද්ධිමත් චීනුන් පවතින අධිකාරි රජය ඉවත් කර නව දේශපාලන සම්ප්‍රදායක් හදනවා. රාජ්‍යය පරිපාලනය ගිණුම්කරණය හා විගණනය පරිගණක වලට පවරා චීන මිනිස්සු අනාගතය හැදීම කියන මාවතට යොමු වනවා. ක්‍රමයෙන් යුරෝපා ඇමරිකා ඕෂනියා සහ සමහර ආසියානු රටවල් මේ ක්‍රමවේදය එක්ක අනුගත වෙලා යුරෝපා සංගමය වැනි ලෝක සංගමය බිහි කරනවා"

"වසර 2040 - හැම මිනිහෙකුම පූර්ණකාලීන ශරීර ආභරණ ඉලෙක්ට්‍රොනික මෙවලමක් පළඳිනවා. ලෝක සංගමයට එකතු නොවූ නොදියුණු ස්වාධීන රාජ්‍ය වල අහුමුල්ලක ඉන්න හිඟන්නෙක් පවා."

"වසර 2045 - මහා දත්ත ලෙස එකතු වුනු ගොඩවල් සහ තැන තැන ඇති කුඩා දත්ත එකතු කර තනි දත්ත පද්ධතියක් හදන්න ගූගල් ඉදිරිපත් වෙනවා. හැබැයි අපිට හරි පින්තුරයක් නැහැ කල හැකි දේ ගැන"

"වසර 2052 - කෙලින්ම මනසට සම්බන්ධ වන නැනෝ චිප් මොලයට ට්‍රාන්ස්ප්ලාන්ට් කිරීමත් සමග මොලයට දුබල ශරීර අවයව වල උදව්වකින් තොරව ජාලයට එකතු විය හැකියි."

"වසර 2066 - මුළු ලෝකයේ සියලු මැනිය හැකි ක්‍රියාකාරකම් මැනුම්ගත වන බව කියවෙනවා. මිනිස්සු මේ මත අනාවැකි කියන්න ගන්නවා. භූ කම්පන සුළි සුළං ආදිය ගැන අනාවැකි කීම ටක්කෙටම හරි, අවශ්‍ය දත්ත හැසිරවීම පමණයි."

සැක් කතාව අවසාන කරන්නේ මෙහෙම.

"මිනිස්සු කාල තරණය ගැන කතා කළා. එහෙත් එය කරන හැටි තවම දන්නේ නැහැ. අතීතය කියන්නේ මොකද්ද? අතීතය කියන්නේ අප කළ ක්‍රියාකාරකම්, ගැවසුණු ස්ථාන, සිතු පැතු දේ. ඒ සියල්ල මේ වෙද්දී ලෝකයේ කොහේ හෝ තැනක දත්ත ලෙස එකතුවෙලා තියෙනවා. ඉස්සර ජීපීඑස්, සෙල්ෆි, යුටියුබ් ආදියේ සිට අද කෙලින්ම මොලය එක්ක ගනුදෙනු කරන වීඩියෝ ක්‍රමවේද වන බ්‍රේන්ෆීඩ්ස් දක්වා අපේ අතීතය සම්පුර්ණයෙන්ම ගබඩා වෙලා තියෙනවා."

"ඉතින් කාල තරණය කරන්න භෞතිකව යන්නම ඕනෙද? මේ තියෙන දත්ත ඇසුරෙන් ඕනෑම කෙනෙක් අහවල් දවසේ කලේ මොකද්ද කියා හොයාගන්න පුළුවන්. අපි පරිගණක ඇසුරෙන් ඒ දත්ත බ්‍රේන්ෆීඩ් බවට පත්කරනවා. දෑස පියාගන්න. ඔබ අතීතයේ."

