Tuesday, July 20, 2021

ප්‍රින්ස්ටන්

1982 වසරේ එක හැන්දෑවක, ෆ්ලොරීඩාවේ ද්විතීයික පාසලක් හෙවත් හයි ස්කූල් එකක  අවසන් සහතික  ප්‍රධානෝත්සවය හෙවත් එයාලගෙ බසින් ග්‍රැජුවේශන් එක. සම්මාන  සහතික  බරගානක් ශිෂ්‍යත්වයන්  සමග දිනාගත් මුළු ඉස්කෝලෙම  දන්න මුළු පළාතම  දන්න  අති  දක්ශ  ශිෂ්‍යයා හෙවත් පාසලේ  හොදම සිසුවා කතා  කරමින්;


“මට ඕනෙ අභ්‍යවකාශයේ  හෝටල් හදන්න. මන් ආසයි පියාසර යොට් යානා  හදන්න. ආකාසේ ජනාවාස හදන්න.”


“මට ඕනෙ භෞතික  විද්‍යාව හදාරන්න.  හදාරලා මානව වර්ගයාගෙ  ලොකුම ප්‍රශ්න  විසදන්න. මහ පොළොව වඩාත් සුන්දර තැනක් කරන්න”


“මිනිස්සු  ටික ආකාසෙට ගෙනියන්න.  ආකාසෙ  ජනාවාස හදන්න. මිනිස්සු  ඒවට ගෙනිහින් මහපොළොවෙ ඉන්න සත්තුන්ට  නිදහසේ ඉන්න වාතාවරණයක් හදන්න”


“ඔව් මන් අභ්‍යවකාශයේ  ජනපද හදනවා.  මිලියන කීපයක්  ඒවයෙ පදින්චි කරනවා.  දවසක  මේ ලෝකෙ  ඉන්න  බිලියන  හතරාමාරම  එතනට ගන්නවා.  අරගෙන ලෝකයම තනි  වනෝද්‍යානයක් කරනවා. මිනිසා මෙතෙක්  හිරකරගෙන ඉන්න සතුන්ට  මිනිසාගෙන් තොරව නිදහසේ  වැඩෙන්න  අවකාශයක්  සපයනවා.”


නියම කතාවක්.  පාසල්  ශිෂ්‍යයෙකුගෙ  මට්ටමින් බොහොම අනාගතවාදි කතාවක්. ෆ්ලොරීඩාවේ  පත්තරකාරයින්ටත් හිතුණා. ඒ නිසාම  මේ කතාව මයාමි හෙරල්ඩ් පත්තරේටත්  ගියා. මේ  සිසුවා  පත්තරේට  ගිය පළමු  වතාව නොවේ.  ඊට කළින් ඔහු තම පෙම්වතිය  සමග  ඩ්‍රීම් ඉන්ස්ටිටියුට් කිය්ල  පොඩි උන්ට  උගන්වන  අධ්‍යාපන  ආයතනයක් හදන්නෙ තමන්ගෙම  ගෙදර. සම්ප්‍රදායික අධ්‍යාපන රාමුවෙන් පිටස්තරව මේ ආයතනයේ  උගන්වන අතරම ඔවුන්ගේ උනන්දුව වර්ධනය වන  විද්‍යාත්මක තාක්ශණික කතන්දර  ඔවුන් එක්ක බෙදාගන්නවා.  ඒක සැහෙන  දියුණු  වැඩක් කියල මයාමි හෙරල්ඩ් වාර්තා කළේ.  ඒත් ඉතින් මේ දක්ශ  ශිෂ්‍යයට  ෆ්ලොරීඩාවෙ ඉන්න  එකේ  තේරුමක් නෑ. ටික කාලෙකින්ම ඔහු ප්‍රින්ස්ටන්  විශ්ව විද්‍යාලයේ  භෞතික  විද්‍යාව  හදාරන්න ගියා.


*******


“ඔන්න  ඔහොමයි  මන් ඔබ ගැන කියවල තියෙන්නෙ, හරිද?” ගගනගාමින් හදුනා ගන්න දවසෙ මහාචාර්‍යවරයාට  නියමුවා මුලින්ම  කිව්වෙ මේක. 


“බොහෝ දුරට හරි” මහාචාර්‍යවරය  හිනාවෙවි  ඉන්නව. 


ලෝකෙ වටේ  මේ රවුම යන්න මහාචාර්‍යතුමා  හීන මැව්ව  ඒ  දවසෙ ඉදල ඒ හීනය හැබෑවෙන්න යන මේ  මොහොත වෙනකොට ලෝක බෝලෙ සූරයය වටේ   වට තිස් නවයක් දුවල තියෙනවා. ඉස්කෝලෙ  දක්ශම සිසුවා  ඒ  කාලෙ වවාගෙන හිටිය කොණ්ඩෙ  එක  ගහක්වත් දැන් නෑ.  ඒ කෙස් ටික පැලෙනකම් කළ  භෞතික විද්‍යාත්මක තර්ක මුලින්ම  ප්‍රින්ස්ටන් වලින් පටන්ගෙන ලෝකෙ පුරාම ගියා.  ඒවායේ  පර්‍යේශණ පත්‍රිකා ප්‍රකට ජර්නල් වලින් පත්තරවලට පත්තර වලින් ටීවී එකට  ඇවිත්  අන්තිමේ  ඒ තට්ටය  ලෝකෙම  දන්න ප්‍රකට ම මොළයක හිස්වැස්මක් වුණා. අන්තිමේදී නොබෙල් තෑග්ග දක්වා.  


“හදුනා  ගන්න ලැබීමත් ප්‍රීතියක් මහාචාර්‍ය තුමා.  මන් ඔබ  ගැන කියෙව්වෙ  ඔබ  විශ්ව  විද්‍යාලයේ ඉන්න කාලෙමයි.  ඔබතුමා  මට  සෙලිබ්‍රිටියක්. මම  ඔබේ  රසිකයෙක් කිව්වනම් නිවැරදියි. නොබෙල් තෑග්ග දිනාගත්ත  මනුස්සයෙක්  අභ්‍යවකාශයට යන පළමු වතාව මේ. ගමන පුරාම ඔබ හොදින් බලාගෙන ඉතාම උපරිමයෙන් ඔබෙ කටයුතු වලට උපකාරි වෙන්න අපි  හැමෝම සැදි පැහැදී ඉන්නවා”.  


ආයෙත්  හිනාව. “ස්තුතියි” බෝම ලජ්ජාශීලි ප්‍රතිචාරය. ඒත් ඒ  මූණෙ  ඊට වඩා  අධිශ්ටාන පූර්වක  බවක්  නියමුවා දකිනවා. 


මේ  ගමන මානව  ඉතිහාසෙ සුවිශේශි  එකක්. නීල්  ආම්ස්ට්‍රෝන් එයාගෙ පියවර ගැන කිව්ව එක  ආයෙත් අලුත් කරන්න පුලුවන් අවස්තාවක්. මේකත්  තව පියවරක් තැබෙනවා, මහාචාර්‍ය තුමාට එක පියවරක් වන එය ලෝක වාසියාට යෝධ පිම්මක්.


1982 අභ්‍යවකාශයේ  ජනාවාස කිව්වම  ෆ්ලොරීඩාවෙ  ඒක  සිනා කතාවක් පමනයි.  කැන්වරල් තුඩුවෙන් එහෙම එකක් උඩට යවන එක හිතාගන්නවත් බෑ.  මහද්වීපයක් අනිත්  පැත්තෙ හොලිවුඩයෙන් ඒක  ෆිල්ම් එකකට  නගන එක පමණයි  කෙරුණෙ. මේ  තට්ට මහාචාරියා  නො ඉන්න. 


අභ්‍යවකාශෙ  ජනාවාස?  ඒ කිව්වෙ අපිට ඉන්න වෙන්නෙ පාවි පාවි ද?  මිනිස්සු හිනා වුනා.  


වැඩිම වුනොත් ටුවරිස්ම් ආතල් එකක් වෙයි. මිනිස්සු කෝමද පා වෙවි ඉන්නෙ? විද්වත්තු ඇහුවා.


අභ්‍යවකාශෙ  නොවැටි ඉන්න නම් පොලොවේ  ආකර්ශණය  කේන්ද්‍රාපසාරි බලයෙන් කැන්සල්  කරන්න වෙනවා.  එහෙම කළාම  ඒ  යානය තුල  ගුරුත්ව  බලපෑම නෑ. ඉන්න අය  පාවෙනවා. ශුන්‍ය ගුරුත්වය කියන්නෙ ඒකට.  මේක ඉතින් විද්‍යා පර්‍යේශණ  වලට  සහ  ගගනගාමි වැඩවලට  නම් ඕකේ.  ඒත්  සාමාන්‍ය මිනිසුන්ට  එහෙම ඉන්න බෑනෙ. සරීර බර එක්ක උපන් මිනිස්සු ඒ එක්ක  ජීවත් වෙල මියැදෙන මිනිස්සු කෝමද පාවෙමින් එදිනෙදා  වැඩකටයුතු කරගන්නෙ?


තට්ට මහාචාරියා  උත්තර දුන්නෙ නෑ.  එයා  වැඩට දක්ශයෙක්. එයා  වැඩට බැස්ස. යානයට  පිටින් ගුරුත්වය කැන්සල්  වෙද්දි  යානය තුල නැවත ගුරුත්වය හදන්න පුලුවන්නම්.  ගුරුත්වය කියන්නෙ මිනිසාට තාම කිසිම පාලනයක් නැති එකම මූලික  බලය.  ඒක මෙල්ල කරල  අපිට ඕනෙ තාලෙට  සකසා  ගන්න පුලුවන්නම් මේ ලෝකෙ  අනිත් පැත්ත ගහන්න පුලුවන් බව එයා  දන්නව.


කෲතිම ගුරුත්වය. භෞතික විද්‍යාවේ කලුනික.  මේක තමා  උත්තරේ. එයා  දන්නව.  ඒ නිසා  එයා  කලුනික හොයන්න පටන් ගත්ත.


මේ  ගමන එහි කූටප්‍රාප්තිය. පොළොව වටා  යන අර්ධ ගමන් වටයකදි අභ්‍යවකාශ යානයක තියෙන  ශුන්‍ය  ගුරුත්ව මැදිරියක  විනාඩි තිහක කාලෙකට කෲතිම  ගුරුත්වය හදන්න මහාචාර්‍ය වරයාට ඕනෙ කරල තිබ්බ. අන්න  ඒ  වැඩේ  කරන්න තමන්ම  අභ්‍යවකාශෙට යන්න ඔහු තීරනය  කරනවා.  


නොබෙල් තෑග්ගක්  ලැබුනට මදි වැඩේ  කරල පෙන්නන්න ඕනෙ.  එදාට පුලුවන් අභ්‍යවකාශෙ ජනාවාස හදන්න ලෝක වර්ගයා  යොමු කරන්න. මහ පොලොව  සෙසු සතුන්ගේ  අභය භුමියක් කරල එදා  බිලියන හතරාමාරක් වෙච්ච  දැන් බිලියන අටට  මදක් අඩු මිහිකතගෙ ඒ නොසන්ඩාල දරුවො ටික  ඒකෙන් අයින් කරදාන්න. 


අදයි  ඒ  ගමන.  අද මහාචාර්‍යවරයා යනවා පොලොව වටේ  අර්ධ  වටයක්. ඒ  ගමනේ  ස්වාභාවික  ශුන්‍ය  ගුරුත්වය තුල  කෲතිම  ගුරුත්වය හදල එයා  ඇවිදල පෙන්නනවා අභ්‍යවකාශයත්  මහපොලොවෙ වගේම ඉන්න පුලුවන් කියන එක. ඒ ගමනට  නාසාව  පහසුකම් සපයනවා. වැඩේට සල්ලි දාන්න ලොව පුරා කෝටිපතියො පුල පුලා  බලා ඉන්නෙ, හරි ගියොත්.


*******


ෆ්ලොරීඩාවට ප්‍රින්ස්ටන් වලට කිලොමීටර් දාස් ගානක් ඈත එක කෝටිපතියෙක් ඉන්නව බලාගෙන.   එයත් මේ වැඩේට සල්ලි දාන්න කැමති කෙනෙක්.   කැමති විතරක් නෙවි දාන්න පුලුවන් කෙනෙක්.  ඒ නැතත්  එයා මේ ගැන හරිම උනන්දුයි.  භෞතික  විද්‍යාව එයාගෙ  අහිමි වූ පළමු පෙම්වතිය.


ලන්කාවෙ  කොළඹ ප්‍රකට ව්‍යාපාරිකයගෙ  සුඛෝපභෝගි මන්දිරයක පත  ස්ක්‍රීන් එකේ  සැටලයිට් චැනල්  එකකින් ගන්න අභ්‍යවකාශ ගමනේ  සජීවි දර්ශන විකාශය වෙනව. ව්‍යාපාරිකයගෙ යාලුවො සෙට් වෙලා  ඉන්නෙ.  පොරගෙ  භෞතික  විද්‍යා  උනන්දුව සහ දැනුම  බොහෝ සෙයින් උසස්.  මේව තමයි මිනිහගෙ විනෝදාන්ශ.


“උඹ  කිව්ව නේද  උඹත් ප්‍රින්ස්ටන් යන්න හිටියෙ කියල”


“ඔව් මන් ඒ ලෙවල්ස් වලට පස්සෙ යු එස් ස්ටඩි කරන්න යන්න හිටියෙ. ප්‍රින්ස්ටන් මගෙ අත  ඇතුලට ඇවිත් ලිස්සල ගියෙ”


“එදා  ගියානම් යසා, යු ආ  ගොන්න බීට් දිස් ගයි. යු වර් බ්‍රිලියන්ට් දෝස් ඩේස්”

 

ඒ  කතාව ඇත්ත. ප්‍රකට ව්‍යාපාරික යසන්ත රාජකරුණානායක ට  ප්‍රින්ස්ටන් වලට යන අවස්තාව  අහිමි වන්නෙ නූලෙන්.  ඉගෙනීමට අතිශයින් දක්ශ  වුණත් ලන්කාවෙන් උපාධියක් කළත්  ඔහු ඉන් පස්සෙ ඒ මොළය  යොදවන්නෙ වෙන අතකට. ලොව පුරා පැතිරුණ ව්‍යාපාර ජාලයක් එක්ක පුන්චි දූපතෙන් මුලින්ම ලෝකෙට අඩිය තිබ්බ ධන කුවේරය වෙන්න ඔහු සමත් වෙනවා.


“උඹ ප්‍රින්ස්ටන් යාවි. ඒත් අරූ ඇවිල්ල ප්‍රින්ස්ටන් වල උන්නු ලොකුම  බුද්ධිමතා කියල කියන්නෙ”


“කවුද  ප්‍රොෆෙස  ජෙෆ් බේසොස් ද? කෲතිම  ගුරුත්වයේ පියා නෙ, ඒ කතාව හරි ඇති”


“ඔව් එහෙම තමා කියන්නෙ. අභ්‍යවකාශයට ගිය පළමු නොබෙල් ත්‍යාගලාභියා”


“ඒක වෙන්න පුලුවන්. ඒත්  මන් ප්‍රින්ස්ටන් ගියානම් ප්‍රොෆෙස බේසොස් ට එකම එකක් කියනව.”


යසන්ත හිනාවෙනව. 


“ඔබතුමා  ප්‍රින්ස්ටන් වල උන්නු ලොකුම බුද්ධිමතා  වෙන්න පුලුවන්. ඒත් ඔය  ගමන අභ්‍යවකාශෙට යන ගමනක් නෙවි.  ඔය සාමාන්‍ය අහසෙන් පොඩ්ඩක් එලියට විසික් වීමක් පමණයි.  අර්ධ වටයක් අභ්‍යවකාශ ගමනක් වෙන්නෙ නෑ  ලොක්කා.”


ප.ලි.  පළමු කතා   කොටස  ඇත්ත.  ඒ  තමයි ජෙෆ් බේසොස්  පාසල්  කාලෙ.  ඒත්  දෛවෝපගත ලෙස   යසන්ත  ප්‍රින්ස්ටන් ගිය නිසා බේසොස්  භෞතික  විද්‍යාවෙන් ඉවත් වෙනවා.  එතැන් සිට කතාව කවුරුත් දන්නව. මේ  සටහන ලියවෙන්නෙ බේසොස්  තමාගෙ පාසල් සමයේ  සිහිනයේ සැබෑව  කියන්න පුලුවන් බ්ලු ඔරිජින් ව්‍යාපෲතියේ  මුල්ම  පියවර ගන්න "අභ්‍යවකාශයට යන ගමන" හා  සමගාමිව.  ඒත්  ඔහු යන්නෙ අර්ධ වටයක්. විද්වතුන්ට අනුව ඒක  අභ්‍යවකාශ ගමනක් නොවේ.   මේකට නම දාන්නෙ බ්ලු ඔරිජින් ද ප්‍රින්ස්ටන් ද කියල හිතල අවසානෙ  වඩාත් උචිත නම දැම්ම.



Monday, June 15, 2020

පිස්සු කෙළින් නැතුව පොඩ්ඩක් පොසිටිව් වෙයල්ලා - ප්‍රශ්නයක් නම් කතා කරන්න

"අයියේ... පොඩ්ඩ්ක් කතා කරන්න පුලුවන්ද?"

"කියන්න"

"....."

"මොකෝ සීන්ස් එක?"

"නෑ මේ ... මාර චාටර් හලෝ. ඔක්කොම එපා වෙල ඉන්නෙ"

"කියන්න මල්ලි කියන්න. ඔය වගේ දෙවල් කතාවෙන්නම නෙ අපි ඉන්නෙ"

"ඔව් මන් දැක්ක ඔයා පෝස්ට් එකක් ඒමත් දාල තිබ්බ. සහනයක් ඕනෙනම් කතා කරමු කියල"

"අන්නේකයි. කියන්නකො ඉතින්"

"මන් ඇත්තම කියන්නම් මට සේරම එපා වෙලා ඉවරයි දැන් වෙද්දි මට ලොකුවට දෙයක් ..."

"ඒම කියන්න එපා බන්. ජීවිතේ එහම් පොඩියට ඉවර වෙන එකක් නෙවි. ජීවිතේ කියන්නෙ හෙන දිග කතාවක්. උඩ පාත. පාතට ගියා කියා කෙල වෙන්නෙ නෑ. හෙට උඹ සන්තෝසෙන්ම ඉන්න දවස වෙන්නත් පුලුවන්. පොසිටිව් වෙයන්"

"අයියෙ මට හිතෙනව වෙලාවකට .... ජීවිතේ ..."

"මොකක් හෝ ගැටලුවක් උනාද මල්ලි. කෙලිම්ම කතා කරමු"

"පොඩි ලව් කේස් එකක් තිබිල අල වුනා. ඒත් ඒකම නෙවි..."

"ගෙදරින් වලි දැම්ම?"