මේ වචන එම සියවසේ ඇසුණු ලොකුම පෙරළිකාර වචන කිහිපයක් බව ඔහු පවා ඒ වෙද්දී දැන සිටියේ නැහැ. සීමා සහ විවේචන සැක් රිචඩ්සන් ටත් එල්ල වෙනවා. මූලිකවම ආ විවාදය නම් පුද්ගලිකත්වය ගැන කතිකාවයි. ගූගල් නම් දැවැන්තයා හිස ඔසවන දා සිට පුද්ගලිකත්වය ගැන කතිකාව ඉස්මතු වුණා. අවසානයේ වෙනත් කෙනෙකුගේ දත්ත තවෙකුට සොරකම් කිරීම හෝ අවසරයකින් තොරව නැරඹීම නොහැකි වන ලෙස සකසන පොරොන්දුව පිට ගූගල් ඒ ගැටලුවත් විසඳා ගත්තා.

ගූගල් අතීතය සිතු ලෙසම සාර්ථක වුනා. ගූගල් සෙවුම් මගින් ඔබට ඔබ මීට වසර විස්සකට පෙර කල දෙයක් එතැන ඉන්න ලෙසින්ම විඳින්න පුළුවන් බ්‍රේන් ෆීඩ් එකකින්. බ්‍රේන් ෆීඩ් එක මොලයට කෙලින්ම කාවදින නිසා ඔබ ඒ මොහොතේ භෞතිකව ජීවත්වන ලෙසටයි ඔබට වැටහෙන්නේ.

මිනිස්සු දෑස් පියා ගත්තා. අතීතයේ සිරි නරඹන්න.

එතකොට සැක් රිචඩ්සන් පැනලා ගියා. මුළු ලෝකෙන්ම. කාටත් හොරෙන් සැක් ගේ අලුත්ම වැඩ සටහන අභ්‍යවකාශ හෝටලයක මනසින් පරිගණකයට සම්බන්ධව ඔහු කරගෙන යනවා. යතුරු පුවරු දර්ශන තිර නැති මෙය බොහොම වේගවත් ලෙස කෙරෙන ප්‍රෝග්‍රෑම්කරණයක්.

සැක් රිචඩ්සන්ට වයස හැට දෙකයි. වර්තමාන සම්මුතියෙන් තවම ඔහු තරුණයෙක්. අතිශය දියුණු ජීවන රටාව සහ කළල වෛද්‍ය විද්‍යාවේ දියුණුව නිසා සාමාන්‍ය ජීවිත කාලයක් වසර එකසිය පනහකට ආසන්නයි. ඔවුන් උපදින්න ඉන්න කළල කෘතිමව වෙනස් කරන නිසා තරුණ පෙනුම ක්ෂය වෙන්න ගන්නේ වයස සියය ඉක්මවා ගියාමයි. ඒ වගේම බොහෝ රෝගවලට ඇති සම්බන්ධකම් කළල අවස්ථාවේම ඉවත් කරනවා.

එහෙත් හැට දෙකේ තරුණයෙකු ලෙස සැක් රිචඩ්සන් ටිකක් වයසයි වගේ. දැනටම කොන්ඩේ ගිහින් තනිකර තට්ටයෙක්. හම ටිකක් රැලි වැටිලා. සැක් ගේ කුතුහලය වැඩිවෙන්න ගත්තේ මෙන්න මේ නිසා. වෛද්‍යවරුත් පුදුම වුණා.

"මේක වෙන්නේ කොහොමද? ඔබේ ජාන කළල අවදියේ වෙනස් කිරීමකට පත් වෙලා නැහැ. ඔබ නිකම්ම ස්වාභාවික මිනිහෙක්."

ඊට වඩා බය හිතෙන කතාවක් වෙන නැහැ. ඒක වුනේ කොහොමද? මේ අභිරහස හොයා ගන්න ඕනේ. කෙසේ වෙතත් සැක් රිචඩ්සන් තම පනස් තුන් වියැති තරුණ පෙම්වතිය සැලීගෙන් ඈත්වෙන්න ගත්ත. "මරණය" සැක් රිචඩ්සන්ව බිය කළා. ලෝක මාධ්‍ය ඉස්සරහ හිනා වෙද්දී සැක් රිචඩ්සන් උන්නේ බයේ.