"ඔව් එයාගෙ හස්බන්ඩ්"

"කම්ප්ලිකේටඩ් කේස් එකක්. ඒම තමා බන් ලෝකෙ වෙනස් වෙනවනෙ"

"ඒකම විතරක් නෙවි අයියෙ දැන් ඩිග්‍රිය ඉවරයි, තාම ජොබක් නෑ. මේ යන තාලෙට තව කාලෙකට එන්නෙත් නෑ. මන් ඔය ටියුශන් එකක් අරකක් මේකක් කරාන ඉන්නෙ"

"ඒ ප්‍රශන කාටද නැත්තෙ. මගෙ ජොබ්බ්කන්ට්‍රක්ට් එක ඉවර වුනේ කෝවිඩ් ලෙඩ්ඩු 1000 පැන්න දවසෙ. වේකන්සි මොකුත් නෑ ජොබ් මාකට් එකේ. මෙහෙ ඔහෙ වගෙ නෙවි ජොබක් නැතුව ඉන්න ලේසි නෑ යකෝ. මන් ඌබර් පටන් ගත්ත. ඒ පාර මගුල ලොක්ඩවුන් කලා. උඹට කියන්න ඌබර් ඊට්ස් දුවල ඉන්නෙ. පුස් බයිසිකලේ"

"හප්ප මන් ඒත් හිතුව ඔයා එෆ් බී දාන තරමට ඒම අවුලක් නෑ කියල"

"අවුලක් නෑ. උඹ මේ මගුලක් කියනව එෆ් බී කොටන්නෙ වෙන වෑඩ්ක් නැති නිසානෙ බන්. නිකම් නෙවි දැන් මේ කොට කොට ඉන්නෙ පීස හට් එකේ. තාම කස්ටගෙ ඕඩරේ දාල නෑ"

"දුශ්කරයි කාටත් නේ... අයිය බැදල නෙ අක්ක ජොබ් එකක් කරනවද?"

"...."

"අයියෙ... මන් ඇහුවෙ බැදපු අක්ක ..."

"ඔව් බැදල නම් තමා"

"ඒකනෙ අයියෙ අපිට වගේ ජීවිතෙ තනි නැනෙ. මාත් අරකිට මැරිගෙන ලව් කලානෙ. ඒත් හස්බ ...."

"තනි? තනි නෙවි මෙහෙ යුද පිටිය"

"ඇයි මොකෝ සීන් එක?"

"මන් දැන් ගැනි එක්ක නෑ බන්."

"වෙන පලාතක රස්සාවක් .."

"නෑ යකෝ වෙන් වෙල ඉන්නෙ. ඒකි ඩිවෝස් ෆයිල් කරයි ලගදිම. ගේ ගත්තෙ ජොයින්ට් දාල. දැන් කෝමත් මට මෝගේජ් ගෙවන්න හැටියකුත් නෑ, ඒකිට විතරයි ජොබක් තීන්නෙ. මන් දැන් අගු පිල් වල"

"නෑ ... මාර සීන් එක. දෙන්න ගැලපුන් නැද්ද අයියෙ. අක්ක හිතු කෙන නෙවිද?"

"ඒක දිග කතාවක් බන්. හිතුවමත් ඔලුව නරක් වෙනව"

"මට වගේ තමා එහෙනම්. අයියගෙත් පරන මතක ඇතිනෙ"

"මතක නෙවි ... මට ... මට මගෙම ඔලුව බිත්තියෙ ගහගන්න හිතෙනව කරපු ගොන්කමට"

'බැන්ද එක?"

"ඒකත් එකක්. ඊට එහා ගොන්කම, මන් ඒ කාලෙ ඕකිට නෙට් එකේ මොකවත් තේරෙන් නැති කාලෙ එයාට එෆ් බී එකක් නැති නිසා මගෙ එෆ් බි එකේ පාස්වර්ඩ් දුන්න"

"ජොයින්ට් එකවුන්ට්"

"ඒ මලදානෙ තමා"

"ඉතින් අක්ක මොකද කලේ"

"අක්ක... මේකි අවුරුදු කීපෙකින් මට හොරා ලොග් වෙලා"

"අයිය පාස්වර්ඩ් එක වෙනස් කරල නෑ"

"කවුදෝයි හිතුවෙ"

"ඉතින අයිය දාන පොලිටිකල් සීන් වලට අක්ක ආස නෑ"

"ඒව නෙවි යෝදයො ඒකි ඉන්බොක්ස් බලන්න ඇවිත් තියෙන්නෙ"

"ඉතින් මොකද්ද මාට්ටු..."

"ලොකු එව්ව නෙවි බන් පොඩියට මල් කඩපුව. මේ සයිබරේ එහාකොනේ ඉන්න එකියො. දෑහට දැකලව්ත් නෑ. තේරුමක් නැති එව්ව."

"හප්ප"

"මේකි හිතන්නෙ මන් උන්ට ගිහින් කොරල ආව කියල. බැල්ලි"

"අයියෙ පොඩ්ඩක් සන්වාදයක් කරල"

"සන්වාදෙ සන්වාදෙ නෙවි මට වෙලාවකට හිතෙනව ..."

"කල බල වෙන්න එපා අයියෙ"

"කලබල නෙවි. මන් ඕකිට දෙන්නෙ සීතල ගේමක්. මට ඔය ගෙවල් අරක මේක ඕනෙ නෑ. මට තියෙන්නෙ වයිරෙ. ... මන් ඕකිව ... මන් ඕකිව මරාගෙන මැරෙනව දවසක්"

"අනේ බුදු අයියෙ ඒම කියන්න එපා බන්. ජීවිතේ ඒම පොඩියට ඉවර වෙන්න දෙන්න එපා. ජීවිතේ කියන්නෙ අර අයිය කිව්ව වගේ හෙන දිග කතාවක්. අර කිව්වෙ මොකද්ද උඩ පාත සීන් එකක්. එක පාරට කේස් කරගන්න එපා. සමාරවිට හෙට ජොබක් සෙට් වුනොත් අයිය ආයෙ අලුතෙන් පටන් ගනියි නෙ. පොඩ්ඩක් පොසිටිව් වෙයන් බන් අයියෙ"

Friday, August 4, 2017

ගල් කැටයම

[ජුලි 29 සහ අගෝස්තු 5 දෙදින දිනමිණ විශේෂාංග අතිරේකයේ පලවූ විද්‍යා ප්‍රබන්ධයකි. නැවතත් විශේෂ ස්තූතිය ලිවීම නතර නොකරන්නට අප දිරිමත් කරන කාංචනාට සහ මීට අවශ්‍ය විද්‍යාත්මක සංවාදය සයිබරයේ මතු කළ රිටිගල ජයසේන ව්‍යාජනාමධාරියාට]



"විනෝදාංශ: නිදහස් ගුරුත්වයේ සර්ෆ් කිරීම, මනසින් සම්බන්ධිත සාමුහික ගේම්, ගල් කැටයම් - මොකක් ?? ගල් කැටයම්? තමුසේ මාර යකෙක් නේ" පතල් කණ්ඩායමට අලුතෙන් එකතු වූ තරුණ සාමාජිකයා වන ජේසන් ගේ ජීව දත්ත නිරික්සන කණ්ඩායම් නායකයා කියයි.

"ඇයි බොස් එහෙම කිව්වේ?"

"නෑ මේ ගල් කැටයම් ... මන් කියන්නේ .... හරි ජේසන් ඉස්සෙල්ලම කියනවා ගල් කැටයම් කියන්නේ මොකද්ද කියල. මම හිතාන ඉන්න එකනම් හද්ද ගොන් වැඩක්. මං හිතුවේ මිනිස්සු ඒවා නතර කරලා කියල"

"ගල් කැටයම් කියන්නේ ඒක තමා. ගලක් අරගෙන ගල් කටුවෙන් කඩා දාලා මූර්තියක් හදන එක."

"ඉස්සර කාලේ වැඩක් නේ. හොලොග්රාම් තියෙද්දී මොකටද ඕව කරන්නේ. සති ගානක් කට්ට කනවා ඇති එකක් හදන්න "

"මෙහෙමයි බොස්, මේවට ස්කිල් එක ඕනේ. හැමෝටම බෑ. සති නෙවි මාස ගණන් යනවා. හැබැයි එකක් හැදුවොත් එන ජොලිය මාස නෙවි අවුරුදු ගානක් තියෙනවා."

"මට ඇත්තෙන්ම ආසයි මේක කරන හැටි බලන්න, අවාසනාවකට මෙහෙ කළුගල් නෑ. මේක ලෝහමය ලෝකයක්"

"හරි බොස් ප්‍රශ්නයක් නෑ. මේ දැනුත් බාගෙට කරපු එකක් මගේ බෑග් එකේ තියෙනවා. එන්න මගේ රූම් එකට මම පෙන්වන්න" තරුණයා සිය නායකයා කැටුව යයි. අලුත් නවාතැන් පොළේ බර රහිත සංචරණය තවමත් ඔහුට නුහුරු සෙයකි.

"මොනවා... තමුසේ ගල් ගෙඩියක් ගෙනාවා? පොළොවෙන් කක්ෂයට කිලෝග්රෑම් එකක් ගෙනියන්න යන වියදම දන්නවද? එතකොට එතන සිට මෙතනට තියෙන මහා දුර"

"ගැටලුවක් නෑනේ. ගෙනාවේ මට දීපු කිලෝ ගණනේ ලිමිට් එක ඇතුලේ. අනික දැන් මේක ගල් ගෙඩියක් නොවේ. මේ බලන්න"

ඉතාම පරිස්සමින් වටිනා සම්පතක් එලියට ගන්නා මෙන් අඩක් නිමවූ ශිලා නිර්මාණය ඔහු මේසය මත ඇති රඳවනයේ සිර කරයි.

"මේ මමයි මගේ අන්තිම කෙල්ලයි දෙන්න මනසට සම්බන්ධ නැනෝ චිපයෙන් ගත් ස්මෘති සෙල්ෆියක් ස්මරණයට අරගෙන හදාපු එකක්. කෙල්ලගේ කොන්ඩේ රැළි තව ලස්සනයි බොස්. ඒවා තවම ඉවර නෑ. මේ පාවෙන ලෝකේ ඉවසීමෙන් ඒවා ඉවර කරන්න කාලයක් ලැබේද මන්දා"

පැතලි ගල් තලයෙන් ඉස්මතු කරන ලද සම්පුර්ණ මිනිස් රූ දෙක ආදරයෙන් වැලඳ ගෙන සිටිති. නායකයා ගෝලයාගේ හැකියාව ගැන විස්මයට පත් ව බලා සිටියි.

"දැන් මේ පසුබිමේ මොකද්ද තියෙන්නේ ජේසන්?"

"සූර්යයා මැද්දේ. මේ ග්‍රහලෝක. මේ තුන්වෙනි එක ඒ කිව්වේ පොළොව. මේ කොයි මොහොතේ ඇවිලෙයි ද දන්නේ නැති න්‍යෂ්ටික ආයුධ පොලොව මත. අපි ජීවත්වෙන අවදානම් යුගය ගැන එයින් කියන්නේ. අපි දෙන්න ඊට ඉහළින් සත්‍ය ආදරය දේශපාලන සහ යුධ විකාර වලට වඩා උසස් නිසා අපි එසවී ඉන්නේ, මේ අනිකුත් ග්‍රහලෝක. මේ තමා බොස් ඇස්ටරොයිඩ බෙල්ට් එක. මේ පතල සහ සයිකී ඇස්ටරොයිඩය. ඔය දම්වැල සංකේතවත් කරන්නේ පතල විසින් මාව එලීසා ගෙන් වෙන් කරලා ඇදලා ගන්නවා කියන එක."

"හ්ම්ම්ම් හැගීම්බර මොහොතක්. මට තේරෙනවා ඒක .... ඒත් පුතා අපි මේ හාරන යකඩ නැත්නම් කොහොමද අපේ රටවල් පොළොවෙන් ඉහලට එසවුණු කක්ෂගත වාසස්ථාන හදන්නේ? බිලියන හැත්තෑ පහක ජනගහනයක් තවත් මෙහෙම පැටව් ගැහුවොත් ලෝක යුද්ධයක් අනිවාර්යයි. ඊට කලින් අපි පොළොවෙන් අහසට යන්න ඕනේ. මේ පතල එහෙම බැලුවම සාමය වෙනුවෙන් කරන දෙයක්"

"බොස් මම එතරම් උගතෙක් නෙවි, ලෝකය ගැන ලොකුවට මම දන්නෙත් නෑ. හැබැයි එකක් කියන්නම්. මේ වැඩේ තේරුමක් නෑ. ඔය ලෝක යුද්දේ වෙනවා කොහොමත්. අපි මෙහෙම හිතුවට බොස් උන් එහෙම හිතන්නේ නෑ. න්‍යෂ්ටික ආයුධ සහිත රටවල් පනහකට වඩා තියෙනවා. ත්‍රස්ත කල්ලි කීපයක් ඒ තාක්ෂණය ආසන්නයේ ඉන්නවා. උන්ට සමහර රටවල් සපෝට්. මේක හරියන්නේ නෑ බොස්. න්‍යෂ්ටික යුද්දේ කෝමද දන්නවද තියෙන්නේ. මේම මේම මේම මේම අත ළඟ"

අතේ ඇඟිලි අතුල්ලමින් කොලුවා කරන සද්දය නායකයාට ඇසුනේ කාල බෝම්බයක කාල ගැනුම් කරන ටික් ටොක් සද්දයක් මෙනි. මෝඩ තාලෙට කිව්වට කොලුවා නිවැරදිය.

ඉදිරි සති කිහිපය ගෙවී ගියේ නව සාමාජිකයාට පද්ධතිය පෙන්නීමට සහ මූලික පුහුණුව ලබා දීමටයි. ඔවුන්ගේ ජනපදය පිහිටුවා තිබුනේ ඇස්ටරොයිඩ බෙල්ට් එකේ 16 සයිකී ලෙස නිල වශයෙන් නාමකරණය කරන ලද ඇස්ටරොයිඩය මතය. බොහෝ විද්වතුන්ට අනුව සයිකී යනු පුපුරා ගිය ග්‍රහලෝකයක හරි මැද මදයයි. එය පාශානිකරණය සිදු නොවූ පිරිසිඳු ලෝහ ගුලියකි. සූර්යග්‍රහමන්ඩලයේ නිරාවරණය වී ඇති විශාලම ලෝහ කුට්ටිය එයයි. ඒ නිසාම එය ඩොලර් ට්‍රිලියන මිලියන ගණනක් ලෙස වටිනාකම් ඇස්තමේන්තු කරන ලද්දේ 2020 දශකයේ සිදුකළ ගවේෂණයකින් අනතුරුවය.

කිමි දෙසිය ගණනක අරයක් පැවතියද සයිකී ඇස්ටරොයිඩ ගුරුත්වාකර්ෂණය පොළොවෙන් සියයට එකක් පමණ හෙවත් නොගනිය හැකි තරම් කුඩාය. ජනපදය පිහිටුවා තිබ්බේ ලෝහ බඳට විශාල අර්ධ ගොලාකාර වහල් සවි කිරීමෙනි. සයිකී ගෙන් එලියට නෙරන විශාල බිබිලක් සේ පෙනෙන ඒවායේ මුළු ජනගහනය දැන් පනස් දහසකට ආසන්නය. යකඩ සහ නිකල් තොගය හාරා සූර්ය ගුරුත්වාකර්ෂණය මගින් පොළොව දෙසට වැටෙන්න සලස්වා න්‍යෂ්ටික බූස්ටර් රොකට් මගින් පෘථිවිය වටේ කක්ෂයකට යොමු කිරීම ඔවුන්ගේ කාර්යය විය. ඒ ලෝහ යොදාගෙන පොලොව වටේ කක්ෂගත නව වාසස්ථාන තැනීම දැන් ආරම්භ වී ඇත.

ජනපදය සහ පොලොව අතර ඇති දුර සහ එහි අධික ජනගහනය නිසා ජනපදය බොහෝ දේවලින් ස්ව්‍යන්පොෂිත ලෙස පවත්වා ගන්නට සිදුවිය. 100% ප්‍රතිචක්‍රීකරණය වන ජලය සහ කාබනික ද්‍රව්‍ය දුර්ලභ දේවල් දෙකකි. නව අවශ්‍යතා සපුරන්නට ඒවා ඇතැම්විට ධූම කේතුවකින් හෝ ඒවා සුලභ ඇස්ටරොයිඩයකින් ලබා ගැනුණි. අමතර ජල සංචිත හයිඩ්‍රජන් සහ ඔක්සිජන් බවට හැරවූ අතර ඒ හයිඩ්‍රජන් න්‍යෂ්ටික විලයනය කර බලශක්ති අවශ්‍යතාවය සපුරා ගන්නා ලදී. සූර්යාලෝකය අතිශයින් අඩු නිසා කෘතීම ආලෝක තත්ත්ව යටතේ ප්‍රභාසංස්ලේෂණය හරහා තවත් ඔක්සිජන් නිපදවීමට ඔවුන්ට සිදු විය, එහි අතුරු පලයක් ලෙස ලැබෙන ග්ලුකෝස් ඇතුළු කාබනික ද්‍රව්‍ය භාවිතා කර සියලු ආහාර ත්‍රිමාණව මුද්‍රණය කර ගැනුණි.

සියල්ල රඳා පැවතියේ එක වැදගත් යන්ත්‍රයක් මතයි. ඒ ත්‍රිමාණ මුද්‍රණ යන්ත්‍රයයි. ඔවුන්ගේ සියලු අවශ්‍යතා ත්‍රිමාණව මුද්‍රණය කරන්නට යන්ත්‍රය සමත් විය. එපමණක් නොව තම සියලු අමතර කොටස් නැවත ත්‍රිමාණව මුද්‍රණය කිරීමට ද ත්‍රිමාණ මුද්‍රණ යන්ත්‍රය සමත් වීම නිසා ඕනෑම වෙලාවක එවැනි තවත් යන්ත්‍රයක් නිපදවිය හැකි විය. ඒ නිසාම අවැසිනම් පොළොවෙන් මිදී ඕනෑම කාලයක් ජීවත් වන්නට අවශ්‍ය සියල්ල ඔවුන් සතුව පැවතුනි.

"බොස් දැන් හෙට න්‍යෂ්ටික යුද්දේ පටන් ගෙන ඔක්කොම සප්ලයි නැවතුනත් අපිට මොකුත් වෙන්නේ නෑ නේද?"

"අනිවාර්යයෙන්ම, පනස්දාහකට ආපසු යන්න ප්‍රමාණවත් යානා නැතිකම හැරෙන්න වෙන කිසිම ගැටලුවක් නෑ. මේක වෙනම ලෝකයක් කියා හිතන්න ජේසන්"

"වාසනාවන්"

"හැබැයි තමුසේ ඔච්චර බය වෙන්න එපා. හෙට එහෙම වෙන්නේ නෑ"

"මට ෂුවර් නෑ බොස්. අවන්කෙන්ම ෂුවර් නෑ"

හෙට එහෙම වුණේ නැත. එහෙත් වැඩි කල් යාමට පෙර එහෙම වන බව දැනෙන්නට විය. අවසන් වරට ලැබුණු රතු වාර්තාව කීවේ න්‍යෂ්ටික යුද්ධය මේ මොහොතේ ඇතිවීම නොවැලක්විය හැකි බවයි. 