මේ කතාව හොයන්න සැක් ට තමන්ගේ මව්පියන් ගැන හොයන්න ඕනේ. දෙන්නම මිය ගිහින්. සැක් රිචඩ්සන් ගේ අම්මා ලෝක සංගමයේ හිටපු මන්ත්‍රී කෙනෙක්. ඇය සැලකුනේ සංගමයට ප්‍රතිවාදී ලෙස. ඇය දිගටම ලෝක සංගමය හා සෙසු නොදියුණු රටවල් අතර වැඩිවන පරතරය ගැන චෝදනා කල නිසා.

ලෝක සංගමයට නොබැඳුනු සමහර රටවල් තම ස්වාධීනත්වය අගය කළා. ඉන්දියාව පකිස්තානය අප්‍රිකාව වගේ රටවලට ලෝක සංගමය කියන දියුණුවේ මූලික ඉලක්ක ලබා ගන්න අමාරු වුණා. ඛනිජ ඉන්ධන භාවිතයෙන් ඉවත් වීම එක්ක වැහැරී ගිය අරාබිය හා අප්‍රිකාව දිගටම මිනි මරාගන්නවා. තවමත් ලෝක සංගමය තුල ඉන්නේ මුළු ලෝක ජනගහනයෙන් බාගේකටත් අඩුවෙන්.

සැක් ගේ අම්මා කතා කලේ ඒ ස්වාධීන රටවල මිනිසුන් දිගින් දිගටම දිළිඳු කරමින් තමන් සැප විඳින්න ලෝක සංගමය කරගෙන ගිය සූරාකෑම ගැන.

සැක් වැඩසටහන් පටන් ගනිද්දිම අනුන්ගේ දත්ත හොයන්න බැහැ කියල ලෝකයාට දීපු පොරොන්දුව කැඩුවා. මේක හොර වැඩක්. මෙතන සම්මුති නැහැ. අම්මගේ අතීත දත්ත ඔස්සේ තමා පිලිබඳ විස්තර එලියට ගන්න අතීතයට ලියු ගූගල් සෙවුම් පද්ධති සැක් වෙනස් කළා. මේ ඔක්කොම ඔහුගේ පුද්ගලික අවකාශයක ස්ථිර ආරක්ෂණය දාලා කරගෙන යන්නේ.

බ්‍රේන් ෆීඩ් එන ගානට තනියම වැඩසටහන් ලියා ගන්න මාසයක් විතර ගියා. දැන් බ්‍රේන් ෆීඩ් එනවා. වැඩසටහන තවමත් දුර්වලයි. සමහර ෆීඩ් ඒ හැටි වැඩක් නැහැ. ගූගල් අතීතය තුල සෙවුම් වලින් එන ෆීඩ් සැක් විසින් බලලා හරි පාර දිගේ යනවනම් එය දැනුම් දෙන්න ඕනේ. සැක් හොඳයි කියන තරමට සෙවුම් ඒ දිහාට යනවා. මුලින්ම ලැබුණු හොඳම සෙවුම තමා තාත්තගේ මරණය. අම්ම තාත්ත ළඟ හිටියා ඒ වෙලාවේ.

"බ්‍රිනී අපි පුතාට කියන්නේ නැද්ද අර කතාව" තාත්තා දුර්වල හඬකින් අහනවා.

"නැහැ ස්ථිරවම නැහැ" අම්මා තමයි තීරණ ගත්තේ හැමදාම.

"එයාට ඒක දැනෙයි. ශරීරය වැහැරෙන කොට"

"කරන්න දෙයක් නැහැ. අපි කිව්වත් වැඩක් නැහැ"

ඊට පස්සේ වෙනත් කතා. දෙන්න බොහොම ආදරෙන් සමු ගෙන වෙන්වුණා. අම්මගේ වෙනත් කිසිම කතාවක මොනම සඳහනක්වත් නැහැ සැක් ගැන.

සැක් ඒ සෙවුමට ලොකු ප්‍රියතාවයක් පෙන්නුවා. ඕක තමයි පාර.

ඒ පාර ලෝක සංගමයේ අම්මගේ විවාදයක්.

"... මේ ආකාරයට ලෝකය බෙදපු අපි මෙතෙක් කල නරුමම සූරාකෑම කලේ 2057 දී. අපි ස්වාධීන රාජ්‍යය වලින් බුද්ධිය කොල්ල කෑවා . අද ඔවුන් හිඟමනට වැටිලා ඉන්නේ ඒ නිසා. හෙට ඔවුන් කැරලි ගහයි"

මේ කියන්නේ මහා බුද්ධි මංකොල්ලය කියන එක ගැන. ස්වාධීන රටවල් එකතු නොවෙන කොට ලෝක සංගමය ඔවුන්ගේ සියලු විද්වතුන්ට ඉක්මන් වීසා ලබා දෙන්න තීන්දු කළා. වසර දහයකට පස්සේ ඒ රටවල් උගතෙක් කියලා හිටියේ එහෙමත් එකෙක් විතරයි.

"බ්‍රිනි ඔබ අපිව බය කරනවද? කැරලි ගහන්න පටන් ගන්න මොහොතේම අපි කොහේ හෝ ඒ දත්තය දකිනවා. අපේ පද්ධති ඒ ගැන අවදියෙන් ඉන්න ප්‍රෝග්‍රෑම් කරලා තියෙන්නේ"

"ප්‍රෝග්‍රෑම් ප්‍රෝග්‍රෑම්... " අම්මා ආවේගයෙන් කියවනවා. මේක සැක් ගේ අතීතයට තියෙන සම්බන්ධය මොකද්ද? පරිගණකයට වැරදුනාද?

"මීට දශක හතරකට පෙර අපි හොලිඩේ එකකට ගියා දකුණු ආසියාවේ ස්වාධීන රටකට. පුදුම සුන්දර රටක්. එකම වරද ඔවුන් තමාගේ ස්වාධීනත්වය පාවා දෙන්න කැමති නැහැ. අද බලන්න ඒ රට අමු අපායක්."

"දකුණු ආසියාවේ? අර අමු මුඩුක්කුවේ? එහෙ කොහෙද සුන්දර රටක්"

"බලන්න පුංචි දූපතක් තියෙනවා ශ්‍රී ලංකාව කියලා. අපි එහෙ ගියේ 2036 වසරේ. ඒ කාලේ ලස්සන සුන්දර රටක්. අදනම් බලන්න එපා. අපි වසර එකසිය පනහක් ඉන්න පුළුවන් කියලා පම්පෝරි ගැහුවට ඔවුන්ගේ ආයු කාලය තවම හැටයි හැත්තාවයි. අපේ වයස හැටක තරුණයෙක් එහෙ මහල්ලෙක්. හම රැලි ගැහුණු කොන්ඩේ ඉදුණු. තවම ළදරු මරණ වෙනවා. කළල ස්වාභාවිකව උපද්දන්නේ. තවම හැදෙනවා පිළිකා, හර්දයාබාධ දියවැඩියා වගේ කළල වෛද්‍ය විද්‍යාව තුලින් අපි සපුරා නැති කළ රෝග"

සැක් ට ඇහුනේ එකම දෙයයි. 2036. ඒ තමා සැක් රිචඩ්සන් ගේ උපන් වසර.

"හරි ඔය පාර හරි ඔහොම දිගටම සොයන්න" සැක් විධානය දුන්නා. මුළු අවධානයම ඒ පාරට වැටෙන්න වැඩසටහන් පවා වෙනස් කළා.

2036 වෙද්දී ඒ වගේ රටවල දත්ත අඩුයි. එක දිගට දුවන බ්‍රේන් ෆීඩ් නැහැ. සෙල්ෆි පින්තූර, යු ටියුබ් අභාවයට යන්න ආසන්න කාලේ වීඩියෝ, පවුල් පින්තූර, තව ෆේස් බුක්.

අවසානේ සැක් රිචඩ්සන් හරි තැනට ආවා. ඒක ශ්‍රී ලංකාවේ ගහපු සෙල්ෆි ෆොටෝ එකක්. එතන උන්නේ අම්මයි තාත්තයි තරුණ වයසේ. පසුබිමේ අමුතු විදිහක නිවස්නයක්, පෙනුමෙන් දිළිඳුයි. පැහැපත් බවින් අඩු තව ගැහැනියක් හිටියා. ඒ ගැහැණිය චූටි බබෙක් අම්මට දෙනවා. අම්මා වඩාගන්න දෑත දිගු කරනවා.