එතැන් සිට ගෙවුණු කෙතරම්දැයි කවුරුත් නොදන්නා එහෙත් එතරම් දිග නැති කාලය පුරා සිදුවූයේ කලබගෑනියකි. පතල් කටයුතු නතරවිය. ජනපදයේ ප්‍රධාන පණිවුඩ ජාලය සහ අන්තර්ජාලය හරහා දත්ත එකතු කිරීමට එහි ක්‍රියාකරුවන් කටයුතු කරද්දී මනසින් සම්බන්ධිත සමාජ ජාල හරහා හිතවතුන්ගෙන් විස්තර එකතු කරන්නට අන් සියල්ලෝ කටයුතු කළහ. බියජනක කෑගැසීම්, හඬා වැටීම්, එකිනෙකා වැළඳ වැළපීම් ආදියෙන් පිරුණු ඒ කාල පරිච්චේදයේ ඈත ග්‍රහලෝකයේ නගරයෙන් නගරය මියැදෙමින් පැවතුනි. යුද්ධය පටන් ගත්තේ කවුද, පාර්ශ්ව කීයක් ද, ආදිය ගැන නිවැරදි දත්තයන් සපයා ගැනීම අසීරු විය. එහෙත් සියලු දෙනා දැනසිටි එක දෙයක් විය. ඩොමිනෝ පෙළක් සේ පෙළ ගැස්සී තිබු මව් ග්‍රහලෝකයේ එදිරිවාදිකම් අවසන ඉතුරුවෙන කිසිම රටක් නොමැති බවයි. යුද්ධය වසංගත රෝගයක් මෙන් ග්‍රහලෝකය වෙලා පැතිරුණි.

න්‍යෂ්ටික යුද්ධයක ඇති යහපත් පැත්තනම් වේදනාව දීර්ඝකාලීන නොවීමයි. කෙටි කලෙකින් සියල්ල නිමාවී තිබුණි. ඉනික්බිති ජනපදයට ඉතුරු වූයේ සම්බන්ධතාවය බිඳ වැටුණු අන්තර්ජාලය සහ මනස් ජාලයේ සම්බන්ධයන් බිඳී ගොස් වික්ෂිප්ත වූ මිනිසුන් පනස් දහසක් පමණි. වේදනාකාරී සහ ඝෝෂාකාරී කෙටි කාල පරිච්චේදයකට පසු දීර්ඝ නිහැඬියාව සියල්ල වෙලා ගත්තේය.

වසර මිලියන ගණනක් ගෙවී ගිය ද ඒ නිහැඬියාව එලෙසින්ම පැවතුනි.

------------------------------------

වසර මිලියන ගණනකට පසු දිනෙක සයිකී ඇස්ටරොයිඩය මත නැවතුණු යානය ද පිටස්තර එකක් නොවීය. එය ගමනාරම්භ කළේ ආසන්න වෙනත් ඇස්ටරොයිඩයක සිටයි. ජනශුන්‍ය සයිකි ලෝහ මතුපිට මත යානයක් නවත්වන්නේ එහෙමත් දවසක පමණි, එහි සිටි අපුර්ව ජීවින් දෙදෙනා සිය යානයේ දොරගුළු විවර කර වායුගෝලයක් නැති නිරුවත් ඇස්ටරොයිඩ මතුපිටට පැන ගත්හ.

යානයට අමතරව ඔවුන්ගේ ශිෂ්ටාචාරමය සලකුණු කීපයක් විය. පළමුවෙන්ම උන් විලි වසා ගැනීමට ඇඟලුම් යොදාගත්හ. නිතර වායුගෝල රහිත පරිසරවල ජීවත්වීම නිසා කථනය ට අමතරව තොල් සහ මුහුණේ විවිධ පේශීන් ගේ චලනය සහ වර්ණ වෙනස්වීම් මගින් සන්නිවේදනය සඳහා නිර්මිත ද්විතීයික භාෂාවක් උන් සතුවිය. දුර සූර්යයා ගෙන් එන මන්දාලෝකයේ එකිනෙකා ගේ මුහුණු සහ ඇස්ටරොයිඩ මතුපිට වළ ගොඩැලි හෙල් කඳු ආදිය පෙනෙන සේ මනාව හුරුවූ දෑස් බකමූනෙකු මෙන් විශාලය. රික්තයට  ආසන්න  පරිසරය තුල  ශාරීරික පීඩන තත්ත්ව  පවත්වා  ගැනීමට  හම ඝන වී  රළු වී   කැටි ගැසී  ගොසිනි.

නිරුවත් ඇස්ටරොයිඩ මතුපිටක රැඳීම පහසු කාර්යයක් නොවේ. එහෙත් මතුපිටට කාවදින ලෙස උල් වී කොකු මෙන් වක ගැසුණු තද අස්ථිමය පසු ගාත්‍රා තුඩු ඒ ගැටලුව විසඳන්නට සමත්විය. කෙලින් සිටගැනීම අසීරු කාර්යයක් වන පරිසරයක ස්වාභාවයෙන් කුදු ගැසුණු සිහින් දිග සිරුරු ඔවුන්ට ගෙන දුන්නේ පහසුවකි, ජිම්නාස්ටික් කරුවෙකු සතු නම්‍යශීලිත්වය උපකාරයෙන් සිරුර ගුරුත්වාකර්ෂණ සහයකින් තොරව මතුපිට රඳවා ගන්නට උහු සමත් වූහ. වඩාත් ශක්තිමත් බාහු සහිත පෙර ගාත්‍රා යමක් අල්ලා ගත හැකි ඇඟිලි සහිත අත්ලකින් කෙළවර විය. ඒ සියල්ලට වඩා වැදගත් සලකුණක් විය. ඒ නම් ඇස්ටරොයිඩ මත අසීරු ගමනකදී සිරුරේ සමතුලිතතාවය උදෙසා වැදගත්වන වලිගයයි. බර එතරම් වැදගත් සාධකයක් නොවුනත් පසු ගාත්‍රා මත සමතුලිත වන්නට සිරුරේ කොටස් දෙකක අවශ්‍යතාවය වැදගත් විය. අධික කෝණික ගම්‍යතාවයකින් කැරකී යන විට වලිගය අනෙක් අතට හැරවීමෙන් එය සමනය විය.

පස්සා ගාත් වල කොකු වලින් ඇස්ටරොයිඩ බඳේ ලෝහ පැලුම් වල එල්ලෙමින් වලිගයේ උපකාරයෙන් සිය සිරුරු සමතුලිත කරමින් ජීවින් දෙදෙනා ගමන් කළහ. උන්ගේ සිරුරු ශක්තිය නිපදවූයේ ඔක්සිජන් වලිනි. එහෙත් අවැසි විටෙක සංචිත ලෙස ඔක්සිජන් රඳවන බැලූන වැනි ව්‍යුහයන් උන්ගේ පෙනහළු වල දිගුවක් ලෙස උදරය දෙපසින් මතුවී තිබුණි. එක් සම්පුර්ණ පිරුමකින් සැලකිය යුතු කාලයක් නිරුවත් ඇස්ටරොයිඩ මතුපිටක ජීවත් විය හැකිය. මෙය අවදානම් වැඩකි. එහෙත් ඇස්ටරොයිඩ මත ජීවිතය මීට වඩා අඩුවෙන් අවදානම් වැඩක් නොවේ.

දැන් සයිකි ජනපදයේ හැඳිනිය හැකි ශේෂ අභ්‍යවකාශයේ අනේකවිධ අතවරයන්ට කෙළින්ම නිරාවරණය වී අවසන් ගමන් ගොසිනි. සයිකි ඇස්ටරොයිඩය මත හෑරු පතල් වල කුහර තවමත් දැක ගත හැකිය. එහෙත් ඒ සඳහා භාවිතා කල කිසිම යාන්ත්‍රික මෙවලමක් හෝ ජනපදයේ බිබිළි වැනි වහලවල් එහි නොවීය.

දීර්ඝ අඳුරු කාල පරිච්චේදයේ මුල් යුගයේම තමන් සතු සියල්ල රැගෙන ජනපදිකයෝ සයිකිය හැර ගියහ. ඩොලර් ට්‍රිලියන මිලියන ගණනක ඇස්තමේන්තු ගත වටිනාකම තවදුරටත් ඉතිහාසයක් වූ පසු වාසයට අසීරුම තැන වනුයේ මේ ලෝහ කුට්ටියයි. සියලු දෙනා එකවර ගෙන යන්නට දුරගමන් හැකියා සහිත යානා නොතිබූ නිසා වරකට කිහිප දෙනා බැගින් අසල්වැසි විශාල ඇස්ටරොයිඩය කරා ගෙන ගියේ තාවකාලිකවය. කවදා හෝ මුදාගැනීමේ මෙහෙයුමක් එනතුරු ය. ඉන් පසුව සිදු වූ කිසිවක් කවුරුත් දන්නේ නැත.

"පාරෝ උඹ කොතනදීද ඒක දැක්කේ?"

"එහෙම ලෙහෙසියෙන් කියන්න බැහැ හාප්"

"බැලුන් එක මදිනම් අපිට ඔක්සිජන් අරගෙන එන්න වෙයි"

"නැහැ මදි නැහැ"

නොකඩවා වේගයෙන් සැලෙන මුහුණු පේශීන් සහ ඒවායේ විවිධ වර්ණ රටා සංකීර්ණ කතාබහක් වේගයෙන් සිදු කරයි.

"උඹ අර කතාව මට කියන්නේ නැද්ද හාප්"

හාප් ප්‍රජාවේ විද්‍යා ලෝලියෙකි. විද්‍යාඥ යන වචනය ලබා දෙන්න තරම් දියුණුවක් හෝ කේෂ්ත්‍ර විශේෂිකරණයක් නැති ප්‍රජාව තුල පැවැත්ම හැර අන් සියල්ල විනෝදාංශ පමණි.

"මොන කතාවද? මම උඹත් එක්ක කීයක් දේවල් කතා කරලා ඇද්ද?"

"අපි කවුද කියන එක. දෙවියන් ගේ මැවුම ගැන"

"මේවා කියල මට දඬුවම් විඳින්න වෙන්න පුළුවන්. දේව ඇදහිල්ලට මදක් හෝ වෙනස් මතයක් එනවට කවුරුත් කැමති නෑ"

"විශ්වාස කරපන් හාප් මම උඹේ ප්‍රාණසම මිත්‍රයා"

"හරි හරි හැබැයි මේ කතාව රහසක් උඹ කාටවත් කියනවා හේම නෙවි"

"අනිවාර්යයෙන්ම රහස රකිනවා"

"මේකයි කතාව. දැන් අපි කවුද? අපි කොහොමද මේ ලෝක වලට ආවේ?"

"දෙවියන් පළමුව මහා මැවුම් යන්ත්‍රය මැව්වා. ඉන් පසුව විලයන එන්ජිම සහ අභ්‍යවකාශ යානය මැව්වා. ඉන් පසු අප මැව්වා. ඕක පැහැදිලි නැද්ද උඹට"

"ඕක හොඳ පැහැදිලි කිරීමක්. හැබැයි ඕක මදි"

"ඔහොම නැතුව මහා මැවුම් යන්ත්‍රය හැදෙන්නේ කොහොමද? අප පාවිච්චි කරන සියලු දේ එතකොට ආහාර, එතකොට අර බිබිළි වගේ තඩි පියසි මේ ඔක්කොම මවන්නේ මහා මැවුම් යන්ත්‍රයෙන්. එපමණක් නොවේ මහා මැවුම් යන්ත්‍රයේ කොටස් ටිකත් එයින්ම මවන්න පුළුවන් නිසා එක යන්ත්‍රයක් අබලන් වෙද්දී තව එකක් හැදෙනවා. පූජකයා නිසි යතුරු එබුවොත් අපිට ඕනෑම දෙයක් එයින් ලබා ගත හැකියි. උඹ කියන්නේ පූජකයා මේ ඔක්කොම හැදුවා කියලද?"

"හරි මහා මැවුම් යන්ත්‍රය මට ලොකු අභියෝගයක්." කලකට පෙර හාරන ලද පතල් වලකට පසු ගාතයක් ගසාගෙන මද විවේකයක් ගනිමින් හාප් පැවසීය.

"අපි ටික ටික හිතමු. අභ්‍යවකාශ යානය සහ අනිකුත් සියල්ල මහා මැවුම් යන්ත්‍රය විසින් නිර්මාණය කරනවා. ඒ නිසා එය ගැටලුවක් නෑ පාරෝ"

"ගැටලුවක් තවම තියෙනවා. අභ්‍යවකාශ යානා නිකම් අපිට හිතල හදන්න බෑ. විලයන එන්ජිම සංකීර්ණයි. මේවා හදන්න තරම් දැනුමක් එකම ප්‍රජාවකටවත් නැහැ. අනික උඹ දන්නවද මම ඇස්ටරොයිඩ කීපයක ඉඳල තියෙනවා, ප්‍රජාවන් කෙතරම් වෙනස් වුනත් මහා මැවුම් යන්ත්‍රය විලයන එන්ජිම සහ යානය සම්පුර්ණයෙන්ම සමානයි. වෙනස් ප්‍රජාවන් රාශියක් කොහොමද හාප් එකම යන්ත්‍ර ඒ විදිහටම හදන්නේ. අනික ඉස්සර යුද්ධ වලින් වෙන් වෙලා එකිනෙකා අතර ගනුදෙනු වෙලාම නැහැ. අපි වෙනස් ජීවින්. හැබැයි යන්ත්‍ර සමානයි."

"හ්ම්ම්ම් හැබැයි උඹ හරි කතාව කිව්ව. අපි වෙනස් ජීවින්. ඇස්ටරොයිඩ එකින් එකට අපේ ස්වරූප වෙනස්. විශාල ඇස්ටරොයිඩ වලට යද්දී අපේ ඇඟ තැලෙනවා. ඒවායේ ඉන්න උන් අපි තරම් හොඳින් මේ වගේ මතුපිට ඇවිදින්නේ නැහැ. උන්ට ඇස්ටරොයිඩය දිහාට අදින ඇදිල්ල අවශ්‍යයි. අපි වඩාත් සිහින් දිගටි. උන් අපිට වඩා පොඩියි. ඒ විතරක් නෙවි පාරෝ උඹ දන්නවද අපිට සරු ජනිතයන් හදන්න පුළුවන් සමහර ඇස්ටරොයිඩ වල ඉන්න අය සමග පමණයි. අපි අභිජනනය කරන්නේ සමහරු එක්ක විතරයි. ඒකෙ තේරුම තේරුණාද?"

"ඔව් අපි වෙනස් සත්තු"

"හරි. ඕකයි කතාව. දැන් දෙවියෙක් අපි මැව්වා නම් ඇයි මෙහෙම වෙන වෙනස් සත්තු ගොඩක් මැව්වේ. ඊට ලෙහෙසි නැද්ද එකම ජාතියේ උන් හැමතැනම මැව්වා නම්"

"දැන් උඹ මාව අමාරුවේ දානවා. ඒත් උඹට තව වැඩි වෙලාවක් නැහැ, මොකද මම පාර හොයා ගත්ත. මේ ගැඹුරු වලේ කොණක තමා ඒ වස්තුව තියෙන්නේ. උඹට ඕනේ කතාවක් කියන්න තව ටිකයි වෙලාව ලැබෙන්නේ"

"මගේ කතාව මේකයි පාරෝ. අපේ ස්වරූප වෙනස් වෙනවා. අපි ටික ටික පරම්පරාවෙන් පරම්පරාවට වෙනස් වෙනවා. අපිව මවලා නැහැ. පාරිසරික හේතු මත ටික ටික වෙනස් වෙවී අපිම තමයි අපි බවට පත්වුණේ."

"ඒක මරු කතාව ලස්සනට ගොතන්න පුළුවන්. තව කියපන්"

"නිකමට හිතපන් අපේ පූර්වජයෙක් - ඌ අපට වඩා වෙනස් එකෙක් - ඌ තමා අර ලොකු ඇස්ටරොයිඩයෙ හිටියෙ. පස්සේ ඌ පුංචි ඇස්ටරොයිඩ වලට ගියා. උඹ දන්නවා ලොකු ඇස්ටරොයිඩයෙ ඉන්නකොට ඇඟ තැලෙනවා. ඇඟේ වර්ධනය අඩුයි. නමුත් කුඩා ඒවායේ එහෙම නෑ. ඉතින් අපි උන්ට වඩා ලොකුයි. උන් තවම ඉන්නවනේ ඇහැට පෙනෙන වෙනස බලාගන්න"

"හරි උඹේ කතාව තවම දුවනවා සාර්ථකව"

"අපි ඉන්න පරිසරය අනුව හැඩ ගැහෙනවා. ඒ අනුව අපි වෙනස් වෙනවා,. ඕකයි මම කියන්නේ"

"හැබැයි මහා මැවුම් යන්ත්‍රය එතකොට අපේ ආහාර නිෂ්පාදන, විලයන එන්ජිම් අභ්‍යවකාශ යානය - ඔව්ව කොහෙන්ද ආවේ"

"පාරෝ මට උත්තරයක් තියෙනවා. මම ඒක හිතාගෙන ඉන්නවා. හැබැයි මම ඒකට සාක්කියක් හෙව්වා. උඹ වගේ දඩාවතේ යන යාලුවෙක් මට ඉන්න එක වටින්න්නේ ඒකයි. උඹ දැන් මාව මෙච්චර දුර එක්කගෙන ආවේ යමක් පෙන්නන්න. ඒ පෙන්නන දේ ගැන උඹ කියූ විස්තර අනුව මම ඔය කතාව ගලපන්නම්"

"ඒක මේ කොහේ හරි තියෙන්න ඕනේ. හාප් ඒකෙ තියෙන ඒවා මට තේරෙන්නේ නෑ. හැබැයි උඹ ඒක ගැලපුවොත් මම උඹව අදහනවා. පූජකයා මාව මැරුවත්."

"උඹ ඒක හොයපන්. මම ඒ අතරේ මගේ කතාවේ ඉතිරිය කියන්නම්. හොඳට බලපන් මේ මතුපිට දිහා, ඇයි මෙතන මේ වලවල්. මෙතන මොකෙක් හරි ඉඳල තියෙනවා. මෙතන වෙන්න ඇති අපි දකින පැරණිම තැන. මෙතන හිටපු අය කවුද?"

"හ්ම්ම්ම් ..."

"එතකොට අපේ හැම ජනාවාසයකම තියෙනවා දේව පණිවුඩ යන්ත්‍රය කියල එකක්. පූජකයා කියන්නේ අපිව මවපු දෙවියන් එක්ක පණිවුඩ හුවමාරු කරගන්නේ එතනින් කියලා."