"හෙට පටන් අපේ ලෝකය මෙයා. අපි මෙයාට නම දැම්මේ සැක් කියලා. ජාන හදන්න බැරි වුනා. ඒත් අපේ මැණික අපිට සම්පතක්"

සැක් රිචඩ්සන් සෙවුම නතර කළා.

"අම්මා" ඒ හැගීමත් එක්ක ඔහුගේ මනසේ අවධානය ඉලක්ක වන්නේ පින්තුරේ උන්නු සුදු ගැහැණියට නොවේ, එතන උන්නු කෙට්ටු පැහැපත් බවින් අඩු දිළිඳු ගැහැණියට. මේ තමා ඒ අම්මා ඔහුට දැකගන්න තියෙන එකම පින්තුරය.

ඔහු වික්ෂිප්තව තරමක වෙලාවක් බලාගෙන හිටියා. ඊට පස්සේ ලෝකයේ හොඳම අනාගතවාදී මිනිසා හෙවත් ගූගල් සමාගමේ ප්‍රධානි සැක් රිචඩ්සන් තමන්ගේ අන්තිම කැමති පත්‍රය සකසන්න පටන් ගත්තා.

රොමියෝ සහ ජුලියට්

[මාර්තු  5 දිනමිණ කැෆේ විශේෂාංගයට යොමුකළ ප්‍රබන්ධයකි]

“රොමියෝ අපි ආයිමත් මුණගැහෙනවා. ඔයා හැමදාම ඉන්නේ මෙතන. මේ පාර අයිනේ පොඩි බංකුව උඩ. ඔයතරම් එකම දිහාවක් බලාගෙන කල්පනා කරන්නේ මොනවද රොමියෝ. ඔයා ගෙදර යන්නේ නැද්ද?”

“මම කල්පනා කරනවා නෙවෙයි ජුලියට්. බලාගෙන ඉන්නවත් නෙවෙයි. අනික මට ගෙදර යන්න විදිහකුත් නැහැ”

“ඇයි ගෙදර නොයන්නේ?”

“අම්මලාට අහුවුනොත් මම මේ කරන දේ, එයාලා මාව ඔග්මන්ටඩ් රියලිටිස්ට් කෙනෙක් ලඟට එක්ක යයි”

“මොකෙක්?”

“මනෝ විද්‍යාවේ ඉහළම විද්වතුන්. මිනිස්සුන්ට වඩා ඉන්නේ රොබෝ දොස්තරු”

“ඔයා හරි දඟ ළමයෙක්. එතකොට ඔයා මොකද්ද කරන්නේ?”

“මම අමාරු අභ්‍යාසයක් කරනවා. .... ම්ම්ම් ... ඔයා අහල තියෙනවද භාවනා ගැන. අපි කියමු මේක භාවනාවක් කියලා”

“භාවනා ? ඒ මොනවද? මොකක් වුනත් රොමියෝ තේරුමක් තියෙන්න එපැයි. මොකද්ද ඕකේ තේරුම?”

“තේරුම මම දන්නේ නැහැ ජුලියට්. මේක මම අහම්බෙන් පාදා ගත්තු දෙයක්. මම අමුතු ලෝකයක් දකිනවා ජුලියට්’

“අමුතු ලෝකයක්? ඇයි දැන් ඔයා ඉන්නේ මේ ලෝකේ නෙවෙයිද? ඔයා ඉන්නේ මේ මම ඉස්සරහ. අපි දෙන්න අපේ පර්සනා වලට චැට් කරමින්. ඔය ඔයාගේ නහය හරිම දිගයි, චුට්ටක් කැතයි ඒ නිසා. අර එහා පැත්තේ ලස්සන ලස්සන මල් පඳුරු අයින දිගේ හාවෝ සෙල්ලම් කරනවා. චූටි කුරුල්ලෝ ගීත ගයනවා. “

“ජුලියට් ඔයා බාගෙට හරි. අපි එකිනෙකා දිහා බලාගෙන මුවින් කතා නොකර අපේ පර්සනා වලින් චැට් කරනවා. මගේ නහයත් දිගයි තමා. හැබැයි එහා පැත්තේ මල්පඳුරු හාවෝ කුරුල්ලෝ නැහැ. ”

“ඒ කිව්වේ?”

“ජුලියට් ඔයා තවම ළමා වියේද?”

“රොමියෝ මගේ ළමා විය ඉවර වෙන්න ලඟයි. මම ඉන්නේ මගේ වෘත්තික අවධිය පටන්ගන්න මොහොත එනකම්. දැනුම් පද්ධති සියල්ල මනස්ගත කර ඉවරයි. තව මාස දෙක තුනකින් මම මානව ප්‍රභාසංස්ලේෂණ පද්ධති එක්ක වැඩ කරන වෘත්තිකයෙක් වේවි.”

“වාසනාවන්. අපිට ආයිත් කවදාවත් බඩගිනි වෙන එකක් නැහැ ඔයා වගේ ලස්සන කෙල්ලන් අතින් ඒ පද්ධති හැදෙනවා නම්. ජුලියට් මම වයස ඇහැව්වේ අර හාවෝ මල් පඳුරු කුරුල්ලෝ ගැන කතාව නිසා. ජුලියට් ට මතකද සුරංගනාවෝ?”

“අනේ ඔව් මං හරි ආසයි එයාලට. මං පුංචි කාලේ මගේ වටේ සුරංගනාවෝ පිරිලා හිටියා”

“කෝ එයාලා දැන්?”

“හ්ම්ම්ම්.... මට ඒක හිතිලම නැහැ. පර්යේෂණ කටයුතු ගැන අධ්‍යනය කරන්න මගේ කාලය ගියා මිසක්. හැබෑටම කෝ එයාලා?”

“ඔයා තව හිතන්න. ඇයි එයාල දැන් නැත්තේ?’

“ඔයා මහා නරක ළමයෙක්. මාව අමාරුවේ දානවා මේ අපබ්‍රංශ අහලා”

“නැහැ ජුලියට් මම කවදාවත් ඔයාව එහෙම කරදරයට පත් කරන්න හිතලා නැහැ. ඒත් මම උදේ හවා මේ පාර අයිනේ බංකුවක ඉඳගෙන අමාරු අභ්‍යාසයක් කරද්දී මාව පහුකරගෙන යන දාහක් අයගෙන් මාත් එක්ක මෙතරම් දුර කතා කළේ ඔයාම විතරයි. ඔයාට අකමැතිනම් යන්න ජුලියට්.”

“අනේ නැහැ මම කීයටවත් යන්නේ නැහැ දැන්. මං කිව්වේ ඔයා හරිම හරිම හරි නරක ළමයෙක්”

“ජුලියට් මම ළමාවිය පහුකරලා ඉන්නේ”

‘ඔයා වෘත්තිකයෙක් ද?”

“නැහැ”

“එතකොට... ?”

“මොකුත් නැහැ”

“ඒ කියන්නේ”

“මට කියන්න නමක් නැහැ”

“ඔයාගේ දැනුම් පද්ධති මනස්ගත කිරීම හරියට වුණේ නැද්ද? ට්‍රිලියන ගානකට එකක් ෆේල් වෙනවලුනෙ”

“හ්ම්ම්ම් ඒකනම් මනස්ගත වුණා”

“ඔයා මොනවද තේරුවේ?’

“මොකුත් නැහැ. මට ඌ දෙන වෘත්තික ඔප්ෂන් එකක්වත් හරියන්නේ නැහැ”

“ඌ කිව්වේ?’

“මගේ පර්සනා එකා”

“එහෙම කියන්න එපා තාත්ති කියන්නේ පර්සනා කියන්නේ අපිමයි කියලා”

“ඔයාගේ පර්සනා එක ලැබුණු හැටි දන්නවද ජුලියට්”

“ඔව් තාත්ති මට කියූ හැටියට මං චූටි බබෙක් කාලේ ඉන්ජෙක්ෂන් එකකින් මොකද්දෝ එකක් දාලා ...”