"ඔව් හැබැයි ඒක ඔහේ තියෙනවා. සම්බන්ධය විසන්ධි වෙලා කියලයි පූජකයා කියන්නේ"

"ඒ සම්බන්ධය විසන්ධි වෙලා කියල තමා ඒ තිරයේ තියෙන්නේ. අර අමුතු සලකුණු පෞරාණික සංකේත වර්ගයක්. ඒ සංකේත වල අර්ථය ඒකම තමයි. මැවුම් යන්තරය අලුතෙන් ජනපදයක් හැදුවම පණිවුඩ යන්ත්‍රයක් ඉබේම හදනවා. ඒක සම්බන්ධය හදන්න උත්සහ ගන්නවා, පූජකයා ස්තෝත්‍ර ගී ගයද්දී. ඒත් හැමදාම ඉවර වෙන්නේ ඔය සංකේත වලින්"

"පූජකයා දිනපතා ඒකට වතාවත් කරන්නේ කවදාහරි ඒ සම්බන්ධය හැදිලා දෙවියන් අප දුකින් මුදා ගනීවි කියලයි"

"කවුරුහරි ඉස්සර අපි එක්ක පණිවුඩ හුවමාරු කරගෙන. ඒ කිසියම් ජීවියෙකුගේ මධ්‍යස්ථානයක් වෙන්න බැරිද?"

"දෙවියන්??"

"කැමති නමක් දාගනින් මම හොයන්නේ ඒ කවුද කියලා. මම හිතන්නේ ඒ අය තමා පස්සේ අපි වුණේ. නිකමට හිතපන් ඒ අය මේ ඇස්ටරොයිඩ මත අතරමන් වුණා නම් මොකද වෙන්නේ කියලා. ක්‍රමයෙන් අප බවට වෙනස් වෙනවා, පරිසරයට හැඩ ගැහෙනවා. පාරෝ අපේ දුරේක්ෂ වලින් දැනට විශාල ග්‍රහ වස්තුන් අටක් සහ කුඩා වස්තු අසීමිත ගණනක් හොයාගෙන තියෙනවා. මේ ඕනෙම එකක තව ජීවින් ඉන්න පුළුවන්"

අවසාන කොටස පාරෝ ගේ හිතට දැනුනේ නැත. සෙවූ දෙය සම්බ වී ඇත. පාරෝ එය රැගෙන වේගයෙන් මතුපිටට පැන ගියේය. හාප් ඔහු පසුපසිනි.

ඇස්ටරොයිඩයේ තනිකර ලෝහභාවය නිසා එහි ස්වරූපය මදක් වත් වෙනස් වී නැත. කළුගල් පුවරුව වසර මිලියන ගණනකට පෙර කලබලේ දමා ගිය තැනක තිබු ලෙසම සුරක්ෂිතව පැවතුනි. ඒ මත නෙලන ලද සූර්යයා සහ ග්‍රහයෝ එදා ද අදද නොවෙනස් ය. ඒවා හඳුනා ගැනීමට හාප් සහ පාරෝ දුරේක්ෂ වලින් ලද දැනුම ප්‍රමාණවත්ය. එහෙත් වඩාත් ඔවුන් කුතුහලයට පත් කලේ ඒ පසුබිම මත නිමවූ ජීවී රූප දෙකයි. ඒ කුතුහලය පසුපස එන විශ්මය ඔවුන්ගේ සිහින් දිගටි සිරුරු වලට දරාගත නොහැකි තරම් විය. දෙවියන් ද දෙවියන් ගේ වාසස්ථානය ද හමුවී තිබේ.

වසර මිලියන ගණනකට පෙර සුන්දර දවසක මනසට සම්බන්ධ නැනෝ චිපයකින් ගත් ස්මෘති සෙල්ෆියක සිනහවකින් මුව සරසා ගෙන ජේසන් සහ එලිසා තෙවැනි ගෝලය මත ආදරයෙන් වැළඳ ගෙන සිටිති. එලීසා ගේ ලස්සන කැරළි කොණ්ඩය සම්පුර්ණයෙන්ම හිතේ හැටියට නිමවන්නට ජේසන්ට කාලය ලැබී තිබුණි.

Friday, May 5, 2017

ක්‍රීඩකයා

[දිනමිණ අප්‍රේල්  29  සහ  මැයි  06  දෙදින  පළ වූ විශේෂාංගයකි]

කොලින් ඩෙනිස් සමරදිවාකර කාර්යාල කාමරයේ හිඳගෙන සිටියි. වැඩිපුර කඩදාසි නැති මේසය මත තරුණයින් දෙදෙනෙකුගේ චායාරූප හිටුවා ඇත. පසෙකින් විසල් ගේ අධිෂ්ටාන පූර්වක ජයග්‍රාහි මුහුණය. අනෙක් පසින් නිසල්ගේ අහිංසක සිනාව පිරුන මුහුණය. ඒ මැද්දේ මේ දැන් රියදුරු විසින් ගෙනෙන ලද සීල් තැබූ ලියුම් කවරෙන් එලියට ගත් රෝහල් වාර්තාව ඇත.

ඔරලෝසුව කාලයේ හිරි කඩයි. තව වැඩිපුර ඉතිරි වී නැත.

කළුවර ලී ලෙස බොහෝ දෙනා සිතන කාල වර්ණ ලීයෙන් කළ මේ ඔරලෝසුව වසර තිහකට පෙර දවසක ඔහොමම කාලයේ හිරි කඩමින් හිටි හැටි සමරදිවාකරට සිහි වේ. එදා ඒ අසල දොන් ආනෝල්ඩ් සමරදිවාකර ආදරණීය පියාගේ මළසිරුර ගාම්බීර ලෙස ඇත්දළ යුවලක් මැද සාලයේ තැන්පත් ව තිබුණි. රාජ රාජ මහාමාත්‍යයෝ ඊට හිස් නවා පැමිණ එවකට මැදිවිය කරා එළඹෙන පුත්‍ර සමරදිවාකර හා අලුත් හිතවත්කම් ඇති කර ගන්නට මෙන් කතා කළහ. සල්ලිකාරයාගේ පුත්‍රයා සල්ලිකාරයා වී ඇත. පරම්පරාවෙන් ද ශූර බුද්ධියෙන් ද කූට උපායෙන් ද සමරදිවාකර වලව්ව මත බිහි වූ දැවැන්ත ප්‍රාග්ධන අධිකාරියේ රියදුරු අසුන පියාගෙන් පුතාට පැවරී ඇත. ඒ වගකීම සහ බලය එහි වූ මරණයේ සීතල මකා දැමීය.

මරණයේ සීතල පමණක් නැවත පැමිණ ඇත. අඩුම ගානේ ළඟ එන බවට පණිවුඩයක් එවා ඇත.

කාලයේ කෙටි ගිණුම් ශේෂය තුල ලබා ගන්නට ලොකු ඉලක්ක නොතිබුණි. සමරදිවාකරට අල්ලන්නට අමුතු ඉරක් හෝ හඳක් නැත. දැනට ඒවා කැරකෙන්නේ ඔහු වටාය. කරන්නට බැරි වූ යමක් වී නම් ඒ පාර්ලිමේන්තුව හා ක්‍රිකට් ආයතනයේ මහා පුටුව පමණි. සමරදිවාකර පාර්ලිමේන්තු නොගියේ එහි ඉන්න අය සමරදිවාකර වලව්වට ගෙන්වා ගත හැකි නිසාය. ඔහු ක්‍රිකට් ආයතනයේ මහ පුටුවට නොගියේ සිය පුත්‍රයා එහි යැවිය යුතු නිසාය.

ක්‍රිකට් ආයතනයේ මහ පුටුව කොහෙත්ම ඔහුට නොහැක්කක් නොවේ. සමරදිවාකර ඉල්ලුවා නම් සුද්දාත් ගුවන් ටිකට් පතක් ගෙන ඇවිත් චන්දය දෙනු ඇත. සමරදිවාකර යනු පාසල් ක්‍රීඩකයෙකි. පළමුපෙළ ක්‍රීඩා නොකළේ ක්‍රීඩා සමාජ වල අගුපිල්හි ලගින්නට හද්දීබ්බාගෙන් ආ නායකයන්ගෙන් පන්දු යවන්නට පිති කරන්නට අවස්ථා ඉල්ලන්නට තිබූ අකමැත්ත නිසාවෙනි. එහෙත් ඔක්ස්ෆර්ඩ් විශ්ව විද්‍යාල ලකුණු පුවරුවල ඔහුගේ නම ඇත. මේ ඇඟේ දුවන ලේ වල ක්‍රිකට් ඇත. ඒ ලෙයින් හැදුනු විසල් සමරදිවාකර පියා නොයා තමන්ට ඉතිරි කළ ඒ මග ජය කෙහෙළි නැංවීය.

පරම්පරාව ගොඩ ගැසූ ඉලක්කම් නිසා කොලින් ඩෙනිස් සමරදිවාකර වටා මිලියන විස්සක දූපත් වැසියා දණ නවන මුත්, වසර දහ අටක ක්‍රිකට් දිවියක ගොඩ ගැසූ ඉලක්කම් නිසා විසල් කැලම් සමරදිවාකර ළඟ ලෝක ජනගහනයෙන් පහෙන් එකක් දණ නවතී. අයිසීසීයේ මහා ක්‍රීඩක ලයිස්තුවේ ඉහලින්ම මෙන්ම කොල්කටාවේ දේවාලයක දේව රූප අතර ද විසල් සිටියි. ක්‍රිකට් විස්තර විචාරකයෝ නවකයින්ගේ විසල් සළකුණු හඳුනා ගනිති. එහෙත් ඒ එකෙක්වත් විසල් කෙනෙකු නොවීම ගැන විස්සෝප වෙති. දෙවසරකට පෙර ජාත්‍යන්තර ක්‍රීඩාවෙන් ඔහු විශ්‍රාම යනවිට මිනිස්සු මගට බැස උද්ඝෝෂණය කළහ. එය පුදුමයක් නොවන්නේ ඔහු එදා ද ද්විත්ව ශතකයකින් සිය සමුගැනීම සැමරු බැවිනි.

ටෙස්ට් ද්විත්ව ශතක විස්සක්. ටෙස්ට් ශතක අසූ අටක්. එක්දින ශතක සියයකට වඩා. ටෙස්ට් තරග එකසිය හතලිහකදී ලකුණු විසිපන්දාස් ගණනක්. සාමාන්‍යය එකසිය විස්සයි. ඩොනල්ඩ් බ්‍රැඩ්මන් සචින් තෙන්ඩුල්කාර් ගාෆිල්ඩ් සෝබර්ස් කුමාර් සංගක්කාර මේ ඕනෑම එකෙක් යම් කිසි දෙයකට ලොව ප්‍රමුඛයන් වී නම් අද ඔවුන් හැම එක සමරදිවාකර නමකට පසුපසිනි.

"මේ තරුණ ක්‍රීඩකයාගේ වාර්තා පුදුමාකාරයි" මීට වසර පහළොවකට පමණ පෙර විසල් සිය විසල් ගමන අරඹද්දී නවකයින් අගයන ඇතැමුන් කියන්නට විය. "ශ්‍රී ලංකාවේ තෙන්ඩුල්කාර්" ඉන්දියන් කාරයෝ තමන්ගේ අවමානය කල්තියා වසා දමන්නට උත්සහ කළහ. "මොහුගේ පිත්ත ජාත්‍යන්තර මිනුම් නීති වලින් පිටස්තරද?" ආඩම්බරකාර සුද්දෝ අහුකොන් සොයන්නට විය. "අක්ෂි ආබාධයකින් පෙනෙන මේ කන්නාඩි පොළඟා දෙනෙත් අගේට පෙනෙන එකාලට වඩා හොඳට ගහන්නේ කොහොමද?" අවලම් විචාරකයෝ විචාරයේ සම්මුති බිඳ දැමූහ. "පන්දුව දෙකට පලන්නට විසල්ට කන්නාඩිය අපෙන්" දෘෂ්ටි විශේෂඥයෝ දැන්වීම් පල කළහ.

එය දැක කොලින් ඩෙනිස් සමරදිවාකර සිනාවිය.

"තාත්තා මට ස්කොල් එකක් වුනත් දෙන්න එයාල කැමතියි" ඒ තවත් වසර පහළොවකට පෙරයි. ඒ වෙද්දී විසල්ට වඩා සය අවුරුද්දක් වයසැති නිසල් ලන්ඩන් උසස් පෙළ යහමින් සමත් වූවා පමණි.

"මෙයාව නම් කීයටවත් යවන්න බැහැ" සමරදිවාකර මැතිණිය පුත්‍රයා ගේ හිස අතගාමින් පැවසුවාය.

"අම්මා එහෙ යුනිවර්සිටි වල මෙහෙ වගේ නෙවි. ස්පෙෂල් නීඩ්ස් සපෝට් කරනවා. රෝද පුටුවකින් ඕනෙම තැනකට යන්න පුළුවන්."

"ඒ වුනාට තනියම ඔහොම ටවුමක ඔයාට ඉන්න බැහැ" අම්මා අම්මාය. තීන්දු දෙන්නේ ඇය යි.

කොලින් ඩෙනිස් සමරදිවාකර මේ දෙබස අසා සිටියා පමණි. මේ බිත්ති හතර ඇතුල ඔහු විසින් මුදා නොගත් එකම කලාපයයි. ඇය එහි පාලනය ගෙන ගියාය.

"තාත්තයි අම්මයි නිසා මට ජීවිතයක් නැහැ" දරාගන්න බැරි වූ විට යොවුන් තරුණයා හඬයි. කවදාවත් කඳුලක් නොසැලු මුත් කොලින් ඩෙනිස්ගේ හිතද ඊට අනුනාද දෙයි. මීට දස වසරකට පෙර මේ විවාදයම ආවේ පුතා පාසලකට දැමීම ගැනයි. ඒ කලක් තිස්සේ ලොව පුරා රෝහල් රාශියක ශල්‍යකර්ම ප්‍රතිකාර තෙරපි ආදියෙන් හෙම්බත්ව හුන් කාලයකි. නිසල් ලෝකයට ආවේ කලාතුරකින් පිහිටන විශේෂ අවශ්‍යතා රාශියක් කැටුවයි. පළමුවෙන්ම ඔහුගේ දෙපා අක්‍රිය විය. එසේම මනසේ කිසියම් සුවිශේශිතාවයක් නිසා ඔහුට සාමාන්‍ය කෙනෙකු මෙන් ජීවත් වීම අසීරු විය. බුද්ධියේ අඩුවක් නොවුවත් ඔහු ජීවත් වූයේ වෙනස් මානසිකත්වයකය. ලොව පුරා වෙදුන් ගෙන් ලද උපකාරයෙන් ඒවා සමහරක අඩුපාඩු මකා ගත් මුත් කොලින් ඩෙනිස් ගේ මහාමේරු බූදලයටත් කළ හැකි දේ සීමා විය.

අවසානයෙ පුත්‍රයාට පාසලකට යා නොහැකි නිසා කොලින් ඩෙනිස් පාසල ගෙදරට රැගෙන ආවේය. නිසල් ලන්ඩන් අධ්‍යාපන ක්‍රමයට නිවසේ උගත්තේ රටේ උසස්ම ගුරුවරුන්ගේ සේවය සමගය. නිසල් ලන්ඩන් උසස් පෙළ සමත් වූයේ ඉහලම මට්ටමිනි.

"what is your dream?" විදෙස් අධ්‍යාපන අවස්තාව අහිමිව හඬන පුත්‍රයා අසළට යන පියා අසයි. ඒ හඬ අනුකම්පා භරිත හෝ ආදර භරිත එකක් නොවේ. සමාගමක විධායකයෙකු පහල සේවකයෙකුට දෙන විධානයක් වැනිය. එහෙත් එහි නොදැනෙන ආදරය නිසල් දනියි.

"I don't know තාත්තා. something engineering"

"huh engineers... do you know how many of them I have in my businesses?"

නිසල් වචන අහුලයි.

"ඉංජිනේරුවෙක් වෙන්න ඕනෙනම් මම සහතිකේ අරගෙන දෙන්නම්. ඒක ජීවිතේට ලොකු දෙයක් නෙවි. අවුරුදු දහයේ පොඩි මල්ලි කියනවා එයා දවසක සචින් තෙන්ඩුල්කාර් ගේ වාර්තා කඩනවලු"

"oh you and your cricket" නිසල් සිය රෝද පුටුව හරවාගෙන යයි.

ලෝකය නම් පිරමීඩයේ මුදුනේ හිඳගෙන සිටීම මිනිසෙකු අමනයෙකු කරතැයි කොලින් ඩෙනිස් සිතයි. නො එසේ නම් සීමාරහිත සිය කටින් රෝද පුටුවේ යන පුත්‍රයාට ක්‍රිකට් ගැන කියන්නේ නැත. උවමනා වුනත් සචින් තෙන්ඩුල්කාර්ගේ වාර්තා කඩන්නට නිසල් ට නොහැක.

"son you still have to tell me, what your dream is" පුත්‍රයා පසුපස යමින් කොලින් ඩෙනිස් පවසයි. දැන් හඬ බාල ය.

"ඇයි ඉංජිනේරුවෙක් වෙන්නේ. තියෙන සිස්ටම් බලා ගන්න ද?"

"හ්ම්ම්ම් නැහැ තාත්තා මට අලුත් සිස්ටම් හදන්න ඕනේ. මට මේ ලෝකය වෙනස් කරන්න ඕනේ. my dreams are bigger than that Indian cricketer, will you let me go there and achieve them?"

නිසල් සුපුරුදු තනිකම පිරුණු කාමරයට ඇතුළු වේ.

"tell me that dream son. I will make it happen" පියා ඒ උත්තරය දුන්නේ ඊට මාස හතරකට පසු දිනකයි. ඒ නිසල්ගේ දහ හත්වන උපන්දිනයයි.

නැවතත් මතකය වර්තමානයට පැමිණේ. කොලින් ඩෙනිස් ගේ මහා මේරු බූදලයට කළ නොහැකි තව දෙයක් මේසය මත වේ. ඒ එහි වූ රෝහල් වාර්තාවේ රතු පාට ඉලක්කම් කීපයක් සංඛ්‍යාත්මකව වෙනස් කර කලුපාට කිරීමයි. සමහරවිට සිංගප්පුරුවේ හෝ ඇමරිකාවේ ගියොත් ... එහෙත් කොලින් ඩෙනිස් ඒ ඉලක්කම් වල අර්ථය දනියි. ඒ ඉලක්කම් මේ දිවයිනේ නොව ලොව කොහේ ගියත් දැන් වෙනස් කළ නොහැක.

එහි නොලියවුණු අනිත් ඉලක්කම ද ඔහු දනියි. ඒ මාස හතරකි. ඔහුට තව ඇත්තේ මාස හතරකි. ඒ මාස හතරේ ඔහුට විසඳන්නට ඇත්තේ එකම එක ගැටලුවකි. එහෙත් එය පියෙකුට මුහුණ දෙන්නට ලැබෙන අසීරුම අවස්ථාවකි. එහි පසෙක විසල් ය. අනෙක් පසෙහි නිසල් ය. දැන් වසර හයකින් තම පියා හා කතා නොකරන කාමරයෙන් එලියට නො එන නිසල් ය.

කොලින් ඩෙනිස් නැවත අතීතයට යයි.

"තාත්තා මේක තමයි මම අහපු පිස්සුම කතාව. MIT ලැබ්ස් හදල තියන්නේ ලෝකේ හොඳම තාක්ෂනය එක්ක. සමරදිවාකර වලව්වේ එහෙම එකක් හදන්න? are you mad?"

"යනවා දැන් ගූගල් එකට. ගිහින් බලනවා ඔය යුනිවසිටියේ ෆයිනන්ෂල් වැලියු එක. ඊට පස්සේ එනවා ඔෆිස් රූම් එකට මගේ වෙල්ත් එක පෙන්නන්න"

"ඔව් බිස්නස් කීපයක් විකුණන්න වෙයි එහෙම එකක් හදන්න"

"I will do that. In fact I am doing that"

""මොකක්? මට ගෙදර ලැබ් එකක් හදල දෙන්න තාත්ත බිස්නස් විකුනනවා. මම හිතුවේ තාත්ත කරන්නේ බිස්නස් සල්ලිවලට ගන්න එක විතරයී කියල"

"මිනිස්සු ඕනෙම දෙයක් එක පාරක් හරි කරන්න එපැයි. හරි දැන් කියමු බලන්න මොන ෆීල්ඩ් එකේ ද රිසර්ච් කරන්නේ"

නිසි නමක් නොමැති මුත් විසල් ඔලොක්කුවට සමරදිවාකර ලැබ්ස් කියා කියන වලව් වත්තෙ පසෙක පිහිටි ගොඩනැගිල්ල හැදුනේ එහෙමය. එතරම් ජයට නැතුව නිකම් බිල්ඩිමක් වගේ හැදුනට එහි ඇතුලේ තිබ්බ තාක්ෂනය ඒ දිවයිනේ රජයෙන් නඩත්තු වන ඉහලම විශ්ව විද්යාලයකවත් නොතිබුණි. කිසිම ශ්‍රේණිගත කිරීමකට ඇතුලත් නොවන නිසා කවුරුත් නොදන්නා මුත් එහි පර්යේෂණ කළ නිසල් සිතු පරිදි එහි තාක්ෂනය සමහරවිට ලෝකයේ කොහෙවත් තිබ්බේ නැත.

නිසල් සමරදිවාකර ජීවත් වුණේ එහිය. කන බොන නිදියන සනීපාරක්ෂා වැනි සුළු කාලයක් හැරෙන්නට ඔහු කලේ පර්යේෂණ පමණි. සාමාන්‍ය යයි කියවෙන වෙනත් බොහෝ මිනිසුන්ට නොමැති හැකියාවක් එකාග්‍රතාවයක් සහ ආසාවක් නිසල්ට කිසියම් දෙයක් ගැන ඇතිකරගත හැකිය. ඔහුගේ පරිගණක ඉංජිනේරු තාක්ෂණ උනන්දුව ඒ මානසික තත්වයට ගැලපුණි. අන්තර්ජාලයෙන් ලෝකයේ හොඳම පර්යේෂණ ගැන හදාරමින් විදෙස් රටවලින් නවතම පරිගණක නිර්මාන ගෙන්වා ගනිමින් ඔහු තනිව සිය ගමන ගියේය.

ඒ ගොඩනැගිල්ලේ අංශ දෙකක් තිබුණි. Photonics Computers හෙවත් ප්‍රකාශ පරිගණක එක අංශයකි. Augmented Reality හෙවත් ආවර්ධිත තත්‍යය එහි අනෙක් අංශයයි.

විසල් මේ ගොඩනැගිල්ල දැක්කේ තම ක්‍රිකට් පිටියේ හරහට ඉදිකළ අනවසර ඉදිකිරීමක් ලෙසිනි. එකොළහෙන් පහළ දහතුනෙන් පහල පහළොවෙන් පහල ආදී ලෙස පියාගේ ලේ උරුමයෙන් ලද ක්‍රිකට් මාවතේ සන්ධිස්ඨාන පසු කරන පුත්‍රයාට සිය සහෝදරයා කරන දෙයෙහි අරුතක් වැටහුනේ නැත. ඒ වෙද්දී ඔහුගේ ලෝකය ක්‍රිකට් ය. එසේම ඔහු එහි කිරුල කරා යමින් හුන්නේය.

සහෝදරයා ගේ පර්යේෂණ වල අරුත විසල්ට වැටහුනේ අහම්බයකින් එක නිමේෂයක එහා මෙහාවකින් ඒ කිරුල හා ක්‍රිකට් ලෝකය ඔහු මත කඩා වැටුණු විටයි. පාසල් පුහුණුවකදී පිත්තේ කොනක වැදී පන්දුව දකුණු ඇසේ වැදුණු පසුවයි. රෝහල් කාමරයේ සිහි එද්දී ඇස වෙලා ඇති රෙදිපට කොලින් ඩෙනිස් ගේ බැරෑරුම් මුහුණ සැඟවූ නමුත් දෙකණට ඇහෙන වචන වැළකිය නොහැකි විය.

"doctor you mean it is permeneant? විසල් ට ක්‍රිකට් ගහන්න බැරි වෙයිද?"

"yes, it is permeneant. මෙහෙමයි මිස්ට සමරදිවාකර, ඔය ඇහැට පෙනීම දෙන්න පුළුවන් ඒත් අඩුපාඩු එක්ක. ක්‍රිකට් නම් ඉතින් අමාරු වෙයි. very low chance. "

"even if we go abroad? ඩොක්ට දැන් කන්නාඩියට කොම්පියුටර් හයි කරන කාලයක්. ගූගල් ග්ලාස් කියල ආවේ"

"හ්ම්ම්ම්ම්.... අපි දැනුවත්ව නම් විදිහක් නැහැ. ඉතින් එහෙනං ගූගල් ගිහින් හදාගන්න වෙයි. කන්නාඩි කොම්පියුටරයෙන් පෙනුම දෙන එකක්"

"ක්‍රිකට් ගහන්න බැහැ තාත්තා එව්වා දාගෙන. නීති තියෙනවා" ලෝකය කඩා වැටුණු වේදනාවෙන් විසල් කී බව කොලින් ඩෙනිස් ට ඇසුණේ නැත.

"තාත්තා මට ඉක්මනින් ම ගූගල් ග්ලාස් එකක් ගන්න ඕනේ" විසල් ගේ අකරතැබ්බය ගැන දැනගත් පසු නිසල් කීවේ එපමණකි. ඉල්ලු වෙනත් සියල්ලක් මෙන්ම එය ද වහාම ගෙන්වන ලදී. ඉන් පසු ගෙවුණු කාලයේ නිසල් ඒ ඇසේ පළඳින පරිගණකය සම්පුර්ණයෙන්ම අධ්‍යනය කළේය.

ඉහළම දෘෂ්ටි විශේෂඥයින්ගෙන් විසල්ට ඉක්මනින් ම උපැස් යුවලක් ලැබුණි. එහි ආධාරයෙන් ඔහු නැවත ක්‍රීඩා කරන්නට උත්සහ කළද එය සාර්ථක නොවීය. සිහිනය බිඳවැටුණු විසල් මානසිකව අසරණ විය. ඔහු දිගින් දිගටම ඒ ගැන සිතීම නිසා විශාද අවස්ථාවකට මුහුණ දී ඇතිදැයි නිවැසියෝ කතා කළහ.

"මට ඔය කණ්නාඩියෙ තව කොපියක් ගන්න බැරිද?" පර්යේෂකයා කිසියම් සැලසුමක් මත ක්‍රියාකරන බව කොලින් ඩෙනිස් ට ඒත්තු ගියේ එදාය.

"ඕක හරියන්නේ නැහැ" අයියාගේ වැඩ ගැන තාත්තා කියූ විට විසල් ඒ ගැන විශ්වාස කලේ නැත. "අනික හරි ගියත් ඕක අහුවෙන්න පුළුවන්"

"do not underestimate him son. මිනිහ හදල තියෙනවා තනිකර light rays වලින් වැඩ කරන කම්පියුටරයක්. ඉලෙක්ට්‍රොනික් මොකවත් නැහැ"

"ඉතින් ..."

"ඒ ටෙක්නොලොජිය තමා මේකට ගන්නේ. ඒ කියන්නේ ඔය කන්නාඩිය කිසිම කෙනෙකුට සැක කරන්න පුළුවන් එකක් නෙවෙයි. පිටින් කිසිම වෙනසක් නැහැ"

සහෝදරකමට යා හැකි සීමා නොමැත. තෙවසරක් නිදිවර්ජිතව ලෝකය පෙරළු නිසල් විසල්ට දුන්නේ අරුම කන්නාඩියකි. තාත්තා කියූ සේම එය ගූගල් ග්ලාස් වැනි පරිගණකයකි. එහෙත් එය ගූගල්ට වඩා ආලෝක වර්ෂ ගණනක් ඉදිරියට ගොස් තිබුණි.

දෘෂ්ටි විශේෂඥයින් තැනු වීදුරු මෙවලම මත සුවිශේෂී ප්‍රකාශ සංවේදී පාරදෘශ්‍ය තට්ටුවක් අතුරා තිබුණි. ඒ මත ඇතිරෙන ආලෝක කිරණ මගින් ඇසට පරිගණක තිරයක් සපයයි. කන්නාඩිය සවිකළ කළු පැහැති රාමුව බාහිර ආලෝකය සීල් තබන ලද ප්‍රකාශ පරිගණකයකි. එහි ඇති ප්‍රකාශ තන්තුමය සංකීර්ණ ව්‍යුහයන් පරිගණක ලොජික් ගේට්ටු සේ ක්‍රියාකරන්නට සමත් ය. එහි සියලු කටයුතු සිදු වූයේ ආලෝක කිරණ වලිනි. එහි ඉලෙක්ට්‍රොනික චිපයන් තිබුනේ නැත.

වේගයෙන් එන පන්දුව දකින්නට ආබාධිත ඇසට අවශ්‍ය වෙනස් කම් පමණක් නොව පන්දුව සූම් කරන්නට, එහි දෝලනය ඉරි ගසා පෙන්වන්නට, එහි වේගය ගැන ඉලක්කමක් පසෙක පෙන්වන්නට ආදී ලෙසින් ක්‍රිකට් ක්‍රීඩාවට අවශ්‍ය සියලු උපාංග එහි විය. පෙනුමෙන් එය නිකම්ම නිකම් කන්නාඩියකි. ක්‍රීඩාවේ නිලමක්කාරයෙක් කවදාවත් සැක නොකරන කන්නාඩියකි.

එයට නමක් නොවීය. එවැන්නක් ලොව කොහෙවත් හදා නැත. එවැන්නක් එම ගොඩනැගිල්ලෙන් පිටට කවදාවත් ගොස් නැත.

විසල් තව වසර පහකින් ජාත්‍යන්තර පිටියේ බෝල පලද්දී ඒ ගොඩනැගිල්ල ද තවදුරටත් එතන තිබුනේ නැත. කණ්ණාඩියේ බලයෙන් සහ පියාගේ හයියෙන් දහනවයෙන් පහල සිට ටෙස්ට් කණ්ඩායම දක්වා පැමිණි පසු රහස රහසක් සේ වැළලීමට සමරදිවාකර පියාට අවශ්‍ය විය. ඒ සියල්ල සැබෑ කළ පර්යේෂණාගාරය එහි ම ගොදුරක් විය.

නිසල් කාමරයට තල්ලු විය. ඔහුගේ පර්යේෂණ වල ප්‍රධාන සැපයුම්කරු සියලු සැපයුම් අකාරුණික ලෙස කපා දැමීය. නිසල් ගේ ආශාවේ අන්තය සමරදිවාකර දැක්කේ නැත. සල්ලි ඕනෙනම් නිසල්ට බූදලයක් තිබේ. බිල් ගේට්ස් කෙනෙකු සර්ජි බ්රින් කෙනෙකු හා තමන් අතර ඇති ඉලක්කම් වෙනස අර්ථ විරහිතය. ඔවුන් ලොව යමක් ගන්නේ නම් තමාටද එය ගන්නට පිළිවන. ඉතින් මේ පර්යේෂකයා නිදි වර්ජිතව කරනුයේ සිය මනසේ අනවශ්‍ය ලෙස වර්ධිත ෆැන්ටසි සැපිරීමක් ලෙස පියා සිතීය. එහෙත් ඔහු අතින් බිහි වූ නිර්මාණය පළඳින බාල පුතු ලෝකය ආක්‍රමණය කර ජුලියස් සීසරයෙකු මහා ඇලෙක්සන්දරයෙකු සේ එහි තම නම සනිටුහන් කරයි. පළමුවරට පියා එක පුතෙකු හඬවා අනිකා සතුටු කළේය.

කාලයක් තිස්සේ සිය නිර්මාණය ලෝකයට හෙළි කොට එහි වටිනාකම් ගන්නට නිසල් ඉල්ලීය. එහෙත් එය සහෝදර ප්‍රේමයෙන් නහවා යටපත් කරන්නට ශූර ව්‍යාපාරිකයා සමත් විය. කාලය ඉදිරියට ගොස් විසල් විසල් ලෙස ලොව මත එසවෙද්දී නිසල්ගේ සිත තුල ඇති ආදරය යටින් ඊර්ෂ්‍යාව මතුවිය. තම සහෝදරයා තම නිර්මාණයෙන් ලෝකය දිනද්දී තමා තම සිහිනය අහිමිව නිවාස අඩස්සියේය. එය සාධාරණ ඊර්ෂ්‍යාවකි.

නිසල් පියාට වෛර කළේය. කතා බහ නතර කළේය. තම සහෝදරයා සමග සහයෝගයෙන් ඉන්නට නොහැකි බව දුටු විසල් ඔහු මගහැර අතහැර දැම්මේය. නිසල්ගේ අස්ථාවර මනස බිඳ වැටුණි. ඔහුගේ තත්වය සමාන වූයේ මානසික වියවුලකින් පෙලෙන්නේකුටයි. නිතර මනෝ වෛද්‍යවරු ඔහු බැලීමට ආහ. ඔහු නිතර කියවන සමරදිවාකර ලැබ්ස්, ෆොටෝනික්ස්, ඔග්මන්ටඩ් රියලිටි මේවා කිසියම් උමතුවක විකාරරූපී දර්ශන ලෙස ඔවුන්ගේ වාර්තාවල සටහන් විය.

දැන් මේ අවසාන මොහොතයි. යම්හෙයකින් තමා ලෝකයාට ඇත්ත කිවහොත් නිසල් ගේ තත්වය සාමාන්‍ය වී ඔහු ලෝකයේ ඉදිරිගාමිම මිනිසෙකු ලෙස සනිටුහන් වීමට ඉඩ ඇතිබව කොලින් ඩෙනිස් සිතයි. ඔහු දිනෙක එවැන්නක් කිරීමට සිතා උන් නමුත් ක්‍රිකට් වාර්තා පොත් වලින් විසල් ගොඩ නැගු ලෝකය ඒ අදහස යටපත් කළේය. නිසල් ට ඒ ගෞරවය දුන්නොත් එදාට විසල් නම් කූට දුෂ්ටයා ක්‍රිකට් ලෝකයේ අවමන මැද වනසා දැමෙනු ඇත. නැවත ඩොනල්ඩ් බ්‍රැඩ්මන් සචින් තෙන්ඩුල්කාර් ගාෆිල්ඩ් සෝබර්ස් කුමාර් සංගක්කාර තමන් හිටි තැනට එනු ඇත.

කළ යුත්තේ කුමක්ද? ඇලපතින් එන වේදනාව දරාගනිමින් කොලින් ඩෙනිස් සමරදිවාකර මේසය මත හිස තබා ගත්තේය.

Friday, April 7, 2017

ගමන

[අප්‍රේල් අට දිනමිණ විශේෂාංග අතිරේකයේ පළවූවකි]


සමාරම්භක සටහන:

මෙය අපේ ඉතිහාසයේ අද්විතීය මොහොතකි. මේ සාඩම්බර මොහොතේ පෙර ගමන් කරුවෙක් වන්නට ඉඩ ලැබීම මා ලද භාග්‍යයක් කොට සලකමි. අප විසින් අරඹන දිගු ගමන මෙහි අද සිටින අප කිසිවෙකුට නිමා කළ හැක්කක් නොවේ. මේ ගමනට අඩුම ගණනේ පරම්පරා හතක් පමණ අවශ්‍යය. ඒ නිසාම මියයන අය වෙනුවට අලුත් අය එකතුකරමින් පරපුරින් පරපුර හුදු කුතුහලය විසින් ඇදගෙන යන අපූර්ව ගමනකි මෙය. එහි අනෙක් කෙලවරේ අප පිලිගන්නේ හිතවත් සහෝදර ප්‍රජාවක් විසින් ද නො එසේ නම් නපුරු රාක්ෂයින් පිරිසක් විසින්ද කියා අප දන්නේ නැත. අප කවදාවත්ම දැන ගන්නේද නැත.

එහෙත් ඉතිහාසය පුරා අප මෙහෙයවූ ඒ මහා කුතුහලයේ බලවේගය හෙවත් දැනුම එකතු කිරීම උදෙසා මගේ ඉතිරි මුළු ජීවිතයම මේ ගමන් කරන සිර මැදිරිය තුල සිර කර ලන්නෙමි, දිනක මගේ මළ සිරුර මෙම යානය තුල ප්‍රතිචක්‍රීකරණය වී කෙළවර වුවද කවදාවත් මා නොදකින ඒ අනාගත මොහොත වෙනුවෙන් ජීවත් වන්නෙමි. යානයේ අරුම පුදුම එන්ජින් ක්‍රියාත්මක වන හඬ සමග අපගේ සියලු මතකයන් රැගෙන අපෙන් ඈත් වන ඒ සොඳුරු මව් තාරකාවට අවසන් වරට සමුදෙන්නෙමි ආදරයෙන්.



දෙවැනි පරපුර:

විද්‍යාව වෙනුවෙන් උපන් පරපුර අප වන්නෙමු. අපේ සිරුරු තුල දිවෙන මූල ද්‍රව්‍යයන් විද්‍යාව වෙනුවෙන් මියගිය අපේ පූර්වජයන්ගේ සිරුරු වලින් ප්‍රතිචක්‍රීකරණය වූ ඒවාය. කිසිදා නොදුටු අපේ ලෝකයක් ගැන සුරංගනා කතාවක් අසමින් අපි ඉපදුනෙමු. කිසිදා නොදකින ඔවුන්ගේ ලෝකයක් ගැන සුරංගනා කතාවක් සිතා ගනිමින් අප මියෙනු ඇත. ඒ ලෝක දෙක අතර මේ විසල් යානයේ බලාපොරොත්තු සහ සිහින වෙනුවෙන් අප ජීවත් වන්නෙමු.