“ඉන්ජෙක්ෂන් එකකින් කොන්ටම් නැනෝ චිප් එකක් රුධිර පද්ධතිය හරහා ඔයාගේ බිලිඳු මොලයට යවනවා. ඒක ක්‍රමයෙන් ඔයා වර්ධනය වෙද්දී ඔයාගේ මනස එක්ක බද්ධ වෙනවා”

“අනේ මන්දා රොමියෝ ඔන්න ඔහොම එකක් තමා”

“ඉතින් ජුලියට් පර්සනා කියන්නේ පිටස්තරයෙක්. කොටින්ම එකෙක් නෙවෙයි. උන් ගොඩක්. උන් එකිනෙකට සම්බන්ධ ජාලයක්. බිලියන විසි තිස් ගානක මිනිසුන්ගේ සහ යන්ත්‍ර වල ග්‍රහලෝක කීයක්ද මන්දා එකට බැඳුනු තනි පද්ධතියක්. පර්සනා මම නෙවෙයි”

“ඔයා කියලා වෙනම එකෙක් නැහැ රොමියෝ”

“ඔව් මේක මගේ ශරීරය ඇතුලෙම මගේ මනසට සංයුක්තව ඉන්න කොට වෙන් කරන්න බැහැ තමා. හැබැයි එයා නොවන මම කවුද කියලා මම සොයාගනිමින් ඉන්නේ’

“පර්සනා නොවන අපි? ඔයාට පිස්සුද? කැලේ සතෙක් වගේ වෙයි. ශිෂ්ටාචාරය දුවන්නේ පර්සනා නිසා. අපි මුළු දැනුමම ගන්නේ පර්සනා වලින්. කොටින්ම අපි ලෝකේ දකින්නේ පර්සනා නිසා”

“අන්න ඔයා පරණ තැනට ආවා. අපි දකින්නේ සත්‍ය ලෝකය නොවේ. ඒ කියන්නේ පවතින ලෝකය නොවේ”

“පවතින ලෝකය කියන්නේ මොකද්ද රොමියෝ. අපි දකිනවට වඩා දෙයක් වෙනම තියෙනවද?”

“ජුලියට් මං ඒක ටක්කෙටම දන්නේ නැහැ. මම මේ පාර කපාගත්තේ අමාරුවෙන්. මොකද්දෝ හේතුවකට මට එදා පටන්ම මගේ පර්සනා එකා පේන්න බැහැ. හැබැයි මම ඒක ඔග්මන්ටඩ් රියලිටිස්ට් කෙනෙකුට පෙන්නන්න නොදී හොරාට හංගාගෙන හිටියා. මම එලියට පේන්න පර්සනා එකෙන් දැනුම ගත්තා, අනික් අය කරන ඔක්කොම කළා. ඒ අතරේ මම මගේ උපරිම උත්සාහයෙන් මගේ පර්සනා එක මනසින් ගලවන අභ්‍යාසය කළා. දැන් මට පර්සනා එකෙන් මෙහෙම චැට් කරකර පර්සනා එකට පිටින් මගේ ශරීර අවයව වලින් පමණක් මා වටේ තියෙන ලෝකය දකින්න පුළුවන්. පවතිනවා කිව්වේ ඒක. ඒකත් එහෙම්ම පවතිනවද මම දන්නේ නැහැ. හැබැයි එකත් එකටම ඒක පර්සනා එකෙන් මවන ලෝකෙට වඩා වෙනස්”

“එතකොට මල් පඳුරු හාවෝ කුරුල්ලෝ?’

“ඒවා ඔයාගේ පර්සනා එකේ වැඩ. ඔයාගේ පර්සනා එකේ ඒක කාර්යභාරයක් තමා ඔයාට ඈතින් තියෙන ඔයාට ඒ හැටි වැඩක් නැති දේවල් ඔයාගේ සිත සැනසෙන ආකාරෙට වෙනස් කරන්න. එතන ඇත්තටම තියෙන්නේ කිසි ලස්සනක් නැති වල් පඳුරු කීපයක්. ඔයා ළඟට ගියොත් විතරක් වෙනස් වෙයි”

“හරි ඔයා මේක කියන්න. ඇයි අපේ අම්මා දැන් මාත් එක්ක වැඩිය කතා නැත්තේ? එයා නිතර මා අවට ඉන්නවා වුණාට වැඩිය කතා කරන්නේ නැහැ”

“මට පුළුවන් හොයන්න. මට පුළුවන් ඔයාගේ පර්සනා ඒක හැක් කරන්න. හැබැයි අහන්න ලැබෙන දේ ඔයාට විඳදරා ගන්න වෙනවා”

“කරන්න”

“ඔහොම කතා නොකර චැට් එකේ ඉන්න. මට විනාඩි කීපයක් දෙන්න”

....

“හරි රොමියෝ දැන් කියන්න’

“මේක ඔයාට වේදනාකාරී දෙයක් වෙයි ජුලියට්. ඒත් ඔයාගේ තාත්තා හොඳම තාත්තෙක්. ඔයාගේ අම්මා ඔයාව දාලා ගිහින් තරමක් කල්. එයා ජීවතුන් අතර නැහැ. ඔයාගේ තාත්තා ඔග්මන්ටඩ් රියල්ටිස්ට් කෙනෙකුගේ සහයෙන් ඔයාගේ පර්සනා එකට අම්මව ඇතුළු කරලා තියෙනවා. කාලයත් එක්ක එයා හෙමිහිට දුරස් වෙයි. මට සමාවෙන්න...”

“...සත්‍ය කියලා මම හිතන ලෝකේ ඔන්න ඔහොමයි ජුලියට්. ඒක මහා දුක්බර අප්‍රසන්න වේදනාකාරී දෙයක්. කුණු කාණු, දිරන යකඩ කඳන්, නපුරු මිනිස්සු, ආදරය කළ අය මිය යන වෙන් වෙන. මම අන්න ඒ ලෝකේ දකිනවා. මම ඔහේ බලාගෙන ඉන්නවා. මට තේරෙන්නේ නැහැ මම කරන්න ඕනේ මොකද්ද කියලා. මට වෘත්තිකයෙක් වෙන්න ගෙදර යන්න ආදරය කරන්න බැහැ ජුලියට්...”

“...ඇයි ඔයා නිස්සද්ද? ඇයි ඔයාගේ ඇස්වල කඳුළු? ඔයාට මේක බර වැඩියි ජුලියට්. ඔයා මේ කරදරේට පැටලෙන්න එපා. මම වගේ පර්සනා ඒක හැක් කරගන්න එපා. ඔයා දිගටම ඔය ලෝකේ ඉන්න ඕනේ ජුලියට්. ඔයා මානව ප්‍රභාසංස්ලේෂණ පද්ධති හදන්න ඕනේ. ඔයා බඩගින්න සපුරා නැති කරන්න ඕනේ...”

“...ජුලියට් ඔයා යන්න. අඬන්නේ නැතුව අවසාන වරට හිනා වෙලා යන්න”

“හා රොමියෝ මම හිනාවෙලා යන්නම්. ඒත් මට අවසානෙට එකම එකක් කියන්න. මොකද්ද ඔයා මට දාපු විකාර නම? මොකද්ද ඔයා දාගෙන ඉන්න විකාර නම? රොමියෝ-ජුලියට්? ඒ මොක්කුද? එහෙම නම් අදකාලේ කාටවත් නැහැ. ඔයා අපේ කතාබහ මුලදී මේ නම් දෙක දැම්මට පස්සේ මම පර්සනා එකේ සර්ච් කරලා බැලුවා. අර්ථවත් දැනුම් පද්ධති වල එහෙම වචන නැහැ. ඒවා කොහෙන්ද ඔයා හොයා ගත්තේ? මොකද්ද ඒවායේ තේරුම?”

“ඉස්සරම කාලේ නාට්‍ය කියලා ජාතියක් තිබිලා තියෙනවා ජුලියට්. ඒත් ඔයා ඒවා ගැන හිතන්න එපා. ඒවා අර්ථවත් දැනුම නොවේ. ඔයා ඒ කතාවේ තේරුම හොයන්න එපා ජුලියට්. ඔයා පර්සනා එකෙන් එලියට යන්නත් එපා. ඔයාට සුන්දර හෙට දවසක්. ඔයා ආයිත් එන්න එපා”


සම්බන්ධිත සබැඳි: Scientists discover how to 'upload knowledge to your brain (ලක්ෂාන් වික්‍රම ගේ මුහුණු පොත් පිටුවෙන්)