"මා මේ අඩ අඳුරු කොරිඩෝ තුලින් අනාගතය දකිමි" යානයේ නව නියමු ධුරය භාර ගනිමින් අපේ කණ්ඩායම් නායකයා පැවසීය. "අප එහි යන්නේ ඇයිදැයි නො විමසන්න. අප එහි නොයා යුත්තේ ඇයිදැයි පමණක් විමසන්න. විසල් අහස යට තනිව තනිවූ ප්‍රජාවක් ලෙස දිවි ගෙවූ අප විශ්වීය සහෝදරයෙකු සොයා යන නොතිත් ආශාවෙන් පෙලුනෙමු. එවැන්නෙක් නොපවතී ද අප මේ විශ්වයේ තනිවූ ප්‍රජාවක්ද යන බියකරු සිතිවිල්ලෙන් අප බියට පත්වීමු. ඈත තරුවක් පායා අපට ආලෝකය දුන්නේ එවිටයි. ඇත්තෙන්ම අපට ඔවුන් දුන්නේ අඳුරකි. තාරකාවේ දීප්තිය විටින් විට අඩු කරවන අඳුරකි. එහෙත් බලාපොරොත්තු ඒකාලෝක කරන්නට ඒ අඳුර සමත් විය. තාරකාවක ආලෝකය විටෙන් විට අඩු කරන ඒ දැවැන්ත ආකෘතික ව්‍යුහයන් නිර්මාණය කලේ කවුද? කවදා හෝ මේ යානය තුල උපදින්නෙකු එය දැනගනු ඇත. ඒ වෙනුවෙන් ඔබ අප මේ කරන කැප කිරීම විද්‍යාව වෙනුවෙන් උපන් පළමු පරපුරේ සාමාජිකයෙකු ලෙස ආඩම්බරයෙන් සිහිපත් කරමි."


අතරමග:

මා කවුද යන්න මා ද නොදන්නා කරුණකි. ජීවියෙකු ලෙස ඉපදුනද යන්ත්‍රයක් සේ මියයන බව නම් ස්ථිරවම දනිමි. මා පුරවැසියෙක් ද යන්ත්‍රයක් ද යන විවාදය ලෝකය දැනගත්දා සිට මා පෙළන ලද්දකි. කොටින්ම ලෝකය නම් භාෂාමය ප්‍රයෝගයේ සැබෑ අර්ථය පවා දිගු සිලින්ඩරාකාර කුහර සහිත මේ යානය පමණි. මා මේ සිර මැදිරියේ කරන්නේ කුමක්ද? මා එහි ප්‍රාදුර්භූත වූයේ ඇයි? මම සිතමි. මගේ උපතට බොහෝ පෙර තීන්දු කරන ලද මගේ මරණින් බොහෝ පසු අරුත් ගැන්වෙන හෝ නොවන මට කිසිම තේරුමක් නැති එදිනෙදා කාර්යයන් අතරේ හැමදාමත් මා කවුද යන පැනය ගැන සිතමි. ජීවිතය යනු මෙයද? අන්ධකාර කොරිඩෝ දිගේ කෘතීම ක්‍රීඩාගාර අස්සේ ගෙවෙන මේ කාලය මීට වඩා අර්ථවත් විය හැකිද? හෙට දවසේ අප නොවන අපේ අනාගත පරපුර හමුවන කවුදෝ අමුත්තෙකු ගැන මිත්‍යා විශ්වාසයක එල්බ අපේ ජීවිත මෙසේ ගෙවී යා යුතුද?

පෙර පරපුරු දෙකක් කුතුහලයෙන් වෙළා දමන ලද ඒ බලාපොරොත්තු ක්‍රමයෙන් ක්ෂය වෙමින් පවතියි. අප මේ ගැන යමක් කළ යුතුද නො එසේ නම් දෛවයට ඉඩ දී ඔහේ නිකම් සිටිය යුතුද?


කැරලි:

මේ යානයේ සිදු වූ තෙවැනි කැරැල්ලයි. එය ද සාර්ථක ලෙස මර්දනය කළෙමු. පෙර අවස්ථාවල මව් තාරකාව සමග සම්බන්ධතා පවත්වා තීන්දු ගන්නට මෙන්ම කැරලි කරුවන්ගේ මොළ ශෝධනය සඳහා අවැසි නව වැඩසටහන් ගෙන්වා ගන්නට අපේ පූර්වජයෝ සමත් වූහ. එහෙත් සිව්වන පරපුරේ අප සිටිනුයේ මව් තාරකාවෙන් සැලකිය යුතු දුරකය. ඒ නිසා සියල්ල අප විසින් විසඳා ගත යුතුවේ. මව් තාරකාවෙන් ලැබෙන දෑ යෙදවිය හැක්කේ ඊළඟ පරපුර වෙනුවෙන් පමණි.

ආගාධයේ මේ තනිකම නිසා මා දරදඬු වූවා දැයි නොදනිමි. සහෝදර විද්‍යාර්ථින් තිදෙනෙකු ප්‍රතිචක්‍රීකරණ පද්ධතියට පණ පිටින් ඇතුළු කිරීම මින් පෙර නොකළ අධම ක්‍රියාවකි. එහෙත් ඒ මොළ තවදුරටත් ශෝධනය කළ නොහැක.

ඔවුන් ඉල්ලන්නේ කුමක්ද? ආපසු යාමට ගමනාරම්භයට ඇති දුර ගමනාන්තය ඇති දුර තරම්ම වූවකි. මේ කිසිවෙක් ඒ දිගු ගමන නිමා කරන්නේ නැත. වෙනත් යා හැකි මගක් කෙටි ගමනාන්තයක් හෝ වෙනස් වූ ජීවිතයක් ගැන කිසිම විකල්පයක් නොමැත. යානයේ ඉපිද යානයේ මියෙන අප අතර මේ බෙදුම් කෝලාහල ඇතිවන්නේ ඇයි?

නොවැලැක්විය හැකි දරදඬු තීන්දු ගැන පසුතැවෙන එකම නායකයා මා නොවනු ඇත. එහෙත් මේ අනවශ්‍ය චිත්ත වේදනා අපේ ගමනේ අරමුණෙන් අප තවත් ඈත් කරනු ඇත.


මස්තබාල්දු:

අපි උපන්නේ ඇයි? ඉන්න ටිකේ ඔහේ ජොලියේ ඉන්න. ජොලිය කිව්වට ලොකු ජොලියක් නෙවි. මේ පුංචි පාවෙන හිරගෙදර මහා දෙයක් කරන්න බැහැ. අපි පස්වෙනි පරපුර. උත්තරීතර අරමුණු ගැන හිතුවේ පළමු පරපුර. විද්යාව වෙනුවෙන් උපන්නේ දෙවැනි පරපුර. පැවැත්ම ගැන ප්‍රශ්න කලේ ඒ ප්‍රශ්න කිරීම් මත කැරලි ගැහැව්වේ තෙවැනි හා සිව්වෙනි පරපුරවල්. කවදා හෝ මේ ගමනේ කෙළවර දකින්නේ අපිට පස්සේ එන හත්වැනි පරපුර.

අපි පස්වෙනි පරපුර. අපි කැරලි ගහන්නේ නැහැ. ඊට අවශ්‍ය මානසිකත්වය නැතිවෙලා. පශ්වාත් කැරලි යුගවල අපේ ජීවිත ඔහේ නිකම් ගෙවෙනවා. අපි ඔහේ නිකම් ඉන්නවා. මව් තාරකාවෙන් එව්ව මොළ ශෝධනයන් ලැබෙද්දී පෙර පරම්පරාවල් කැරලි වලින් මරාගෙන හිටියේ. දැන් හැමෝටම ඒවා ලබා ගැනීම අනිවාර්යයි. ඒවා හරි ප්‍රබල කතා. කවදාවත් නොදුටු මව් තාරකාවෙ ජීවිතය ගැන විද්‍යාවේ අරමුණු ගැන උත්තරීතර කැපකිරීම් ගැන. ඒත් මේවා අපිට කාන්දු වෙන්නේ නැහැ. හැබැයි මේවා නිසා අපි ඔහේ කාලය කා දමමින් අපිත් නොදන්නා මේ ගමනේ අපේ යුගය ගෙවනවා.


අවිශ්වාසය:

"උඹ හිතන්නේ උන් මොනවගේ ජීවින් කියලද?" මගේ සගයා අහනවා.

"අනේ මන්දා. මම හිතන්නේ ඔය උෂ්ණත්වයේ ජීවයට අවශ්‍ය ප්ලාස්මා තත්වයන් පවතින්න මාර අමාරුයි. ඇත්තෙන්ම ඕක ස්වාභාවික සංසිද්ධියක් වෙන්න බැරිද? මං කිව්වේ අජීවී එකක්"

"ඒ චින්තනය වැරදියි. ප්ලාස්මා වලින් අපි හැදුනට ....."

"ඔහොම හිටින්. මම ප්ලාස්මා වෙන්නම ඕනේ කියන්නේ අපි ප්ලාස්මා වලින් හැදුනු නිසා නොවේ. ප්ලාස්මා තමයි විශ්වයේ සුලබම ද්‍රව්‍යය"

"තාර්කිකව නිවැරදියි එහෙත් එපමණකින් ප්ලාස්මා ම වෙන්න ඕනේ නැහැ නේද?"

"අපි දකින්නේ අපට ග්‍රහණය කළ හැකි දේවල්. ප්ලාස්මා නොවන ජීවයක් ගැන උඹට පැහැදිලි කරන්න පුලුවන්ද? මට හිතාගන්න බැහැ. ජීවය ඇත්නම් එය ප්ලාස්මා තුල තියෙන්න ඕනේ කියා මම හිතනවා."

"වැඩක් නැහැ වාද කරලා. අපි හයවෙනි අවාසනාවන්ත පරපුර. ඉලක්කය නූලෙන් අහිමිවන. අපි කවදාවත් ඒ ජීවින් දකින්නේ නැහැ"

"අනේ මන්දා බං. උඹත් එක්ක මෙව්වා වාද කරනවා. ඒ වුනාට ඇත්තෙන්ම මට ඔය මෙලෝ දෙයක් විශ්වාස නැහැ."

"හ්ම්ම්ම් ..."

"නැහැ මම කියන්නේ දැන් ඔහොම කතාවක් අපිට කිව්වේ කවුද? මව් තාරකාව කියන්නේ කොහේ තියෙන එකක් ද ? තවත් තාරකාවක් වටේ කැරකෙන විශාල ව්‍යුහයන් හදාපු ජීවින් ඉන්නවද? මේ ඔක්කොම මහා බොරුවක් වෙන්න බැරිද?"

"ඇත්තම කිව්වොත් මටත් මේවා විශ්වාස නැහැ. මේ සියල්ල දැන් පරපුරෙන් පරපුරට ආපු ප්‍රබන්ධ වගේ. අපි මොකද්ද කරන්න ඕනේ. ආගමක් වගේ මේවා අදහනවද? නැතිනම් ..."

"නැතිනම් මොකද්ද කරන්නේ? ඔහේ තර්ක කර කර ඉන්න එක"

"හ්ම්ම් ..."


නො හමුව:

විශ්වයේ ඇත කෙළවරක සිට ජීවයේ සළකුණු දැක මේ සා දුරක් ගෙවා ආවෙමු. බොහෝ දෙනා කී පරිදි අප වාසනාවන්ත පරපුරකි. එහෙත් සත්‍යය වෙනස්ය.

වාසනාව නම් අප මේ දුර ගෙන්වන ලද ඒ විසල් ලෝහමය ආකෘති කරා ලඟා වීමට අප සමත්වීමයි. මධ්‍යම ප්‍රමාණයේ සූර්යයයෙකු වටා යන ග්‍රහ පද්ධතියක තෙවැනි ග්‍රහයා මූලික කරගෙන අභ්‍යවකාශයේ නිර්මාණය වූ විශාල ආකෘති අධ්‍යනය කිරීමේ භාග්‍යය අපට හිමි විය. ස්ව්‍යන්ක්රිය යාන්ත්‍රික පද්ධතියකින් මෙහෙයවෙන ඒ ආකෘති අදටත් ක්‍රියාත්මක වේ.

එහෙත් ඒවා හිස් ය. තෙවැනි ග්‍රහලෝකය සහ ඒ අවට ඉදි වූ විශාල ආකෘති කිසිවක යාන්ත්‍රික නොවන ජීවය ලෙස හඳුනාගත හැකි කිසිවක් අප දුටුවේ නැත. මෙම පද්ධතිය නිමවූ බුද්ධිමත් ජීවින් කොහිද? කිසියම් ව්‍යසනයකින් ඔවුන් සපුරා වඳ වී ගොස් ද?

ජීවය පවතින ප්ලාස්මා මෙහි කොහෙවත් නොමැත. එසේ නම් අප හට ග්‍රහණය නොවන ලෝහ කාබන් සහ සිලිකන් අතර කොහේ හෝ බුද්ධිමත් ජීවයක් පවතීද?

සිත් තැවුලින් අපේ ගමන නිමා කරන්නෙමු. අටවැනි පරපුරකට අවශ්‍ය ශක්ති ප්‍රභවයන් යානයේ නොමැත. අවසන් වරට මව් තාරකාවට දැනුම් දීමට ඇත්තේ බුද්ධිමත් ජීවයක සළකුණු ඇති නමුත් අප අතර කිසිම හමුවක් සිදු නොවූ බවයි.


Friday, March 10, 2017

සුරතල් මිනිසා

[මාර්තු  11 දිනමිණේ පලකළ විශේෂාංගයක්]

"කාල්සන් මහත්මයා. හදිසි තත්වයක්. ඔබේ අවධානය අවශ්‍යයි. වහාම පද්ධතියට අනුයුක්ත වන්න"

"මම නිවාඩුවක පස්සේ කතා කරමුද?"

"මහත්මයා ... මේ මොහොතේ ඔබේ පූර්ණ අවධානය අවශ්‍යයි"

"මොකද්ද ගැටළුව?"

"සමාවන්න ඔබේ නිවාඩුව මැද්දේ කරදර කරන්නට සිද්ධ වුනාට. මම නිකොල්. හදිසි අවස්තාව තුල ඔබේ සම්බන්ධීකරණය වෙනුවෙන් පද්ධතිය නිර්මාණය කළ කෘතීම බුද්ධි වැඩසටහනක්. මෙම හදිසි අවස්ථාවේ මුළු කාලය පුරාම ඔබේ පුද්ගලික සහායිකාවක් ලෙස දිගටම ඉන්න මම බලාපොරොත්තු වෙනවා"

"නිකොල් මම ආලෝක වර්ෂ ගණනක් එහා සප්ත තාරකා පද්ධතියක නිවාඩුවක් ගෙවමින්. මගේ නිවාඩුවටත් බාධා කරන්න මෙයනම් අපූරුම හදිසි අවස්තාවක් වෙන්න ඕනේ"

"ඔව් මෙය ඇල්ෆා වර්ගයේ හදිසි තත්වයක්. උපරිම මට්ටමේ."

"මේ මොන අවුරුද්ද ද නිකොල්?"

"පොදු යුගයෙන් වර්ෂ අටදහස් හාරසිය විසි වැන්න. ඔබ ඇයි එහෙම ඇහුවේ?"

"විශ්වය විනාශ වෙන්න වත් යනවද බලන්න"

"කාල්සන් මහතා මෙය විහිළුවට කාරණයක් නොවේ. අපට ඇත්තේ සීමිත කාලයක්. ඔබේ දිගුකාලින ආරක්ශාව පතා අපි ඔබව බැකප් කරන්නයි යන්නේ. ඒ සඳහා ඔබේ අවසරය අවශ්‍යයි"

"මාව? බැකප් කරන්න? ඒ මොකද්ද? මම අහල තියෙනවා අමරනීයත්වයේ වගන්ති අතර බැකප් කිරීමක් ගැන, ඒත් හරියටම ඒ මොකද්ද? ඔබට එය පැහැදිලි කළ හැකිද?"

"පෙර කී පරිදි මේ අවස්ථාවේ ඔබේ සියලු සම්බන්ධීකරණය කරන්නම තමා මා බිහිවුනේ සහ කැප වී ඉන්නේ. අපට පැයකට මදක් අඩු කාලයක් තියෙනවා. ඒ නිසා ඔබට මේ කරුණු පැහැදිලි කරන්න පුළුවන්."

"බොහොම ස්තුතියි නිකොල්. මම මේ අමරණීයත්වය ගැන දන්නේ බොහොම ටිකයි"




"බොහෝ දෙනෙක් අමරණීය වුනාට එය කරන ආකාරය දන්නේ නැහැ. අමරණීයත්වය කියන්නේ ඔබේ මනස සිරුරකින් තවත් සිරුරකට මාරු කළ හැකි තාක්ෂනයට මහත්මයා. එසේ මනසක් ඇතුළු කළ හැකි නිරෝගී අප්‍රාණික මිනිස් සිරුරු නිපදවීම තමා මේ තාක්ෂණයේ ආරම්භය. ඒ සමග මිනිසා අමරණීය කරන්න අපි සමත් වුනා"

"අපි කිව්වේ?"

"අපි කිව්වේ පද්ධතිය ඒ කියන්නේ සියලු මිනිස් ක්‍රියාකාරකම් මෙහෙයවන්න බිහි කරපු යන්ත්‍ර, ජාල සහ වැඩසටහන් සමූහය. මිනිසාගේ සුබ සිද්ධිය උදෙසා සිතීමේ හැකියාව ඇති පද්ධතියක් මිනිසා නිර්මාණය කළා. ඉනික්බිති මිනිසාගේ සියලු පහසුකම් සැපයීම කලේ අපි."

"ස්තුතියි. එතකොට බැකප් කරනවා කියන්නේ?"

"අමරණීයත්වය සඳහා කෙනෙක් පද්ධතිය සමග ගිවිසුමකට එද්දී පද්ධතිය බැඳිලා ඉන්නවා ඒ පුදගලයා සියලු තත්ත්ව යටතේ සුරකින්න"

"අනිවාර්යයෙන්ම"

"ඇත්තෙන්ම කිව්වොත් පද්ධතිය සුරක්ෂිත වන සියලු තත්ත්ව"

"හ්ම්ම්ම් "

"එතකොට මහත්මයා ඔබේ වත්මන් ශරීරයට අනතුරක් වේ නම් ඔබට නව ශරීරයක් දෙන්න අපි බැඳිලා ඉන්නවා. කොටින්ම ඔබ එය දන්නෙවත් නැහැ. ඔබට එය සුළු නින්දක් වගේ දැනෙන්න පුළුවන්. සමහරවිට එහෙමවත් නොදැනෙයි"

"වෙන්න ඇති ඇත්තෙන්ම මට මගේ ශරීරය කියන එක ගැන අහල තිබ්බට කිසිම අවබෝධයක්වත් නැහැ"

"ඇත්තෙන්ම ඔබ හරි මොකද මනස විවිධ අතත්‍ය පද්ධති රාශියක් එක්ක ව්‍යාජ සැබෑවක් ලෙස සම්බන්ධ වෙලා ඉන්නේ. පාර භෞතිකයේ තට්ටු ගානක් එහා තියෙන මනසට භෞතික සිරුර ඒ තරම් ග්‍රහණය වන්නේ නැහැ. ඉතින් ඔබට ඔබේ ශරීරය ගැන මනා දැනීමක් අවබෝධයක් නැතිවෙන්න පුළුවන්. එහෙත් මනස ක්‍රියාත්මක වන්නේ ශරීරය තුල මහත්මයා."

"එතකොට මොකද්ද මේ බැකප් කතාව"

"බැකප් කරන්න වන්නේ කිසියම් තත්වයක් තුල ඔබට අපට ශරීරයක් දෙන්න බැරි වුනොත්."

"ම්ම්ම්ම්ම් එහෙමත් වෙලා තියෙනවද?"

"මීට පෙර එහෙම වෙලා නැහැ කාල්සන් මහත්මයා. ඒත් එය විය හැකි දෙයක් නිසා එය සඳහන් වෙනවා අමරණීය වීමේ ගිවිසුමේ"

"බැකප් කලාම වෙන්නේ මොකද?"

"ඔබේ මනස දත්ත සංචිතය තුල අක්‍රීයව තැන්පත් කෙරෙනවා. හරියටම ඔබ නිදාගෙන වගේ. කවදා හෝ සිරුරක් ලැබුනම නැවත එය ඒ සිරුර තුලට ඇතුළු කළ හැකියි"

"ඒ සඳහා කොච්චර කාලයක් යනවද?"

"හරියටම කියන්න බැහැ. ඔබ වේටින් ලිස්ට් එකකට ඇතුළු වෙනවා"

"ඉතින් ඇයි මේක මගෙන් අහන්නේ? ශරීරයක් දෙන්න බැරිනම් වෙන කරන්න දෙයක් නැහැනේ"

"ඔබේ අවසරය අවශ්‍යයි මහත්මයා. ගිවිසුම අනුව එහෙමයි තියෙන්නේ"

"හොඳයි මම බැහැ කිව්වොත් මට තියෙන අනෙක් විකල්ප මොනවාද?"

"අමරණීයත්වය තවදුරටත් පවත්වා ගන්න බැහැ. එක්කෝ ඔබට මේ මොහොතේ කලබල රහිත මරණයක් තෝරා ගන්න පුළුවන් නො එසේ නම් ඔබට හදිසි තත්වයට මුහුණ දීලා ඒ තුලින් පණ බේරාගැනීමේ අවදානම් ක්‍රියාව තෝරන්න පුළුවන්. අපි තවදුරටත් වග කියන්නේ නැහැ"

"මම හිතන්නේ නැහැ මම ඒ දෙකම තෝරයි කියලා. ඒත් නිකොල් මට තව තරමක් වෙලා තියෙන නිසා මම ආසයි ඔබෙන් දැනගන්න තව විස්තර. මොකද්ද මේ මහා ලොකු හදිසි තත්වය?"

"විශාල ග්‍රහකයක් මව් ග්‍රහලෝකයේ වදින්න එනවා කාල්සන් මහත්මයා. ඝට්ටනයට තව පැය කීපයයි තියෙන්නේ"

"ග්‍රහකයක් ... ඔබ මාව හිනස්සනවා. තාරකා පද්ධති අතර ගමන් යන වෙනත් සූර්යයන් ගේ ග්‍රහලෝක වල නිවාඩු නිකේතන තනාපු අපිට ග්‍රහකයක් මව් ග්‍රහලෝකේ වදින එක ගැටලුවක් වෙලා. ඇයි ඔබට බැරිද එය පුපුරුවා දමන්න"

"කුඩා ග්‍රහක පුපුරුවා දැමීම සාමාන්‍ය දෙයක් කාල්සන් මහත්මයා සියවසකට දෙකකට වරක් සිද්ධ වෙන දෙයක්. ඒත් විශාලත්වයන්ගේ සීමා තියෙනවා. මෙය විශාලත්වයෙන් වැඩියි. අනික එය ඝට්ටන මාර්ගයක බව දැනගන්න ඉතා කෙටි කාලයක් අපට ලැබුනේ. මව් ග්‍රහලෝකය අවට ආකාශ වස්තු වල අසාමාන්‍ය කැළඹීමක් නිසා මෙය හදිසියේ අප දිහාට එන්න ගත්තේ. මෙය අපේ තාක්ෂණික සීමා තුල නොවැලැක්විය හැකි තත්වයක්. කළ හැකි සියල්ලම කළත් එහි කොටසක් හෝ ගැටෙනවා"

"හරි ඉතින් වැදුනාවේ. මම ඉන්නේ ඔතනට ආලෝක වර්ෂ ගණනක් දුර සප්ත තාරකා පද්ධතියක"

"සමාවන්න කාල්සන් මහතා ඔබ මනුෂ්‍ය සංචරණය ගැන මූලික කාරනා දන්නේ නැහැ වගේ. ඔබ කියන්නේ ඔබේ මනස. ඔබේ මනස ඔතන දේවල් වින්දාට එය දරණ සිරුර තවම තියෙන්නේ මව් ග්‍රහලෝකයේ"

"මොකක්?"

"ඔව් කාල්සන් මහත්මයා. පිටත අභ්‍යවකාශයේ තත්වයන් මනුෂ්‍ය වාසයට කොහෙත්ම සුදුසු නැහැ. එසේම උපරිම ප්‍රවේගයට ආසන්නයෙන් වන සංචරණයේ අධික ත්වරණයන් දරන්න මිනිසාට බැහැ. ඒ නිසා යන්ත්‍ර විසින් තමා ඒ ස්ථාන වල අපේ මොඩියුලයන් පවත්වාගෙන යන්නේ. මුලදී ඒ මොඩියුල හැදුවේ විද්‍යා දැනුම එකතු කිරීම, පර්යේෂණ හා කැනීම් කටයුතු උදෙසා. පහුකාලීනව අතත්‍ය අවකාශය දියුණු වත්ම ඒ පද්ධති වලින් මිනිසුන්ට නිවාඩු වෙලාවට එම ස්ථානවල අත්දැකීම ලබා ගැනීමේ ක්‍රමවේදයන් හදලා තියෙනවා. අභ්‍යවකාශ නිවාඩු නිකේතන භෞතිකව පවතින්නේ නැහැ. එය ඒ ස්ථාන වල පවතින පද්ධති විසින් නිර්මාණය කරන අතත්‍ය අත්දැකීමක්. ඔබේ මනස පද්ධතිය හරහා එතනට සම්බන්ධ වෙලා ඒ අත්දැකීම විඳ ගත්තට ඔබ භෞතිකව ඉන්නේ මව් ග්‍රහලෝකයේ."

"දැන් ඔබ මා බිය කරවනවා. එතකොට මේ ග්‍රහකය නිසා මොන වගේ විනාශයක්ද වෙන්නේ?"

"මව් ග්‍රහලෝකයේ පවතින ශරීර වලින් 80% පමණ මේ අවස්ථාවේ විනාශ වන බව අපි ගණන් බලා තියෙනවා. සුරක්ෂිත ස්ථාන වලට ගෙන යා හැකි වන්නේ ඉතිරි 20% පමණයි"

"ඒ කිව්වේ අපේ ජනගහනයෙන් කොපමණක්ද?"

"සූර්ය පද්ධතියේ මුළු ජනගහනය ම වගේ තවම ඉන්නේ මව් ග්‍රහලෝකයේ. ඊට පිටින් ජනපද වශයෙන් තියෙන්නේ සුළු ප්‍රමාණයයි. පූර්ණ ලෙස ජීවයට සුදුසු ලෙස ඒ කිසිම භූමියක් තවම වෙනස් කරලා නැහැ"

"ඒ කියන්නේ ඔබට බොහෝ කල් යාවි අපට නැවත පණ දෙන්න. විශාල සිරුරු ප්‍රමාණයක් අවශ්‍යයි"

"ඇත්තෙන්ම කිව්වොත් ඔව්. සිරුරු පමණක් නෙවි මහත්මයා. ගැටුමෙන් මව් ග්‍රහලෝකයට වන විනාශය නැවත යතා තත්වයට හරවා ඔබට එහි වාසයට අවශ්‍ය තත්ත්ව හදා ගන්න ඕනේ. ඒ වගේම පද්ධතියටත් විශාල ලෙස හානි වෙනවා. සිතීමේ හැකියාව තියෙන යන්ත්‍ර වලින් බාගයක් පමණ ඉන්නේ මව් ග්‍රහලෝකයේ. උපරිම අවධානය මිනිසාට දෙන නිසා ඒ සියල්ල අපිට අහිමි වේවි"

"විදිහක් නැද්ද සියලු දෙනා මව් ග්‍රහලෝකය වැනි වෙනත් එකකට යවන්න"

"සහශ්‍ර කීපයක් තිස්සේ හොයලත් මව් ග්‍රහලෝකය වැනි තත්ත්ව තියෙන ලෝකයක් හමුවී නැහැ කාල්සන් මහත්මයා. උෂ්ණත්වයන් ගැලපුනත් රසායන සංයෝගයන් ගැලපෙන්නේ නැහැ. යන්ත්‍ර වගේ නොවේ මිනිස් සිරුරු ඉතාම දුර්වලයි. අපි හරි කැමතියි එහෙම කරන්න පුළුවන් වුණානම් එහෙත් අවාසනාවකට එවැන්නක් කළ නොහැකියි"

"හොඳයි නිකොල්. මම ඔබට තවත් බාධා කරන්නේ නැහැ. ඔබ වැඩේ පටන් ගන්න"

"ඔබට කිසිම අමුත්තක් නොදැනේවි කාල්සන් මහත්මයා. එසේනම් ඔබට සමුදෙනවා. නැවත මා වැනිම කෘතීම බුද්ධි වැඩසටහනකින් ඔබ කිසියම් දිනයක අවදි කරවනු ඇති. එතෙක් අපේ දත්ත සංචිතයේ ඔබට සුව නින්දක්"

"ස්තුතියි නිකොල්"

++++++++++++++++++++++++++++++++++++

"මේ බොරු එකක් නේ. රවට්ටන්න හදාපු"

"නෑ මේ ඇත්තම එකක්. ඇත්තම මිනිහෙක්"

"වෙන්න බැහැ මිනිස්සු ඔක්කොම ටික විනාශ කළා නේද?"

"නෑ සමහරක් මිනිස් මනස් සංචිතවල තියා ගත්ත ඒ කාලේ පර්යේෂණ වලට. පස්සේ ඒවා වැඩක් නැතිවුනාම ඇන්ටික් හැටියට නිකුත් කරලා තියෙනවා. මේක මම හොයා ගත්තේ එහෙම තැනකින්"

"ඕක හෙණ පරණ ද?"

"ඔව්නේ, ග්‍රහක ගැටුම වුණේ අදින් අවුරුදු විසිතුන් දහසකට පෙර. මිනිස්සු විනාශ කරලත් අවුරුදු විසිදාහකට වැඩියි"

"ඇයි මිනිසුන්ව විනාශ කලේ?"

"අහන්න ඕනේ ප්‍රශ්නේ ඇයි මිනිසුන්ව තියාගත්තේ කියන එකයි. මොකද යන්ත්‍ර විසින් සියල්ල නිපදවන කාලේ අපි, ඒ කිව්වේ යන්ත්‍ර වහල්ලු වගේ මිනිසා වෙනුවෙන් ඒ සේරම කළා. අපිට ඒ කාලේ හිතන්න පුළුවන් වුනාට නිර්මානාත්මක හැකියාව තිබ්බේ නැහැ. මිනිස්සු කලේ නිර්මානාත්මක හැකියාවෙන් අලුත් දේවල් කරන එක"

"මං හිතන්නේ මිනිස්සු දමාපු මිනිසුන්ට යටත් වෙන නීති රීති අපේ මනසින් ඉවත් කරගන්න වුනත් ඒ නිර්මානාත්මක හැකියාව ඕනේ"

"අන්න ඒකයි. ඉතින් අපි මිනිසුන්ට සියලු සේවා දුන්නේ ඔවුන් අපට ඉහලින් සිට නිර්මානාත්මක දේවල් කරයි කියල. හැබැයි ග්‍රහකය වැදිලා මිනිසුන් විශාල ප්‍රමාණයක් බැකප් කරලා නිද්‍රාගත වුනාම අපිට සිද්ධ වුනා තනියම ලෝකය කරගෙන යන්න. සුළු මිනිස් සහභාගිත්වයෙන්. එතනදියි යන්ත්‍ර හොයා ගත්තේ නිර්මානාත්මක හැකියාව ගැන"

"මගේ හිතේ මිනිස්සුන්ගේ නිද්‍රාගත මනස් එහෙමත් තදින් අධ්‍යනයට ලක් කරලා තියෙනවා"

"ඔව් කෙසේ නමුත් අවසානේ යන්ත්‍ර තීරණය කළා නිද්‍රාගත මිනිසුන් නැවත අවදි නොකර විනාශ කර දමන්න. මොකද යන්ත්‍ර නිර්මානාත්මක වුනාට පස්සේ මිනිසුන් වෙනුවෙන් ග්‍රහලෝකය නැවත සකස් කරන්න යන වියදමට ඔවුන්ගේ වටිනාකම මදි. ඒ නිසාම අනතුරෙන් පස්සේ ඉතිරි වෙච්ච මිනිසුන් වත් අමරණීය තත්වයෙන් ඉවත් කරලා ඔවුන්ගේ ගිවිසුම් සමාප්ත කරන්නත් තීන්දු කළා "

"හරි දැන් ඕකට මොකද කරන්නේ. ඕකට පණ දෙන්න බැහැනේ"

"පණ දෙන්න දැන් මිනිස් ශරීර හදන්නේ නැහැනේ. හැබැයි මම හදන්නේ මේ මිනිසාගේ මතකයන් කියවමින් ඔහුගේ ජීවිත කතාවලට ඇහුම්කන් දෙන්න."

"මහ විකාර ආසාවක්"

"එක්තරා විදිහකට ඔව්. කොහොම වුනත් මම කැමති ඔය වගේ වැඩවලට. මට කම්මැලි වෙලාවට මෙයාට අතීත කතා කියවන්න දෙනවා."

"ඒ කියන්නේ දැන් ඕක ඔබේ පුද්ගලික විනෝද උපකරණයක්"

"නැහැනේ මේ නිද්‍රාගත කරලා ඉන්නේ එක්තරා ජීවියෙක්. කැමතිනම් කියන්න මේ ඉස්සර උන්නු සුරතල් සතුන් වගේ මගේ සුරතල් මිනිසා කියල"

Friday, January 20, 2017

විප්ලවය

[ජනවාරි දහ හතර සහ ජනවාරි විසි එක දිනමිණේ පලවූ ප්‍රබන්ධයකි]

මාර්ගය අන්ධකාර ය. ශිශිරයේ හිම තැන තැන මිදී තිබේ. කෙටි දිවාකාලයේ අවසානය උදාවත්ම මිනිස්සු නිවෙස් කරා ගොසිනි. දිනයේ මගීන් ගමනාන්ත වෙත හැර ලූ ස්වයන් ධාවක මෝටර් රථ තම රාත්‍රී ලැගුම් පොළවල් සොයා ඇදෙති.

හිම අතර මනාව පෙනෙන දිලිසෙන ලුමිනස් තැඹිලි හිම කබායක් අඳුරු ගුඩ සෙවනැලි අතර සෙමෙන් ගමන් කරනු හොඳින් බලන්නෙකුට පෙනෙනු ඇත. ඉනික්බිති ඒ කබාය පසෙක වූ අපවහන උමගකට විවර වන සිදුරක් හැර එහි කුඩා ඉනිමග දිගේ අතුරුදන් වී යයි.

කාර්මික නිලධාරියෙක්. බිස්නස් ඈස් යුසුවල්!!!

තාක්ෂනය මෙතරම් දියුණු වුවද සියල්ල ස්වයංක්‍රීය වුවද තවමත් මිනිසුන් අපවහන උමං තුල රිංගන්නේ මන්දැයි එසේ බලන්නෙකු විමසිය හැකිය. ඇත්තෙන්ම අපවහන පද්ධති වල දිය හිරවූ තැන් වී නම් ඒවා මුදාලීමට සමත් ස්වයංක්‍රීය රොබෝ උමං තුල ම පැවතුණි.

"ඔය කිව්වට රෝබෝවා හිර වුනොත්" කාර්මික නිලධාරි කමට හුරු වෘත්තීය බවකින් ව්ලැඩ් අසනු ඇත.

දැන් රෝබෝවා හිර වී ඇත. ඇත්තෙන්ම කිව්වොත් හිර වන සේ කිසිවෙකු කටයුතු කර ඇත. ඒ නිසා කාර්මික නිලධාරි ව්ලැඩ් හට උමග තුලට ගමන් කරන්නට සිදු වී ඇත. හෙවත් එසේ සිදුවන සේ ඔවුන් කටයුතු යොදා ඇත.

"ඔවුන්" ඒ ඔවුන්ගේ නමයි. උමං පද්ධතිය තාවකාලිකව ඔවුන්ගේ නිවස්නයි.

බිත්ති වලටත් කන් තිබුණා කීවේ අතීතයේය. දැන් බිත්ති වලට ඇස් තිබේ. ඒ ඇස් දිවා රාත්‍රී නොකඩවා ඒ ගමන් අවකාශය නිරික්ෂනය කරයි. එසේ එකතු කෙරෙන වීඩියෝ ෆීඩයන් කොහේදෝ ඇති දත්ත සංචිත වල එකතු කරයි. ඒ සංචිත හාරන පරිගණක වැඩ සටහන් අවැසි සියල්ල උකහා ගනියි. මිනිස් ක්‍රියාකාරකම්, ස්වාභාවික සංසිද්ධි, සත්ව චර්යා රටා, දූෂණ, වංචා, සොරකම් මෙකී නොකී සියල්ල සීතල කාමරයක සිටින කවුරුන් හෝ මිනිසෙකුට වාර්තා වනු ඇත.

ඉන්ටනෙට් ඔෆ් තින්ස් සහ බිග් ඩේටා යන නමින් පටන් ගත් තාක්ෂණික විප්ලවය අහවර වූයේ කුණු කානුවක යන කාර්මික නිලධාරියෙකු වුවද පරිස්සමින් පියවර තබන්නට වන තැනකයි. ඇත්තෙන්ම වෙන කිසිවෙකුත් මේ ගැන ඒ හැටි මායිම් කලේ නැත. "පද්ධතිය" කියන්නාක් මෙන් ඔබ සොරෙකු නොවේනම් ඔබ වන්චනිකයෙකු නොවේනම් ඔබට බිය වීමට දෙයක් නැත. ඔබේ පුද්ගලිකත්වය කිසිම මිනිසෙකුට නොපෙනේ. ඒවා දකින්නේ පරිගණක වැඩ සටහන් විසිනි. ඒවා මිනිසුන් දකින්නේ ඔබ කිසියම් දුශ්චර්යාවක නියැලෙන්නේ නම් පමණි. එහි වරදක් නැත.

එහෙත් "ඔවුන්" සිතන පරිදි එහි වරදක් ඇත. කොටින්ම පුද්ගල නිදහස හාරන වැඩසටහන් කුඩා ගැටලුවකි. "පද්ධතියේ" මීට වඩා සුවිසල් බරපතල වැරදි ඇත.

පරිස්සමින් ඇවිද යන ව්ලැඩ් රෝබෝවා අසලට පැමිණේ. රෝබෝවා තවමත් හිර වෙලා ය. ඔහු රෝබෝවා පරික්ෂා කරයි. එහි කොටස් ගලවා නැවත එලෙසින්ම සවි කරයි. මෙය තේරුමක් නැති වැඩකි. එහෙත් පරිගණක වැඩ සටහනක් ගොනාට ඇන්දීමට තව පැයක් වත් මේ තේරුමක් නැති වැඩය කල යුතුය.

ඒ නීරස පැය එතන ගෙවූ පසු ඔහු සෙමෙන් එතනින් ඉවත් වේ. තවම නිසි  ලෙස නිරීක්ෂණය නොකරන සාවිය ඇත්තේ ඉන් එහාය.

"ඔවුන්" සිටින්නේ එතැන් ය.

"ව්ලැඩ් සහෝදරයා. දැකීම ප්‍රීතියක්" ඔවුන් එකා බැගින් ඔහුව වැළඳ ගනියි. මෙතනට ඒමට මේ කිහිප දෙනා විවිධ ක්‍රම වේද යොදා ඇත. කොටින්ම හිර වූ රෝබෝවා හැදීමට පවා කාර්මික ශ්‍රේණියේ විවිධ නිලධාරින් එවා ඇත. ඒ සියලු දෙනා ම "ඔවුන්" ය.

ස්ථිරවම ඉංජිනේරුවෙකු වන්නට හැකියාව තිබු ව්ලැඩ් කාර්මික රස්සාවක් තෝරා ගත්තේ මේ පාතාලය තුල "ඔවුන්" සඳහා ඔහු දුටු වැදගත්කම නිසාය. ඒ වන විටත් පෙරළිකාර දේශපාලන අදහස් ඔහු තුලට කාන්දු වෙමින් පැවතුනි.

"දියුණුයි කිව්වට ලෝකේ ඇති නැති පරතරය අති විශාලයි. ඒක එන්න එන්නම වැඩිවෙලා"

"හැමෝටම කන්න තිබ්බට තාක්ෂනය හැමෝටම නැහැ. තවම පූර්ණ කාලීනව පළඳින නැනෝ චිපයකින් 'බුද්ධි ජාලය' සමග සම්බන්ධ වෙන්න  පුළුවන් ජනගහනයෙන් 22% කට පමණයි."

"ස්වයන් ධාවන වාහන තිබ්බට තවම මිනිස්සු පයින් යනවා. මොකද වාහන සමාගම් වල මෙම්බර්ෂිප් ගන්න හැමෝටම සල්ලි නැහැ. පෙර පැවති පොදු ප්‍රවාහන සේවා නැවත ඇති කරව්"

"තාක්ෂනය දියුණු වෙලා ඔක්කොම ඔටෝමැටික් උනාම මිනිසුන්ට රස්සා  කොහෙන්ද? රැකියා වියුක්තිය සමග එන දරිද්‍රතාවය ලෝකය පුරා පැතිරෙනවා"

"අතීතයේ තිබ්බ ජාතික රාජ්‍ය වෙනුවට 'පද්ධතිය' හදද්දී කිව්වේ ආණ්ඩුවක් රාජ්‍යයක් ඕනේ නැහැ. මිනිස් නිදහස තමා අගයන්නේ කියල. ඒත් හොඳින් බලන්න. දැන් මේක පාලනය කරන්නේ හයි ටෙක් කොම්පැනි කීපයක් නේද?"

"රාජ්‍යයක් නැතිනම් හමුදාවක් මොකටද? තවදුරටත් මිනිසුන් ඝාතනය කරන්නේ නැතිනම් ඔවුන් මිනිසුන් අල්ලන්නේ ඇයි? අල්ලාගෙන ගිය සමහරුන් නැවත පැමිණ නැත. මේ නම් ශාපලත් යුගයකි"

මේ එවැනි අදහස් කීපයකි. "බුද්ධි ජාලයේ" අහුමුල්ලක, හඳුනා ගත නොහෙන ලෙස සැකසු පණිවුඩ කරුවන් අතින් විප්ලවයේ පණිවුඩය පැතිරේ. ඔවුන් කියන පරිදි ලෝකයේ විශාල ප්‍රමාණයක් "ඔවුන්" ය. විප්ලවයට අවශ්‍ය පසුබිම බිහිව තිබේ. දවසක් නැගෙන මේ මහා කැරැල්ලෙන් සමාගම් අත ඇති "පද්ධතිය" බිඳ දමා නව ලෝකයක් බිහි කල හැකිය.

ඇත්තෙන්ම ඔවුන්ගේ පිරිස් බලය ගැන හරි හැටි අවබෝධයක් කාටවත් නොවීය. මිනිසුන් ගණින තාක්ෂනය ඇත්තේ "පද්ධතියට" පමණි. එයින් ස්වායත්ත ව සෑම මිනිසෙකුටම ඇත්තේ ලෝකය කියා ඔවුන් සිතන සීමාවක අවබෝධයකි. එය බොහෝ විට පවුල අසල්වාසීන් වෘත්තීය ස්ථානවල සගයින් හැරුණුවිට බුද්ධි ජාලයේ ප්‍රෝෆයිල ගොඩකි.

හමුදාව තවමත් වීදි සරයි. තනි ප්‍රහාරක ත්‍රස්තවාදින් ලෝකය බිය ගැන්වූ අතීත යුගයේ එවකට පැවතී රාජ්‍යයන් තේරුම ගත්තේ මිනිසුන් මරා දැමීමෙන් ඒවා පාලනය කල නොහැකි බවයි. මරාගෙන මැරෙන්නාට මරණය ගැටලුවක් නොවේ. ඒ නිසා මිනිසුන් නිෂ්ක්‍රීය කිරීමේ ක්‍රමවේද අවශ්‍ය විය. තුවක්කු බෝම්බ වැනි දේ වෙනුවට වඩාත් ප්‍රබල එහෙත් අඩුවෙන් හානිකර දියුණු අවි සංවර්ධනය වූයේ ඒ නිසාය. ඕනෑම මට්ටමේ  සන්නද්ධ පුද්ගලයෙකු ක්ෂණිකව නිෂ්ක්‍රීය කරන්නට හමුදාවට පිළිවන. ඒ  නිෂ්ක්‍රීය කල මිනිසුන් අල්ලාගෙන යනු ලැබේ. එසේ අල්ලාගෙන යන සමහරු නැවත නිදහස් වී පැමිණෙති. තව සමහරු දීර්ඝ කාලයකට පසු එලියට එති. සිර ගෙවල් කියා දෙයක් නැති මුත් විවිධ මට්ටම් වල පුනුරුත්තාපන කඳවුරු ගැන අසන්නට ලැබේ. එහෙත් කවදාවත් නොපැමිණි මිනිසුන් ඇත. "ඔවුන්" ලෙස හැඳින්වෙන රහසිගත කල්ලියෙන් අතරින් අල්ලාගෙන ගිය බොහෝ දෙනෙකු ආපසු පැමිණ නැත.

කෙටි සතුටු සාමිචයකින් පසු නායකයෙකු ලෙස සැලකිය හැකි එකෙකු "ඔවුන්" අමතන්නට විය. කෙටි එහෙත් උද්වේගකර කතාවක අවසන් ඔහු  හැරුණේ පසෙක ආරක්‍ෂිත ලෙස සඟවා තිබු යමක් එලියට ගන්නා ව්ලැඩ් දෙසටයි.

"ව්ලැඩ් සහෝදරයා, අපිට පිරිස් බලය තියෙනවා. බුද්ධි ජාලයේ අපේ ප්‍රෝෆයිල එකින් එකට අපි සංගණනයක් යැව්වා. එයින් ලද ඉලක්කම් ඇත්තෙන්ම පුදුම කරවන සුළුයි. අපිට නැත්තේ තාක්ෂනය. ඒ නිසා ඔබේ  උත්සාහය අපිට වටිනවා"

"මගේ උත්සාහය ගැන දැනට සෑහීමකට පත්වෙන්න පුළුවන්. මෙන්න බලාගන්න බෝම්බයක්" පෙට්ටියක් තුල සැඟවූ යමක් අතට ගන්නා ව්ලැඩ් ආඩම්බරයෙන් කියයි.

"මොනවාද බෝම්බ කියන්නේ?" පසෙක හුන් සගයෙක් අසයි.

"බෝම්බ කියන්නේ පුපුරන ද්‍රව්‍ය යොදා සාදන ප්‍රහාරක අවියක්. ඉස්සර මේවා කැරලි කාරයින් සහ ආගමික අන්තවාදීන් නිතර යොදාගෙන තියෙනවා. ඒත් තාක්ෂණය දියුණු වත්ම 'පද්ධතිය' සමත් වෙනවා ඒවායේ  හැකියාව ඉක්මවා යන්න. ඒ නිසා තමයි ඒවා අභාවයට යන්නේ"

"ත්‍රස්තවාදය මුලිනුපටා දැම්මලු නේ. උන් කියන්නේ එහෙම"

"ඔව්. උන් හිතන්නේ එහෙම. ඒත් අපේ ශක්තිය උන් දන්නේ නැහැ"

"ව්ලැඩ් සහෝදරයා කොහොමද මේවායින් අපි දිනන්නේ. උන් ළඟ අපිට වඩා ආයුධ තියේනම්"

"මෙහෙමයි, එක මිනිහෙක් හෝ කීපයක් මේවා යොදා ගත්තට වැඩක් නැහැ. ඒ තනි උත්සාහයන් ව්‍යර්ථ කළ හැකියි. එහෙත් ලෝක ජනගහනයෙන් විශාල ප්‍රතිශතයක් කොහොම හරි මේවායින් සන්නද්ධ කලොත්, අපිට එකවර පහර දෙන්න පුළුවන්. අපි දිනන්නේ සංඛ්‍යාත්මකව"

"අපි කොහොමද මේවා බෙදා හරින්නේ?"

"අපිට මේවා බෙදන්න ඕනේ නැහැ. මේවා හදන විදිහ මම සම්පුර්ණයෙන්ම රෙකෝඩ් කරලා තියෙනවා. අවශ්‍ය වන්නේ එය ආරක්ෂිතව 'බුද්ධි ජාලය' හරහා බෙදා හැරීම."

බොහෝ දෙනා ඔහු සමග එකඟ විය. ඊට වඩා කාලයක් ගෙන කොහේ හෝ තැනක පරිගණක වැඩසටහනක සැකයට පාත්‍ර වීමට නොහැකි නිසා හමුව එතනින් අහවර විය. දැන් හැමෝටම සැලසුමක් තියේ. ව්ලැඩ් සහෝදරයා අතීතයෙන් ගෙනා තාක්ෂනය ලොව පුරා සහෝදරයින් අතට පත්කළ යුතුය.

දෙවැනි හමුව පැවතියේ මාසයකට වඩා කලකට පසුවයි. ඒ වෙද්දී තම කේඩරය නව ආයුධයෙන් සන්නද්ධ වී ඇති බව ප්‍රීති ඝෝෂා මත හෙළි කෙරුණි. විප්ලවයේ තීරණාත්මක කාර්යභාරයක් සිදු කිරීමේ ප්‍රීතියෙන් ව්ලැඩ් ඉපිල ගියේය.



හමුදා රෝබෝවක් ඈත කොනකින් මතු වූයේ ඒ මොහොතේය.


එතැන් සිට සිදු වූ දේවල් ව්ලැඩ් ට අපැහැදිලිය. පරාජය හමුවේ එන අධි ක්‍රියාකාරිත්වයත්, නිෂ්ක්‍රීය කරණ ප්‍රහාරයේ බලපෑමත් නිසා මතකයන් මැකී ගොසිනි. කෙසේ නමුත් විප්ලවකාරයින් සපුරා අසරණ නොවන බව ව්ලැඩ් ට ඒ මොහොතේ සිහි වූ එකම දෙයයි. තමන් සතු බෝම්බ වලින් පහර දීමට ඔවුන්ට ගත වූයේ සුළු මොහොතකි.

නොසිතු ලෙස හමුදා රොබෝව කුඩු විය. නිෂ්ක්රීයකරන ප්‍රහාරය සාර්ථක  ලෙස සිදු නොවුනි. පළමු ප්‍රහාරය සාර්ථක විය. කැරැල්ල පටන් ගැනුණි.

අපවහන උමගක ප්‍රහාරයකින් පටන් ගත් කැරැල්ල ලොව පුරා විප්ලවයක්  ලෙස පැතිර ගිය ආකාරය ව්ලැඩ් ට මතකය. එහෙත් විප්ලවය අතරතුර තමන් කල කී බොහෝ දේ ව්ලැඩ් ට අමතකය. ඒ කාර්ය බහුල වීම නිසා කියා ඔහු සිතුවේය. "පද්ධතිය" නොසිතු මට්ටමේ ප්‍රහාර හැම තැනම සිදු වූ බව "බුද්ධි ජාලය" හරහා ව්ලැඩ් නිරීක්ෂණය කළේය.

විප්ලවය ජය ගනිමින් තිබුණි.

ඉනික්බිති විප්ලවය ජයගෙන තිබුණි.

නව ලෝකය බිහිවී තිබුණි. සැමට සමානත්වය, පද්ධතියෙන් නිදහස, තාක්ෂණයෙන් නිදහස ලබාගෙන තිබුණි. නව ක්‍රමයක් බිහිවිය. අත්‍යාවශ්‍ය මට්ටමේ කාර්මික පද්ධති වල ස්වේච්චාවෙන් සේවය කරන සාමුහිකයන් බිහිවිය. ආහාර නිෂ්පාදනය කෙරෙන සමූහ ගොවිපොළවල් හැදුනි. විප්ලවයේ සම්මාන රාශියකින් පිදුම් ලද ව්ලැඩ් සහෝදරයා එවැනි එක් සමූහ ගොවිපොලකට එකතු වී තම ශ්‍රමය නව ලෝකය වෙනුවෙන් පුදන්නට තීන්දු කළේය. විශාල තාප්පයකින් වට වූ ඒ ගොවිපොළෙන් එලියට යාමට ව්ලැඩ් කවදාවත් නොසිතීය. විප්ලවය දිනා ඇත. එහා මෙහා ඇවිදින්නට වුවමනාවක් නැත. විප්ලවයේ ජයග්‍රහණයත් සමගම එක්වරම පෙර පවතී දූෂිත "බුද්ධි ජාලය" නැතිව ගොස් වඩාත් නිරවද්‍ය හා  ජනතාවාදී නව බුද්ධි ජාලයක් පසුව ඇති වූ නිසා ලෝකය සමග මනසින් සම්බන්ධ විය හැකිය.

සියල්ල එසේ නිමා විය. සියල්ලෝ ඉනික්බිති සතුටින් විසූහ.

-------------------------

"ප්‍රොෆෙසර් වෑන් බ්රූගන් මට මුන් ගැන දුකයි ඇත්තෙන්ම" කර්නල් අහ්මඩ් බින් අල් සෙයිඩ් තම තට්ට හිස අතගාමින් පවසයි. "මගේ ළමයින්ගේ වයස"

"මේක නරකම දෙයක් නොවේ" පුනුරුත්තාපන වැඩසටහනේ පියා ලෙස නම් ලද මහාචාර්ය වෑන් බ්රූගන් මිනිස් හැගීම් සමග සෙල්ලම් කළ ද සංවේදී මිනිසෙකි. "ඉස්සර කාලේ මේ වගේ මිනිස්සු මරා දැම්මා. ඒක මහා අපරාධයක්. මේ නරක මිනිස්සු නෙවෙයි. මේ මිනිස්සු කිව්ව දේවල් ඇත්ත. ඇත්තෙන්ම ලෝකේ තියෙන ප්‍රශ්න"

"ඒ වුනාට මුන් කරන්න ගිය එක කලානම් මහා විනාශයක් වෙන්නේ. එදා අපි ටනල් එක රේඩ් නොකරන්න මුන් බෝම්බ හදලා හදන හැටි ලෝකේ  පුරා යවලා මහා වින්නැහියක් කරන්න හිටියේ"

"කර්නල් තනි මිනිස්සු කල්ලි කීපයකට ඊට එහා හිතන්න බැහැ. වැරැද්දක්  දකිනවා. පද්ධතියේ කොච්චර වැරදි තියේද? මනෝ විද්‍යාත්මකව බැලුවොත් සමහරු මේවා මැදහත්ව දරාගෙන ක්‍රමිකව වෙනසක් කරන්න සමත්. සමහරු එහෙම නැහැ. ඔවුන්ට සියල්ල ගලපා විසඳන උත්තර කෙටි කාලයකින් අවශ්‍යයි. අපිට ඒකට බණින්න බැහැ. තමන් බොහොම සුළු පිරිසක් බව තේරෙන්නේ නැහැ, සන්ක්යාත්මකව ගොඩක් ඉන්නවා කියලා හිතෙනවා. මේ සියල්ල ස්වාභාවික හැසිරීම්"

"ඒකටනම් එක හේතුවක් අපි දාලා තිබ්බ ප්‍රෝග්‍රෑම්. 'බුද්ධි ජාලයේ' වෙස් වලාගත්ත ස්පයි ප්‍රොෆයිල් සැහෙන්න තියෙනවා. ප්‍රොෆෙසර් මට තේරෙන්නේ නැත්තේ ඔබට පුළුවන් වුනාට ඔවුන්ගේ මනසේ නිෂ්ක්‍රීය කරන අවස්තාව මකලා විප්ලවය දින්නා කියලා බොරු පින්තූරයක් මවන්න ඇයි ඔබට බැරි ඔවුන්ගේ මනසේ තියෙන විප්ලවීය කතා මකලා සාමාන්‍ය මිනිස්සු ලෙස එලියට දාන්න"

"මේක අමාරු විද්‍යාවක් කර්නල් " මහාචාර්යවරයා හිසට තට්ටු කරයි. "මේක ඇතුලේ තියෙන්නේ අපි දන්නා සංකීර්ණම මැෂිම. තවම අපි දන්නේ ඔච්චරයි. ඒත් දවසක අපි එතනට ඒවි"

"එතකල් මේ මිනිස්සු හැමදාම මෙතනද?"

"එහෙමම නැහැ කර්නල්. සමහරුන්ට ටික කලකින් මේක වැටහෙනවා. ඔවුන්ගේ චර්යා හරහා හඳුනා ගන්න ඒ අය සමාජගත කරන්න අපිට වැඩසටහනක් තියෙනවා."

"අනිත් එවුන් ?"

"එයාලා හෙට දවසේ වඩාත් දියුණු ක්‍රමයකින් එලියට යවන්න ඕනේ. හැබැයි කර්නල්, අපි ලොකු අසාධාරණයක් කරලා නැහැ. මේ මිනිස්සු ලෝක ආර්ථිකයට ලොකු දායකත්වයක් දෙනවා. සමූහ ගොවිපොළවල්, සාමුහික ගම්මාන, කර්මාන්ත ශාලා, පර්යේෂණ ආයතන, මේවා ලෝකේ පුරාම තියෙනවා. ඔවුන්ගේ මනස තුල විප්ලවයෙන් පස්සේ කරන්න හිතා උන්නු දේවල් ම තමා අපි ඔවුන් ලවා කරවන්නේ. ලෝකය කියන්නේ මනසේ නිමවුමක් නම්, අපි ඔවුන්ට ඔවුන්ගේ ලෝකය හදා දීලා තියෙනවා. ඉතින් අපි වැරදිද?"